Yakobo 5 - Nyamwezi New Testament 1951

¹ Degelekagi inwe vasavi, mulile na musambe kunguno ya mamikosi genaya gakumufikila inwe.

² Nsavo zinwe zyavolile, na myenda yinwe yalivilwe na mbava,

³ dhahabu na fedha zinwe zyakelevile, na vukeleve wazyo vukusangilwaho kuwinwe, na vukulya mivili yinwe kitisi moto. Mwisavilaga nsavo mu nsiku zyenizi zya mhelo.

⁴ Lolagi, musyahala gwenugu gulilila hogwene mwavimaga vatumami hovene vimbulaga migunda yinwe, na kulila kwa vimbuzi kwafikaga ha matwi ga Guku wa mavuto.

⁵ Mwikalaga mu kalya na kanwa mu liwelelo, mwayigutaja myoyo yinwe kitisi ha lusiku lwa kusinza.

⁶ Mwamutemelaga na mwamuvulagaga mugololoku, nawe akavile kwisigita hambele ninwe.

⁷ Haho mulembele mbela, vadugu, kusika kwiza kwamwa Guku. Lolagi, mulimi alifilindila fisumo fya mupango fya mu nsi, na alilembela kunguno yafyo kusika fyapivagwa mbula ya mutuzyo na mbula ya mwanuli.

⁸ Inwe vene mulembele mbela, muyijamilizye myoyo yinwe, kwisi kwiza kwamwa Guku kuli bihi.

⁹ Muleke kwingʼungʼulila ungi ku ungi, vadugu, kwigela ngʼo muyangulwe; lolagi, muyanguzi alima ha muzigo.

¹⁰ Vadugu, mudime mukolani ku vafumbuzi, hovene vayombage mu lina lya Guku, mugati na vuduki na vulembezu.

¹¹ Lolagi, tulivelukizya avo hovene vajamile. Inwe mwigilwe kunguno ya vujamu wamwa Hiyobo, nayo mhelo ya Guku mwayiwine, kwisi Guku ali wa lusungu lwingi na wa kigongo.

¹² Kukila gose gangi, muleke kulahila, ninga ngʼo kwilunde, ninga ngʼo ku nsi, ninga ngʼo mulahi gungi, sumbwa ndiyo yive ndiyo, na byololo yinwe yive byololo, kwigela ngʼo mwingile mu kitanga.

¹³ Ulu umo mugati ninwe aliduka, alombe; ulu umo

¹⁴ alideha, imbe magongozi. Ulu umo mugati ninwe alwalile, avitane vanamhala vʼivilingano vamulombele na vamuvile maguta mu lina lyamwa Guku.

¹⁵ Na kulo mba kwa isanizyo kukumupizya mulwile, na Guku akumugungumula, na ulu witile mavukenaguzi akutondolwa genaya.

¹⁶ Mwizumilizye mavukenaguzi hamohene na mwilombele hamohene, kigele mupiziwe; kulomba kwa mugololoku kuli na nguzu ningi ulu kuli kwa lole.

¹⁷ Elia wavagi munhu wa mutindo gwiswe, nawe wigongelaga mu kulomba mbula yileke kutula, na mbula yikatulile mu nsi myaka idatu na myezi mkaga.

¹⁸ Na walombaga hangi, na ilunde lyatwinaja mbula, na nsi yafyambaja fisumo fyayo.

¹⁹ Vadugu, ulu umo mugati ninwe watagikile kufuma

²⁰ ku hanayene, na ungi alimusyocha hangi, mwenuyu amaniche ati, homwene alimusyocha mukenaguzi kufuma ku nzila ya vuzimile alizipizya myuye zyakwe ku lufu na kugakumba mavukenaguzi mingi.