Yohana 20 - Nyamwezi New Testament 1951

¹ Na lusiku lwa mbele lwa yuma Maria Magdalena aliza handiyu ku kivimbi hatali hapi, na alivona iwe lingivilwe ku kivimbi.

² Haho alipela na aliza kumwa Simoni Petro na ku muhemba ungi, mwenuyo Yesu wamutogilwe, na alivawila, Vamwingaja Guku mu kivimbi na tukamanikizye uko vamutulaga.

³ Haho Petro wafumaga na muhemba mwenuyo ungi na vajaga ku kivimbi.

⁴ Na avo vavili vapelaga hamohene, na muhemba mwenuyo ungi wapelaga wangu kukila Petro

⁵ na wafikaga hambele ha kivimbi; na aho wakundamaga

⁶ wayivonaga sanda yitulilwe, alisi akingilile. Haho Simoni Petro aliza amulondile uyo, na wingilaga mu

⁷ kivimbi na wayivonaga sanda yitulilwe, na kitambala icho chavage ku mutwe gwakwe, kikatulilwe hamohene na sanda, sumbwa kigondilwe na kitulilwe heke hamhelo.

⁸ Haho muhemba ungi mwene, uyo wafikaga hambele ha kivimbi, nawe wingilaga na wavonaga na wasanizaja.

⁹ Kwisi vavagi vatali kumanicha vutone

¹⁰ ati, yamudima mwenuyu ahembuke. Haho vahemba vasyokaga hangi ku kaya.

¹¹ Alisi Maria wimaga hanze ha kivimbi alilila; aho wavagi atali alilila wakundamaga mu kivimbi,

¹² na wavavonaga vamalaika vavili vazwalile myenda ya pe, vikalile umo ha mutwe na ungi ha magulu henaho muvili gwamwa Yesu gwavage gulalile.

¹³ Avo valimuwila, Mukima, kuki ulilila? Alivawila, Vamwingaja Guku wane, na nkamanikizye uko vamutulaga.

¹⁴ Aho wamalaga kuyomba genaya wikevelaga na wamuvonaga Yesu imile, na akamanikizye ati uyu ali Yesu.

¹⁵ Yesu alimuwila, Mukima, kuki ulilila? Ulimukova nani? Uyu wiganikaga ati mwenuyu ali mulindilizi wa bustani, na alimuwila, Guku, ulu veve wamwingaja umbwile uko

¹⁶ wamutulaga, na nene nkumusola. Yesu alimuwila, Maria! Uyu wikevelaga na alimuwila, Rabuni, nguno

¹⁷ yayo, Muhembeki. Yesu alimuwila, Uleke kunkumya nene, kwisi ntali kulina kumwa Vava wane na Vava winwe, kumwa Mulungu wane na Mulungu winwe.

¹⁸ Maria Magdalena alija na alivapozezya vahemba ati wamuvonaga Guku, na kitisi wawilagwa nawe genaya.

¹⁹ Ha mhindi ya lusiku lwenulo lwa mbele lwa yuma, aho mizigo zyalugalilwe mwenumo vahemba vikalile kunguno vavogohaga Vayahudi, Yesu wizaga na wimaga hagati na alivawila, Kuhola kuve hamohene

²⁰ ninwe! Na aho wamalaga kuyomba genaya, wavolekaja makono na luvazu. Haho vahemba vadehaga aho vamuvonaga Guku.

²¹ Haho Yesu wavawilaga hangi, Kuhola kuve hamohene ninwe! Kitisi Vava wantumizaja nene, sisyo nene mwene ndimutumizya inwe.

²² Aho wayombaga genaya, wavafulilaga na alivawila, Muyanukule Roho Nsondo.

²³ Ulu inwe mulimutondola umo mavukenaguzi, mwenuyu watondolilwe genaya; ulu inwe mulimutungila umo, mwenuyu watungilililwe genaya.

²⁴ Alisi Toma, umo wa ikumi na vavili, homwene alitanwa Mavasa, wavagi akavileho hamohene navo aho Yesu wizaga.

²⁵ Haho vahemba vangi vamuwilaga, Twamuvonaga Guku. Nawe wavawilaga, Ulu nene nkavuwine vudule wa misomali mu makono gakwe na nkatulile lyala lyane mu vudule wa misomali na nkatulile kukono kwane mu luvazu lwakwe, nene kusanizya ngʼo na hado ngʼo. Hanuma na nsiku mnane vahemba vakwe vavagi mwenumo na Toma hamohene navo.

²⁶ Yesu aliza aho mizigo zyalugalilwe na wimaga hagati navo, uhaya,

²⁷ Kuhola kuve hamohene ninwe! Haho alimuwila Toma, Ulete lyala lyako henaha na ulole makono gane, na ulete kukono kwako na ukutule mu luvazu lwane, na

²⁸ uleke kuvi wʼivengwe, sumbwa usanizye. Toma witavukaga na wamuwilaga, Guku wane na Mulungu wane!

²⁹ Yesu alimuwila, Kunguno veve wambonaga wasanizaja; velukilwa venava valisanizya nulu vakawine.

³⁰ Na Yesu witaga migaka mingi hambele na vahemba vakwe hoyene yikatonilwe mu kitabu cheniki.

³¹ Alisi genaya gatonilwe kigele musanizye ati Yesu ali Kristo, Mwana wa Mulungu, na kigele mugati na kusanizya, muve navo vuzuvuku mugati na lina lyakwe.