Yohana 6 - Nyamwezi New Testament 1951

¹ Hanuma na genaya Yesu wajaga ku mwambu yingi ya nyanza ya Galilaya, nyanza ya Tiberia.

² Alisi mbuto nhanya ya vanhu yamulondaga, kunguno vayivonaga migaka hoyene wavitilaga vasatu.

³ Na Yesu walinaga ku lugulu na wikalaga kwenuko na vahemba vakwe.

⁴ Alisi Pasaka, sikukulu ya Vayahudi, yavagi bihi.

⁵ Aho Yesu wasanukaga wavonaga ati mbuto nhanya ya vanhu yiliza kuwakwe, wamuwilaga Filipo,

⁶ Tugule kuhe mikate, kigele venava valye? Alisi wayombaga yeniyi kunguno ya kumugema, kwisi mwenekili wamanikaja cheniki wakovaga kwita.

⁷ Filipo wamwitavukaga, Mikate ya denari magana avili kukwila ngʼo kuwavo kigele kila umo apiwe tudotudo.

⁸ Umo wa vahemba vakwe, Andrea, muduguye wamwa

⁹ Simoni Petro, wamuwilaga, Henaha aliho muyanda homwene ali na mikate itano ya vusiga na masomba avili, alisi genaya ki ku venava vingi?

¹⁰ Yesu wayombaga, Muvikazye vanhu hasi. Na maswa mingi gavagiko kwenuko. Na vagosya vikalaga hasi, luvalo lwavo lwavagi kitisi fihumbi fitano.

¹¹ Haho Yesu wayisolaga mikate, walumbilaga na wavagavulilaga avo vikalile hasi, na sisyo savasava ku masomba kitisi vakovaga.

¹² Alisi aho vigutaga wavawilaga vahemba vakwe, Musolelage matonge gasigalile, kwigela ngʼo kinhu kimo kizimile.

¹³ Haho vagasolelaga na vagokazaja matala ikumi na avili ga matonge ku mikate izyo itano zya vusiga, hogene gasigalaga ku venavo valyaga.

¹⁴ Aho vanhu vaguvonaga mugaka hogwene witaga, vayombaga, Mwenuyu ali loleyene mufumbuzi homwene akwiza mu liwelelo.

¹⁵ Na aho Yesu wamanikaja ati vakovaga kwiza kumudima kigele vamutemye, wajaga hangi inene ku lugulu.

¹⁶ Na aho limi lyalokaga vahemba vatelemukaga ku nyanza, vingilaga mu wato na vambukaga ku Kapernaumu.

¹⁷ Na hilavulaga na Yesu wavagi atali

¹⁸ kufika kuwavo; na nyanza yatinginivagwa, kwisi muyaga muhanya gwapepelaga.

¹⁹ Na aho vamalaga kuvuga stadio makumi avili nʼitano ninga makumi adatu, vamuvonaga Yesu alisimiza ku nyanza, na aliwegela wato;

²⁰ na vogohaga. Alisi uyu alivawila, Ndi nene,

²¹ mukogohe ngʼo! Haho vakovaga kumwanukula mu wato, na itungo lili wato wafikaga ku nguka uko vajile.

²² Hawangaluke mbuto ya vanhu, hovene vimaga ku mwambu ya nyanza, vavonaga ati haduhu wato vungi sumbwa wenuvo duhu, na vawine ati Yesu akingilile hamohene na vahemba vakwe mu wato, sumbwa vahemba vakwe vinene vavukaga.

²³ Alisi mawato gangi gafikaga kufuma Tiberia bihi na henaho valyaga mikate aho Yesu walumbilaga.

²⁴ Na aho mbuto ya vanhu vavonaga ati Yesu ali haduhu, ninga ngʼo vahemba vakwe, vingilaga mu mawato na vafikaga ku Kapernaumu valimukova Yesu.

²⁵ Na aho vamuvonaga ku mwambu ya nyanza vamuwilaga, Rabi, veve wafikaga henaha nanali?

²⁶ Yesu wavitavukaga, uhaya, Yalole, yalole ndimuwila inwe, mukankovile kunguno mwaguvonaga mugaka, sumbwa kunguno mwalyaga mikate na mwigutaga.

²⁷ Mukagangadike ngʼo kunguno ya chakulya hochene kilizimanguka, sumbwa chakulya hochene kilidila kusika ku vuzuvuku wa hanahana, hochene Mwana wa Munhu alimupa inwe, kwisi Vava, Mulungu, watulaga lumanyilo kwigulya na mwenuyu.

²⁸ Haho vamuwilaga, Tuvezyeki

²⁹ kigele tuyitumame milimo ya Mulungu? Yesu witavukaga, uvawila, Gwenugu guli mulimo gwa Mulungu

³⁰ ati, mumusanizye mwenuyo wamutumizaja. Haho vamuwilaga, Ulivezya mugaka ki kigele tuvone na

³¹ tukusanizye? Ulivezya mulimo ki? Vahenga viswe valyaga mana mwibalangu kitisi yatonilwe, Wavapile ava kulya mukate kufuma kwilunde.

³² Na Yesu wavawilaga, Yalole, yalole ndimuwila inwe ati, akavile Mose homwene wamupaga inwe mukate kufuma kwilunde, sumbwa Vava wane alimupa inwe mukate gwa lole kufuma kwilunde.

³³ Kwisi mukate gwa Mulungu guli gwenugo gulifuma kwilunde na gulilipa liwelelo vuzuvuku.

³⁴ Haho vamuwilaga, Guku, utupage hanahana mukate gwenugu.

³⁵ Yesu wavawilaga, Nene ndi mukate gwa vuzuvuku, homwene alizaho hawane kutama ngʼo nzala, na homwene alinsanizya kukolwa ngʼo hangi nota.

³⁶ Alisi namuwilaga inwe ati mwambwine na mukansanizizye.

³⁷ Gose genaya Vava alimpa nene gakwiza kuwane, na homwene aliza kuwane nene

³⁸ kumupezya ngʼo na hado ngʼo. Kwisi nikile kufuma kwilunde, ngʼo kigele nakimazye kikowa chane, sumbwa cha mwenuyo wantumizaja.

³⁹ Na cheniki kili kikowa cha mwenuyo wantumizaja ati, mugati na fyose hofyene wampaga nakakizimizye ngʼo kinhu kimo, sumbwa nakihembuche ha lusiku lwa mhelo.

⁴⁰ Kwisi cheniki kili kikowa chamwa Vava ati, homwene alimuvona Mwana na alimusanizya ave na vuzuvuku wa hanahana, na nene nkumuhembucha ha lusiku lwa mhelo.

⁴¹ Haho Vayahudi vamwingʼungʼulilaga kunguno wayombaga, Nene ndi mukate hogwene gwafumile kwilunde, na vayombaga,

⁴² Mwenuyu akavile Yesu, mwana wamwa Yosefu, na tulivamanicha ise na nina? Lumehoki mwenuyu aliyomba, Nene nafumaga kwilunde?

⁴³ Yesu witavukaga, uvawila, Mukingʼungʼule ngʼo hamohene.

⁴⁴ Kuduhu umo alikovola kwiza kuwane ulu akadutilwe na Vava, nane nkumuhembucha ha lusiku lwa mhelo.

⁴⁵ Yatonilwe na vafumbuzi, Na vose vakuvi vahembekilwe na Mulungu. Homwene wigagwa kumwa Vava na wahembekagwa nawe aliza kuwane.

⁴⁶ Kuduhu umo wamuwine Vava sumbwa uyo wafumile kumwa

⁴⁷ Mulungu, mwenuyu, ahene, wamuwine Vava. Yalole, yalole ndimuwila inwe, Homwene alinsanizya ali na vuzuvuku wa hanahana.

⁴⁸ Nene ndi mukate muzuvuku,

⁴⁹ Vahenga vinwe valyaga mana mwibalangu, alisi vafwaga.

⁵⁰ Gwenugu guli mukate hogwene gulika kufuma kwilunde, kigele munhu agulye aleke kufwa.

⁵¹ Nene ndi mukate muzuvuku hogwene gwikile kufuma kwilunde; munhu homwene aligulya mukate gwenugu akuzuvuka myaka de; na mukate hogwene nkugupana guli muvili gwane, hogwene nkugupana ku vuzuvuku wa liwelelo.

⁵² Haho Vayahudi viyanilizaja muwavo, vuhaya, Lumehoki mwenuyu alikovola kutupa iswe muvili gwakwe

⁵³ tugulye? Yesu wavawilaga, Yalole, yalole ndimuwila inwe ati, ulu inwe mukavile kulya muvili gwa Mwana wa Munhu na kunwa magazi gakwe mukavile navo vuzuvuku mugati ninwe.

⁵⁴ Homwene alilya muvili gwane na kunwa magazi gane ali navo vuzuvuku wa hanahana, nane nkumuhembucha ha lusiku lwa mhelo.

⁵⁵ Kwisi muvili gwane guli kiliwa loleyene na magazi gane gali kinwiwa loleyene.

⁵⁶ Homwene alilya muvili gwane na kunwa magazi gane alidilamo muwane, nane muwakwe.

⁵⁷ Kitisi Vava muzuvuku wantumizaja, na nene ndizuvuka kunguno ya Vava, sisyo sisyene homwene alindya nene akuzuvuka kunguno yane.

⁵⁸ Gwenugu guli mukate hogwene gwikile kufuma kwilunde, ngoʼ kitisi ugo vahenga valyaga, alisi vafwile.

⁵⁹ Homwene alilya mukate gwenugu akuzuvuka myaka de. Genaya wayombaga mu sinagogo aho wahembekaga mu Kapernaumu.

⁶⁰ Haho vingi va vahemba hovene vayigagwa vayombaga, Muhayo ugu mulambu; nani alikovola kwigwa?

⁶¹ Alisi aho Yesu wamanikaja muwakwe ati vahemba vakwe vagwingʼungʼulilaga muhayo gwenugu, wavawilaga, Muhayo ugu muligukilwa inwe?

⁶² Haho kinahe ulu mukumuvona Mwana wa Munhu kulina kwenuko wavagiko hambele?

⁶³ Yili Roho hoyene yilileta vuzuvuku, muvili gukakovolile kinhu; mihayo hoyene namuwilile inwe yili Roho na vuzuvuku.

⁶⁴ Alisi valimo vamo mugati ninwe hovene vakavile kusanizya. Kwisi kufuma mbuki Yesu wavamanikaja venavo hovene vakasanizizye na mwenuyo akumugamba.

⁶⁵ Na wayo mbaga, Kunguno yeniyi namuwilaga inwe ati, kuduhu umo alikovola kwiza kuwane ulu yikapanilwe kuwakwe na Vava.

⁶⁶ Vukumbu na lusiku lwenulo vingi va vahemba vasyokaga numa, na vakasimizile hangi hamohene nawe.

⁶⁷ Haho Yesu wavawilaga ava ikumi na vavili,

⁶⁸ Imba ninwe vene mulikova kwingaho? Simoni Petro

⁶⁹ wamwitavukaga, Guku tuje kumwa nani? Veve uli nayo mihayo ya vuzuvuku wa hanahana, na iswe twasanizizye na twamanikizye ati veve uli Musondo wa Mulungu.

⁷⁰ Yesu wamwitavukaga, Kinahe, nkamusogolile inwe ikumi na vavili, na umo mugati ninwe ali

⁷¹ Shetani? Alisi wamuyombaga Yudasi mwana Simoni Iskariote, kwisi homwenuyu alamugambe, nawe wavagi umo wa venava ikumi na vavili.