Yakobo 2 - Nyamwezi New Testament 1951

¹ Vadugu vane, isanizyo linwe kumwa Guku wiswe Yesu Kristo mukumuku lileke kuvi na pendelea ku vanhu.

² Kwisi ulu munhu alingila mwivilingo linwe ali nayo pete ya dhahabu na azwalile myenda misoga, alisi mupina mwene aliza azwalile makama, na mulimwikomya uyo azwalile myenda misoga na kumuwila,

³ Wikale henaha hasoga, na mulimuwila uyo mupina,

⁴ Wime kwenuko ninga wikale ha magulu gane, kinahe, yeniyi yikavile kuvezya vulekane mugati ninwe na kolecha ati muli vayanguzi va miganiko mavi?

⁵ Degelekagi vadugu vane vatoneke, kinahe, Mulungu akavasogolile avo valilolwa vapina mu liwelelo vave vasavi mugati nʼisanizyo na vasaliki va vutemi wenuvo, howene wavalaganaja avo valimutogwa?

⁶ Alisi inwe mwamuvinzilaga mupina isima. Kinahe, vakavile vasavi valimugalila na kumuduta inwe ku masumbi ga vuyanguzi?

⁷ Vakavile venavo valilifusa lina lyenilo isoga mwitanilwe nalyo?

⁸ Ahene, ulu muliyimazya ngʼhama ya kitemi kitisi yitonilwe, Umutogwe muzenganwa wako kitisi uliwitogwa veve mwenekili, haho mulivezya sisoga.

⁹ Alisi ulu muli na pendelea ku vanhu, mulivezya vukenaguzi na muliyangulwa na ngʼhama kuvi vasumuzi.

¹⁰ Kwisi homwene alizilindila ngʼhama zyose, alisi aliyikenagula yimo, ali mutondwa wa zyose.

¹¹ Kwisi uyo homwene wayombaga, Uleke kusihya, wayombaga savasava, Uleke kuvulaga. Haho ulu ukavile kusihya, alisi ulivulaga, haho wavile

¹² musumuzi wa ngʼhama. Muyombe na muvezye kitisi venavo vakuyangulwa na ngʼhama ya vunamiko.

¹³ Kwisi vayanguzi vakavile na kisa ku mwenuyo akavonelile kisa; kigongo kilikumucha hambele na vuyanguzi.

¹⁴ Vadugu vane, yilivelelaki ulu munhu aliyomba ati, ali nalyo isanizyo, alisi akavile nayo milimo? Kinahe,

¹⁵ isanizyo lilikovola kumupizya? Ulu mudugu mugosya ninga mukima alizuka na aligayiwa chakulya ku vupanga wakwe,

¹⁶ na umo mugati ninwe alivawila, Muje na kuhola na motele moto na mwigute, alisi mukavile

¹⁷ kuvapa mafundo ga muvili, haho yilivelelaki? Sisyo sisyene isanizyo, ulu likavile na milimo, lili lifwile.

¹⁸ Hamo umo akuyomba, Veve uli nalyo isanizyo, nane ndi nayo milimo. Unoleche isanizyo lyako vuduhu milimo, nane nkukolecha isanizyo lyane mugati na milimo yane.

¹⁹ Veve ulisanizya ati Mulungu ali umo, na mwenumo ulivezya sisoga; migavo yene yiliyisanizya yeniyi na yilidetema.

²⁰ Alisi kinahe, ulikova kumanicha, veve munhu mulele, ati isanizyo vuduhu milimo lili lya gele?

²¹ Kinahe, nsiswe Abrahamu akagololilwe mugati na milimo aho wamutambaga Isaka hakuhozezya?

²² Ulivona ati isanizyo lyatumamaga hamohene na milimo yakwe,

²³ na mugati na milimo isanizyo lyakomelaga, na vutone wafikilaga howene vuhaya, Abrahamu wamusanizaja Mulungu, na yeniyi yasolozivilwe kuwakwe kuvi vugololoku; na, Witanagwa munwani wa Mulungu.

²⁴ Sisyo mulivona ati munhu aligololwa mugati na milimo, ngʼo ku isanizyo duhu.

²⁵ Na sisyo sisyene mulava Rahaba, kinahe uyu nawe akagololilwe mugati na milimo, aho wavanukulaga vatumwa na wavafumaja mu nzila yingi?

²⁶ Kwisi kitisi muvili guli gufwile vuduhu myuye, sisyo sisyene isanizyo vuduhu milimo lili lifwile.