Yohana 3 - Nyamwezi New Testament 1951

¹ Wavagiho munhu umo wa Vafarisayo, lina lyakwe

² Nikodemo, muhanya wa Vayahudi; mwenuyu wizaga kumwa Yesu ha vuziku na wamuwilaga, Rabi, tulimanicha ati uli muhembeki wafumile kumwa Mulungu, kwisi kuduhu munhu alikovola kuvezya migaka yeniyi veve ulivezya, ulu Mulungu akavile hamohene nawe.

³ Yesu witavukaga, umuwila, Yalole, yalole ndikuwila veve, ulu munhu akavyalilwe hangi akakovolile kuvuvona vutemi wa Mulungu.

⁴ Nikodemo wamuwilaga, Lumehoki munhu alikovola kuvyalwa hangi ulu ali munamhala? Alikovola kwingila hangi mu nda yamwa

⁵ nina na kuvyalwa? Yesu witavukaga, Yalole, yalole ndikuwila veve, ulu munhu akavyalilwe na minzi na Roho akakovolile kwingila mu vutemi wa Mulungu.

⁶ Cheniki chavyalilwe na muvili kili muvili, na cheniki chavyalilwe na Roho kili Roho.

⁷ Ukakumye ngʼo kunguno nakuwilaga ati kolaga muvyalwe hangi.

⁸ Muyaga gulilulumila uko gulikova na ulikwigwa kululumila kwago, alisi ukamanikizye uko gulifuma na uko gulija;

⁹ sisyo mwenuyo wavyalilwe na Roho. Nikodemo witavukaga, umuwila, Na lumehoki genaya galikovola kukwila?

¹⁰ Yesu witavukaga, umuwila, Veve uli muhembeki wa Israeli na ukamanikizye genaya?

¹¹ Yalole, yalole ndikuwila veve, tuliyomba genayo tuligamanicha na tuligasangilwa genayo twagawine, na vusangilwa wiswe mukavile kuwanukula.

¹² Ulu ndimuwila inwe genaya ga liwelelo na mukasanizizye, lumehoki mukusanizya, ulu ndimuwila genaya ga mwilunde?

¹³ Na kuduhu umo walinile kwilunde, sumbwa mwenuyo wikile kufuma kwilunde, Mwana wa Munhu, homwene alimo mwilunde.

¹⁴ Na kitisi Mose wayisungaga nzoka mwibalangu,

¹⁵ sisyo sisyene Mwana wa Munhu asungwe, kigele homwene alimusanizya apiwe vuzuvuku wa hanahana.

¹⁶ Kwisi sisyo Mulungu walitogilwe liwelelo ati wamupanaga Mwana wakwe umo inene, kigele homwene alimusanizya aleke kuzimila, sumbwa apiwe vuzuvuku wa hanahana.

¹⁷ Kwisi Mulungu akamutumizizye Mwana wakwe mu liwelelo kigele ateme kitanga liwelelo, sumbwa kigele liwelelo lipiziwe mugati nawe.

¹⁸ Homwene alimusanizya kutemelwa ngʼo kitanga, na homwene akavile kusanizya wamalile kutemelwa kitanga, kunguno akalisanizizye lina lya Mwana umo inene wa Mulungu.

¹⁹ Na cheniki kili kitanga: mwanga gwafikile mu liwelelo, alisi vanhu vayitogagwa giti kukila mwanga, kwisi milimo yavo yavagi mivi.

²⁰ Kwisi homwene alita tuvi aligugaya mwanga na akavile kwegela ha mwanga, kwigela ngʼo milimo yakwe yihilimilwe.

²¹ Alisi homwene alimazya hanayene uwegela ha mwanga, kigele milimo yakwe yifumbulwe ati yitilwe mugati na Mulungu.

²² Hanuma na genaya Yesu na vahemba vakwe vajaga ku nsi ya Uyahudi, na kwenuko wikalaga hamohene navo na wogaja.

²³ Na Yohana nawe wogaja mu Enoni bihi na Salim, kunguno minzi mingi gavagiko, na vanhu vegelagaho na vogivagwa.

²⁴ Kwisi Yohana wavagi atali kutulwa mu jela.

²⁵ Na lwanilo lwavukaga mugati na vahemba vamwa Yohana na Muyahudi kunguno ya kwikalava.

²⁶ Na vizaga kumwa Yohana na vamuwilaga, Rabi, uyo homwene wavagiho hawako kumwambu na Yordani kunguno yakwe veve wasangilagwa, lolaga, aliwoja na vose valija kuwakwe.

²⁷ Yohana witavukaga, uhaya, Munhu akakovolile kusola kinhu hochene akapivilwe kufuma kwilunde.

²⁸ Inwe venekili mwasangilagwa, hawane ati nayombaga, Nene nkavile Kristo, sumbwa natumizivilwe hambele nawe.

²⁹ Homwene ali nawe mutolwa ali mutozi, alisi munwani wa mutozi homwene aliwimaho, aligudehela na kudeha muzwi gwa mutozi; syenisyo kudeha kwane kwenuku kokalile pa.

³⁰ Yamudima uyu akule isima, alisi nene nadohe isima.

³¹ Uyu alifuma mwigulya ali kwigulya na vose; uyu alifuma ku liwelelo ali wa liwelelo na aliyomba ga liwelelo.

³² Uyu alifuma mwigulya ali kwigulya na vose; na alisangilwaho genayo wawine na wigilwe, na kuduhu umo aliwanukula vusangilwaho wakwe.

³³ Homwene wawanukulaga vusangilwaho wakwe, wazumaja vuliko ati Mulungu ali wa lole.

³⁴ Kwisi mwenuyu Mulungu wamutumizaja aliyomba mihayo ya Mulungu, kwisi Mulungu akavile kupana Roho mugati na fipimo.

³⁵ Vava alimutogwa Mwana na wagatulaga gose mu makono gakwe.

³⁶ Homwene alimusanizya Mwana ali na vuzuvuku wa hanahana; alisi homwene akamudonhokile Mwana kuvuvona ngʼo vuzuvuku, sumbwa kisila cha Mulungu kikumwikalila.