Yohana 15 - Nyamwezi New Testament 1951

¹ Nene ndi muzabibu gwa loleyene na Vava ali muhambi.

² Kila itambi hawane holyene kufyambya ngʼo fisumo alilinja lyenili; na kila itambi holyene lilifyambya fisumo alilipyagulila, kigele lifyambye fisumo fingi.

³ Inwe mwamalaga kwela kunguno ya muhayo hogwene namuwilile inwe; mudile mugati na nene, nane mugati ninwe.

⁴ Kitisi itambi likakovolile kufyambya fisumo kulyo lyenekili, ulu likadilile ku muzabibu, sisyo inwe vene ulu mukavile kudila mugati na nene.

⁵ Nene ndi muzabibu, inwe muli matambi. Homwene alidilamo mugati na nene, nane mugati nawe, mwenuyu alifyambya fisumo fingi, kwisi vuduhu na nene mukakovolile kuvezya kinhu.

⁶ Ulu umo akavile kudilamo mugati na nene, utagilwa hanze kitisi itambi, lyunyala, na valigakuminga na valigatagila mu moto, gupya.

⁷ Ulu inwe mulidilamo mugati na nene, na mihayo yane yilidilamo muwinwe, haho mulombe icho mulikova na mukupiwa.

⁸ Mwenumo Vava alikumukiwa ulu inwe mulifyambya fisumo fingi, na syenisyo mukuvi vahemba vane.

⁹ Kitisi Vava wantogagwa, sisyo sisyene ndimutogwa inwe, mudile mugati na kutogwa kwane.

¹⁰ Ulu muliyilindila mikumo yane, haho mukudilamo mu kutogwa kwane, kitisi nene mwene nayilindilaga mikumo yamwa Vava na ndidilamo mu kutogwa kwakwe.

¹¹ Genaya namuwilile inwe, kigele kudeha kwane kuvemo muwinwe na kudeha kwinwe kukwile.

¹² Gwenugu guli mukumo gwane: inwe mwitogwe hamohene, kitisi namutogilwe inwe.

¹³ Kuduhu umo ali nako kutogwa kuhanya kukila kwenuku ayifumye myuye yakwe kunguno ya vanwani vakwe.

¹⁴ Inwe muli vanwani vane, ulu mulivezya kitisi ndimulagila.

¹⁵ Nkavile kumwitana inwe hangi vakumba, kwisi mukumba akamanikizye chenicho gukuye alita; inwe namwitanaga vanwani kunguno namutanizaja inwe gose genayo nigagwa kumwa Vava.

¹⁶ Inwe mukansogolile nene, sumbwa nene namusogolile inwe, na namutulaga inwe, kigele muje na mufyambye fisumo, na fisumo finwe fidile, kigele chenicho mulamulombe Vava mu lina lyane uyu amupe inwe.

¹⁷ Yeniyi ndimulagila inwe, Mwitogwe hamohene.

¹⁸ Ulu liwelelo lilimugaya inwe, mumaniche ati lyandaja kungaya nene.

¹⁹ Ulu inwe mwavagi va liwelelo, mbe liwelelo lyakitogilwe chalyo chene; alisi kunguno mukavile va liwelelo, sumbwa namusogolile inwe kufuma ku liwelelo, kunguno yeniyi liwelelo lilimugaya inwe.

²⁰ Mugwizukile muhayo gwenugo namuwilile inwe, Mukumba akavile muhanya kukila gukuye.

²¹ Ulu vampezaja nene vakumupezya ninwe; ulu vagulindilaga muhayo gwane vakugulindila muhayo gwinwe gwene. Gose genaya vakumwitila inwe kunguno ya lina lyane, kwisi vakamumanikizye uyo wantumizaja nene.

²² Ulu mbe nkizile na nkayombile navo mbe vavagi vakavile na vukenaguzi; alisi lelo vakavile na muhayo gwa kwivula kunguno ya vukenaguzi wavo.

²³ Homwene alingaya nene alimugaya na Vava mwene.

²⁴ Ulu mbe nkayivezizye milimo mugati navo hoyene kuduhu ungi wavezaja, mbe vavagi vakavile navo vukenaguzi; alisi lelo vawine na vatugayile, nene na Vava mwene.

²⁵ Sisyo muhayo gufikile hogwene gutonilwe mu ngʼhama yavo ati, Vangayaga nene vuduhu nguno.

²⁶ Alisi ulu Mugwasya wiza homwene nkumutumizya kufuma kumwa Vava, Roho ya hanayene, homwene alifuma kumwa Vava, mwenuyu akusangilwaho kunguno ya nene;

²⁷ na inwe vene muli vasangilwaho, kunguno mwavagi hamohene na nene kufuma mbuki.