Yohana 19 - Nyamwezi New Testament 1951

¹ Haho Pilato wamusolaga Yesu na wamutulaga milanga.

² Na valugaluga vayigovengʼhanaja ngala ya mingʼhwa na vayitulaga ku mutwe gwakwe na vamuzwikaga mwenda gwa za, na vizaga kuwakwe, vuhaya,

³ Tulikugisya veve mutemi wa Vayahudi, na vamutulaga mapi.

⁴ Hangi Pilato wafumaga hanze na alivawila, Lolagi, nene ndimufumya uyu hawinwe kigele mumaniche ati, nene nkaguwine musango gumo kuwakwe.

⁵ Haho Yesu wafumaga hanze azwalile ngala ya mingʼhwa na mwenda gwa za; na Pilato alivawila, Lolagi munhu

⁶ uyu! Aho vahozya vahanya na vakumba vamuvonaga, vahamukaga muno, Umukomele, umukomele ku musigiti! Pilato alivawila, Inwe mumusole na mumukomele ku musigiti, kwisi nene nkaguwine musango kuwakwe.

⁷ Vayahudi vamwitavukaga, Tuli nayo ngʼhama, na hanuma na ngʼhama yeniyi yilimudima uyu afwe, kunguno wivezaja mwenekili kuvi mwana wa Mulungu.

⁸ Aho Pilato wagwigagwa muhayo gwenugu wogohaga munogwene,

⁹ wingilaga hangi mu numba ya Serikali na alimuwila Yesu, Veve wafumile kuhe?

¹⁰ Alisi Yesu akamwitavukile muhayo. Pilato alimuwila, Veve ukavile kuyomba na nene? Ukamanikizye ati ndi na vukovozi wa kukutungula na vukovozi wa kukukomela?

¹¹ Yesu witavukaga, Veve ukavile na vukovozi kwigulya na nene ulu mbe vukapanilwe kuwako kufuma kwigulya; kunguno yeniyi mwenuyo homwene wanfumaja nene kuwako ali na vukenaguzi vuhanya kukila veve.

¹² Kufuma henaho Pilato wakovaga kumutungula, alisi Vayahudi vahamukaga muno, vuhaya, Ulu veve ulimutungula mwenuyu ukavile munwani wa Kaisari; homwene aliwivezya mwenekili kuvi mutemi alimwikana Kaisari.

¹³ Aho Pilato wigagwa mihayo yeniyi wamufumaja Yesu hanze na wikalaga kwisumbi lya kitanga henaho hitanilwe, Ivalazya

¹⁴ lya mawe, na mu kiebrania, Gabata. Na lwavagi lusiku lwa kwivezelezya ha Pasaka, mwitungo lya saa sita. Na alivawila Vayahudi, Lolagi mutemi winwe!

¹⁵ Navo vahamukaga muno, Umwinje, umwinje! umukomele ku musigiti! Pilato alivawila, Mutemi winwe namukomele ku musigiti? Vahozya vahanya vitavukaga, Tukavile na mutemi sumbwa Kaisari duhu.

¹⁶ Haho wamufumaja mu makono gavo, kigele akomelwe ku musigiti.

¹⁷ Haho vamusolaga Yesu, nawe widwikaga mwenekili musigiti gwakwe na wajaga henaho hitanilwe Hakapanga,

¹⁸ hohene halitanwa mu kiebrania Golgata; henaho vamukomelaga ku musigiti na hamohene nawe

¹⁹ vangi vavili, kunu na kunu na Yesu hagati. Alisi Pilato walutonaga lumanyilo na walukomaga ku musigiti, na lutonilwe giki, Yesu muna Nazareti, mutemi wa Vayahudi.

²⁰ Na Vayahudi vingi valusomaga lumanyilo lwenulu, kunguno henaho Yesu wakomelilwe havagi bihi na kaya; lutonilwe mu kiebrania na kiroma na kigriki.

²¹ Haho vahozya vahanya na Vayahudi vamuwilaga Pilato, Uleke kutona, Mutemi wa Vayahudi, sumbwa kitisi wayombaga, Ndi mutemi wa Vayahudi.

²² Pilato witavukaga, Hogene nagatonaga, nagatonaga.

²³ Aho valugaluga vamukomelaga Yesu ku musigiti, vayisolaga myenda yakwe na vavezaja mafungu anne, homwene mulugaluga na ifungu lyakwe, nayo nhanzo yene. Alisi nhanzo yavagi yikasumilwe, sumbwa kufuma higulya yitalazivilwe vuliko.

²⁴ Haho vayombaga hamohene, Tuleke kuyitandula yeniyi, sumbwa twese kavale kunguno yayo, tumaniche yive yamwa nani; kigele vutone vufikile, Vagavanaga myenda yane na vesaga kavale kunguno ya kizwalo chane. Na valugaluga vitaga syenisyo.

²⁵ Na bihi na musigiti gwamwa Yesu vimaga nina na muduguye wamwa

²⁶ nina, Maria wa Klopa na Maria Magdalena. Aho Yesu wamuvonaga nina na muhemba mwenuyo amutogilwe vimile bihi, wamuwilaga nina, Mayu, lolaga

²⁷ mwana wako! Haho wamuwilaga muhemba uyo, Lolaga noko! Na kufuma itungo lyenilo muhemba wamwanukulaga mu numba yakwe.

²⁸ Hanuma na genaya aho Yesu wamanikaja ati gose gamalile kumaziwa, kigele vutone vufikile, wayombaga, Ndikolwa nota.

²⁹ Na kiseme chokalile na siki chavagiho, na valitulaga ibuhyo lyokalile na siki kwisununu na valifilaga ku mulomo gwakwe.

³⁰ Aho Yesu wayisolaga siki wayombaga, Yamalaho, na watunaja mutwe na wadahaja moyo.

³¹ Kunguno lwavagi lusiku lwa kwivezelezya Vayahudi vamulombaga Pilato magulu gavo gavinzwe na vingiwe, kwigela ngʼo mivili yidile ku musigiti ha sabato, kwisi sabato yeniyi yavagi nhanya.

³² Haho valugaluga vizaga na vagavinzaga magulu ga wa mbele na wa vuvili ga venavo vakomelilwe nawe ku musigiti.

³³ Alisi aho vafikaga kumwa Yesu vavonaga ati mwenuyu wamalaga kufwa, na vakagavinzile magulu gakwe;

³⁴ alisi umo wa valugaluga wamukimaga nʼikimu mu

³⁵ luvazu, na itungo lili magazi na minzi gafumaga. Na mwenuyu wayivonaga yeniyi wasangilagwa ati aliyomba loleyene,

³⁶ kigele inwe musanizye. Alisi yeniyi yakwilaga, kigele vutone vufikile, Kuduhu iguha livinzwe ha mwenuyu.

³⁷ Na hangi vutone vungi vuliyomba, Vakumwilolela mwenuyo vamukimaga.

³⁸ Hanuma na genaya Yosefu muna Arimatia, homwene wavagi muhemba wamwa Yesu, alisi mu lwiviso kunguno wavogohaga Vayahudi, wamulombaga Pilato luhusa kugwinja muvili gwamwa Yesu; na Pilato wamupaga luhusa; haho wizaga na wagwingaja muvili gwakwe.

³⁹ Na Nikodemo, uyo wizaga hamwa Yesu hambele na mbele ha vuziku, nawe wizaga na waletaga manemane yisangilizivilwe na uvumba kusika ratli igana.

⁴⁰ Haho vagusolaga muvili gumwa Yesu na vaguvimbilaga mu sanda hamohene na mamigazu, kitisi kili kitilwe cha Vayahudi mu kuzika.

⁴¹ Na henaho wakomelilwe yavagiho bustani na mugati nayo kivimbi kipya, na mwenumo munhu atali kulalikiziwa.

⁴² Na kunguno ya lusiku lwa kwivezelezya kwa Vayahudi vamulalikizaja mwenumo, kwisi kivimbi chavagi bihi.