Yakobo 3 - Nyamwezi New Testament 1951

¹ Vadugu vane, ngʼo vingi mugati ninwe vave vahembeki, kunguno mulimanicha ati iswe tukupiwa vuyangulwa vutimbu muno.

² Kwisi iswe vose tulisumula mugati na mihayo mingi; ulu umo akavile kusumula mugati na kuyomba, mwenuyu ali munhu mukomezu, na alikovola kugutema muvili gose.

³ Ulu tulitula hatamu mu milomo ya farasi, kigele zitudonhoke, haho tuligutonga muvili gose.

⁴ Lolagi, meli zyene nulu zili nhanya na zilifilwa na miyaga ya nguzu, zilibotelwa na sukani ndondo henaho mutongi alikova.

⁵ Sisyo sisyene lulimi luli kivalango kido na luliwikumilizya mihayo mihanya. Lolagi, moto mudo gulilivacha ipolu ihanya.

⁶ Na lulimi luli moto, luli liwelelo lya wigomu mugati na fivalango fiswe; luligwilavuzya muvili gose, na lulivacha moto mu fitundwa fya vuzuvuku guvakivilwe na moto gwa ha mizimu.

⁷ Kwisi fitundwa fyose, ndimu na manoni na maselemi ga munsi na ga munyanza, filitemwa na fyatemilwe na vanhu;

⁸ alisi lulimi kuduhu munhu alikovola kulutema, luli kavi hokene kakavile

⁹ kulembela, lokalile na sumu ya lufu. Mugati nalo tulimukuzya Guku Vava, na mugati nalo tulivafwizila vanhu hovene vatundilwe hʼisumbano lya Mulungu.

¹⁰ Ku mulomo gumo gwene galifuma makuzyo na mafwizilo.

¹¹ Vadugu vane, yikasikile kuvi syenisyo. Kinahe kasela kalifuma minzi masemu na malulu ku luzwilo

¹² lumo? Kinahe, vadugu vane, mukuyu gulikovola kwambya Fisumo fya Maguta, ninga muzabibu makuyu? Ninga kasela ka minzi ka munyu kakakovolile kufumya minzi masemu.

¹³ Nani mugati ninwe ali muvalaganu na wa ngelo? Mwenuyu iyoleche mugati na vusimize vusoga milimo yakwe mu vudekanu wa vuvalaganu.

¹⁴ Alisi ulu muli na ivuva ilulu na wikenya, haho muleke kwikumilizya na kuyomba vulamba kwigulya na hanayene.

¹⁵ Ngelo yeniyi yikavile yeniyo yilifuma kwigulya, sumbwa ya

¹⁶ liwelelo, na ya nsembo ya vunhu, na ya Shetani; kwisi henaho ivuva na wikenya vuliho, henaho hene vuliho vululunganike na milimo mivi.

¹⁷ Alisi ngelo hoyene yilifuma kwigulya mbele na mbele yili nsondo, hangi yili ya kuhola na ya vukondu na ya vudekanu, yokalile kigongo na fisumo fisoga, yikavile na pendelea na vugulugulu.

¹⁸ Alisi kisumo cha vugololoku kiliviwa mu kuhola kwa vafungi va kuhola.