Yohana 4 - Nyamwezi New Testament 1951

¹ Aho Guku wamanikaja ati Vafarisayo vigagwa kitisi Yesu alivagada vahemba vingi na alivoja vingi kukila

² Yohana (nulu Yesu akogizye mwenekili, sumbwa

³ vahemba vakwe), haho wakufumaga ku Uyahudi na wajaga hangi ku Galilaya.

⁴ Alisi yamudimaga kuvita mu Samaria.

⁵ Haho wafikaga ku kaya yimo ya Samaria, lina lyayo Sikari, bihi na kiwanja chenicho Yakobo wamupaga mwana wakwe Yosefu.

⁶ Na henaho lwinzi lwamwa Yakobo lwavagiho.

⁷ Na Yesu, aho wazovaga na lugendo, wikalaga ha lwinzi, na yavagi kitisi saa sita. Na mukima Musamaria wizaga kudaha minzi.

⁸ Na Yesu wamuwilaga, Umpe minzi nanwe; kwisi vahemba vakwe vajaga mu kaya vakagule chakulya.

⁹ Mukima Musamaria wamuwilaga, Kungunoki veve Muyahudi ulilomba minzi ga kunwa hawane, nene mukima Musamaria? kwisi Vayahudi vakavile na lusangi na Vasamaria.

¹⁰ Yesu witavukaga, umuwila, Ulu mbe wakimanikaja kipanwa cha Mulungu na uyu ali nani alikuwila, Umpe minzi nanwe, mbe veve wamulombaga, nawe mbe wakupaga minzi ga vuzuvuku.

¹¹ Mukima wamuwilaga, Guku, ukavile na kiseme cha kudahila na lwinzi lusihu, kuhe uli nago minzi ga vuzuvuku?

¹² Veve uli muhanya kukila nsiswe Yakobo homwene watupaga lwinzi lwenulu na mwenekili wanwaga kulo na vana vakwe na mitugo zyakwe?

¹³ Yesu witavukaga, umuwila, Homwene alinwa ku minzi

¹⁴ genaya akukolwa nota hangi; alisi homwene akunwa ku minzi genayo nene nkumupa, mwenuyu kukolwa ngʼo nota hangi kusika hanahana, sumbwa minzi hogene nkumupa gakuvi muwakwe kasela ka minzi hogene galisela kusika ha vuzuvuku wa hanahana.

¹⁵ Mukima wamuwilaga, Guku, umpe minzi genaya ndeke kukolwa nota ninga kwiza hangi henaha kudaha.

¹⁶ Yesu wamuwilaga, Jaga, ukamwitane mugosi wako na usyoke. Mukima witavukaga, uhaya, Nkavile na mugosi.

¹⁷ Yesu wamuwilaga, Veve wayombaga sisoga,

¹⁸ Nkavile na mugosi; kwisi wavagi na vagosi vatano, na uyu uli nawe kitale mugosi wako; henaha wayombaga yalole.

¹⁹ Mukima wamuwilaga, Guku, ndivona ati uli mufumbuzi.

²⁰ Vahenga viswe vamwisengage Mulungu ku lugulu lwenulu, na inwe muliyomba ati mu Yerusalema henaho yatudima kwisenga.

²¹ Yesu wamuwilaga, Mukima, usanizye ati itungo liliza aho mukumwisenga Vava, ngʼo ku lugulu lwenulu ninga ngʼo mu Yerusalema.

²² Inwe muligisenga genayo mukagamanikizye; iswe tuligisenga genayo tuligamanicha, kwisi vupizya vulifuma ku Vayahudi.

²³ Alisi itungo liliza, ahene liliho lelo, aho avo valiwisenga loleyene vakumwisenga Vava mugati na Roho na hanayene, kwisi Vava alivakova visengi va mutindo ugo.

²⁴ Mulungu ali Roho, na venavo valimwisenga vamwisenge mu Roho na hanayene.

²⁵ Mukima wamuwilaga, Ndimanicha ati Mesiya aliza, homwene alitanwa Kristo; ulu mwenuyu wamalaga kwiza akutupozezya gose genaya.

²⁶ Yesu wamuwilaga, Nene ndi mwenuyu homwene aliyomba naʼho. Na itungo lyenili vahemba vakwe vizaga na.

²⁷ vakumaja kunguno wavagi aliyomba na mukima; alisi kuduhu umo wayombaga, Ulikovaki? ninga, Kuki

²⁸ uliyomba nawe? Haho mukima wagulekaga muzoga gwakwe na wingilaga mu kaya na alivawila vanhu,

²⁹ Nzugi, mumulole munhu homwene wambwilaga gose

³⁰ genayo nene nitaga, imba ali Kristo. Na avo vafumaga mu kaya na vizaga kuwakwe.

³¹ Alisi henaho hambele vahemba vamulombaga, vuhaya, Rabi, ulye!

³² Nawe wavawilaga, Ndi nacho chakulya hochene mukakimanikizye.

³³ Na vahemba vakwe vayombaga hamohene,

³⁴ Imba nani wamuletelaga chakulya? Yesu wavawilaga, Cheniki kili chakulya chane nakimazye kikowa na mwenuyu wantumizaja na nayimalizye milimo yakwe.

³⁵ Mukavile kuyomba, Yasigalaga myezi inne, haho kuliza kwimbula? Lolagi, ndimuwila inwe, musanukage minso ginwe na muyilolele migunda ati yavile tayari ya pe mu kwimbulwa.

³⁶ Mwimbuzi aligwanukula musyahala na alikuminga fisumo ku vuzuvuku wa hanahana, kigele vose vadehe hamohene, muvivi na mwimbuzi.

³⁷ Kwisi mwenumo muhayo guli

³⁸ gwa lole ati, Umo aliviva na ungi aliwimbula. Nene namutumizaja inwe kwimbula henaho mukatumamile milimo; vangi vatumamaga, ninwe mwingilaga mu milimo yavo.

³⁹ Alisi Vasamaria vingi va mukaya yeniyo vamusanizaja kunguno ya muhayo gwa mukima homwene wasangilagwa, Mwenuyu wambwilaga gose genayo nitaga.

⁴⁰ Na aho Vasamaria vizaga kuwakwe vamulombaga ikale hawavo, nawe wadilagako nsiku ivili.

⁴¹ Na vangi vingi vasanizaja lelo muno kunguno ya mihayo yakwe,

⁴² na vamuwilaga mukima, Tukavile kusanizya hangi kunguno ya mihayo yako, kwisi iswe venekili twigagwa na tulimanicha ati mwenuyu loleyene ali Mupizya wa liwelelo.

⁴³ Hanuma na nsiku zyenizi ivili wakufumagako na wajaga ku Galilaya.

⁴⁴ Kwisi Yesu mwenekili wasangilagwa ati, mufumbuzi akavile nʼisima mu kaya yakwe mwenekili.

⁴⁵ Na aho wafikaga ku Galilaya, Vagalilaya vamwanukulaga kunguno vagavonaga gose genayo witaga mu Yerusalema ha sikukulu, kwisi navo vene vasikaga ku sikukulu.

⁴⁶ Haho wizaga hangi mu Kana mu Galilaya uko wagapilulile minzi kuvi mvinyo. Alisi wavagimo munikulu muhanya mu Kapernaumu, mwana wakwe wavagi musatu.

⁴⁷ Aho mwenuyu wigagwa ati Yesu wafumaga ku Uyahudi na wizaga mu Galilaya, wajaga kuwakwe na wamulombaga ike na amupizye mwana wakwe, kwisi wavagi bihi na kufwa.

⁴⁸ Haho Yesu wamuwilaga, Ulu inwe mukagawine malumeho na migaka mukavile kusanizya.

⁴⁹ Munikulu alimuwila, Guku, ikaga aho mwana wane atali kufwa.

⁵⁰ Yesu wamuwilaga, Jaga, mwana wako alizuvuka. Na munhu uyu wagusanizaja muhayo gwenugo Yesu wamuwilaga na wajaga.

⁵¹ Aho atali aliwika, vakumba vakwe vasangaja nawe na vamupozezaja ati mwana wakwe alizuvuka.

⁵² Nawe wavavuzaja itungo ki wavukizaja kupila.

⁵³ Navo vamuwilaga, Igolo saa saba homa yamulekulaga. Haho ise wamanikaja ati lyavagi hitungo lyenilo Yesu wamuwilaga, Mwana wako alizuvuka.

⁵⁴ Na gwenugo gwavagi mugaka gwa vuvili hogwene Yesu wavezaja, aho wafumaga ku Uyahudi kuja ku Galilaya.