Yohana 12 - Nyamwezi New Testament 1951

¹ Nsiku mkaga hambele na Pasaka Yesu wizaga ku Betania uko wavagiko Lazaro homwene wamuhembukaja ku lufu.

² Haho vamuvezezaja chakulya cha mhindi kwenuko na Marta wavavonekaja, na Lazaro wavagi umo mugati na venavo vikalaga hamohene nawe hakulila.

³ Na Maria wasolaga ratli yimo ya maguta masoga muno ga narada, na ga mupango muhanya, na wagavilaga magulu gamwa Yesu na wagapyagulilizaja magulu gakwe na nzwili zyakwe; na numba yokalaga na vumotu wa maguta.

⁴ Alisi Yudasi Iskariote, umo wa vahemba vakwe, homwene alamugambe, wayombaga,

⁵ Kuki maguta genaya gakaguzivilwe ku denari magana

⁶ adatu na kuvapa vapina? Alisi akayombile genaya kunguno wavalavagwa vapina, sumbwa kunguno wavagi mwivi, na kunguno wagusombaga mufuko gwa mapesa na wivaga ku genayo gatulilwemo.

⁷ Yesu wayombaga, Umuleke, kigele agatule ku lusiku lwa kuzikwa kwane.

⁸ Kwisi vapina muli navo hanahana, alisi mukavile na nene hanahana.

⁹ Haho mbuto nhanya ya Vayahudi vamanikaja, ati aliko vizaga, ngʼo kunguno yamwa Yesu duhu, sumbwa kigele vamuvone Lazaro homwene wamuhembukaja ku lufu.

¹⁰ Na vahozya vahanya valomaga ndaka ya kumuvulaga Lazaro mwene,

¹¹ kunguno Vayahudi vingi vajagako kunguno yakwe na vamusanizaja.

¹² Hawangaluke aho mbuto nhanya ya vanhu hovene vizile ku sikukulu vigagwa ati Yesu izile ku Yerusalema,

¹³ vagasolaga matambi ga mitende na vafumaga kumusanganila na vahamukaga, Hosana, adosiwe luvango homwene aliza mu lina lya Guku, mutemi wa Israeli.

¹⁴ Alisi Yesu wakavonaga kana ka mpunda na wikalaga

¹⁵ kwigulya nako, kitisi yitonilwe, Ukogohe ngʼo mwanike wa Sioni, lolaga mutemi wako alizaho adamilile ku kana ka mpunda.

¹⁶ Genaya vahemba vakwe vavagi vakamanikizye hambele; alisi aho Yesu wakumukivagwa vizukilaga ati genaya gatonilwe kunguno yakwe, na ati vamuvezezaja genaya.

¹⁷ Haho mbuto ya vanhu hovene vavage hamohene nawe aho wamwitanile Lazaro afume mu kivimbi na wamuhembukaja, vasangilagwa kunguno yakwe.

¹⁸ Kunguno yeniyi vanhu vingi vajaga kumusanganila kunguno vigagwa ati waguvezaja mugaka gwenugu.

¹⁹ Haho Vafarisayo vayombaga hamohene, Mwavona! mukavile kugada kinhu, lolagi, va liwelelo lyose valimulonda.

²⁰ Alisi mugati na venavo hovene valinile kwisenga ha sikukulu vavagi Vagriki vamo.

²¹ Venavo vajaga kumwa Filipo, muna Betsaida ya Galilaya, na vamulombaga, vuhaya, Guku, iswe tulikova kumuvona Yesu.

²² Filipo wajaga kukamuwila Andrea, na Andrea na Filipo vajaga kukamuwila Yesu.

²³ Yesu wavitavukaga, uhaya, Itungo lyafikile Mwana wa Munhu akumukiwe.

²⁴ Yalole, yalole ndimuwila inwe, ulu mbiyu ya ngano yikagwilile mu vulongo na yikafwile yilidila yenekili yinene, alisi ulu yilifwa yilifyambya fisumo fingi.

²⁵ Homwene aliyitogwa myuye yakwe aliyizimizya, na homwene aliyigaya myuye yakwe mu liwelelo lyenili akuyilindila kusika ha vuzuvuku wa hanahana.

²⁶ Ulu umo alintumamila andonde, na uko nene ndiko kwenuko kwene mutumami wane akuviko; na ulu umo alintumamila nene,

²⁷ Vava akumukuzya mwenuyu. Lelo myuye yane yilitingina, na nayombe kinahe? Vava undindile hambele na itungo lyenili?

²⁸ Alisi kunguno yeniyi nafikile hʼitungo lyenili. Vava, ulikumuche lina lyako! Haho muzwi gwizaga kufuma ilunde, Nalikumukaja na nkulikumucha hangi.

²⁹ Aho vanhu vingi hovene vimile bihi vayigagwa, vayombaga, Yagilima, vangi vayombaga, Malaika wayombaga nawe.

³⁰ Yesu witavukaga, uhaya, Muzwi gwenugu gukizile kunguno yane, sumbwa kunguno yinwe.

³¹ Lelo vuyangulwa wa liwelelo lyenili vuliho, lelo mutwale wa liwelelo lyenili akutagilwa hanze.

³² Na nene ulu ndasungwe higulya na nsi ndavadute vose kuwane.

³³ Alisi genaya wayombaga kolecha lufu ki alafwe.

³⁴ Mbuto ya vanhu vamwitavukaga, Iswe twigilwe mu ngʼhama ati Kristo akudilaho kusika hanahana, lumehoki uliyomba ati Mwana wa Munhu asungwe higulya? Nani mwenuyu

³⁵ Mwana wa Munhu? Yesu wavawilaga, Katungo kado lumole lutali luliho mugati ninwe. Musimizage itungo lyenilo muli nalo lumole, kwigela ngʼo giti yimudime; na homwene alisimiza mu giti akamanikizye uko alija.

³⁶ Itungo lyenili muli nalo lumole mulusanizye lumole, kigele muve vana va lumole. Genaya Yesu wayombaga na wajaga na wivisaga hambele navo.

³⁷ Alisi nulu wayivezaja migaka mingi hambele navo

³⁸ vakamusanizizye, kigele muhayo gwa mufumbuzi Yesaya gwigele hogwene wayombaga, Guku, nani wayisanizaja mhola yiswe, Na kukono kwamwa Guku kwafumbulilwe kumwa nani?

³⁹ Kunguno yeniyi vakakovolile kusanizya, kwisi hangi Yesaya wayombile,

⁴⁰ Wagahofuzizye minso gavo na wagulambizye moyo gwavo, Kwigela ngʼo vavone na minso, na vamaniche na moyo, Na vapiluke moyo, Na nene navapizye.

⁴¹ Genaya Yesaya wayombile kunguno waluvonaga lukumo lwamwa Kristo na wayombaga kunguno yakwe.

⁴² Alisi ahene vingi mugati na vanhu vamusanizizye, alisi kunguno ya Vafarisayo vakazumilizizye, kwigela

⁴³ ngʼo valugalilwe sinagogo; kwisi valutogagwa lukumo lwa vanhu kukila lukumo lwa Mulungu.

⁴⁴ Yesu wahamukaga, uhaya, Homwene alinsanizya nene, akavile kunsanizya nene, sumbwa uyo wantumizizye nene.

⁴⁵ Na homwene alimbona nene, alimuvona uyo wantumizizye.

⁴⁶ Nene nizile mu liwelelo kitisi lumole, kigele uyo alinsanizya aleke kwikala mu giti.

⁴⁷ Na ulu umo aliyigwa mihayo yane na kuyilindila ngʼo, mwenuyu nene kumuyangula ngʼo, kwisi nkizile kuliyangula liwelelo, sumbwa nalipizye liwelelo.

⁴⁸ Homwene alinikana na akavile kuyanukula mihayo yane, ali nawe muyanguzi. Muhayo gwenugo nayombile gulamuyangule ha lusiku lwa mhelo.

⁴⁹ Kwisi nene nkayombile kufuma kuwane, sumbwa Vava homwene wantumizizye wandagilaga genaya nayombe na nahaye. Na ndimanicha ati mukumo gwakwe guli vuzuvuku wa hanahana.

⁵⁰ Sisyo yeniyi ndiyomba, ndihaya kitisi Vava wambwilaga.