Vukundukule 5 - Nyamwezi New Testament 1951

¹ Na navonaga mu kukono kwa mulila kwa mwenuyo wikalaga kwisumbi kitabu kitonilwe mugati na hibala, kitungilwe na malumanyilo mpungati.

² Na navonaga malaika wa nguzu homwene wahamukaga na kilaka kihanya, Nani asikile isima kukikundukula kitabu na

³ kugatungula malumanyilo gacho? Alisi kuduhu umo mwilunde ninga mu liwelelo ninga hansilili na liwelelo wakovolaga kukikundukula kitabu ninga kukilola mugati.

⁴ Na nalilaga munogwene, kunguno akawinwe umo asikile isima kukikundukula kitabu ninga kukilola mugati.

⁵ Na umo wa venavo vanamhala wambwilaga, Uleke kulila, lolaga, uyo Nsimba wʼigongo lyamwa Yuda, Itina lyamwa Davidi, wakindile kukikundukula kitabu na kugatungula malumanyilo gacho.

⁶ Na navonaga, hagati nʼisumbi na fitundwa ifyo finne na avo vanamhala, Kadilana kimile, kavagi kitisi kasinzilwe, kavagi na mapembe mpungati na minso mpungati, hogene gali izyo roho mpungati Mulungu, hozyene zyatumizivilwe mu liwelelo lyose.

⁷ Haho kegelaga, kakisolaga kitabu ku mulila gwa mwenuyo ikalile kwisumbi.

⁸ Aho kakisolaga kitabu, fitundwa ifyo finne na avo vanamhala makumi avili na vanne vakasukambilaga Kadilana, kila umo alidimile izeze na malyeso ga dhahabu gokalile na mugazu, hogwene guli makulomba ga vasondo.

⁹ Navo vimbaga lwimbo lupya, vuhaya, Veve usikile isima kukidima kitahu na kugatungula malumanyilo gacho, kunguno wasikilwe na wamugulilile Mulungu na magazi gako vanhu va kila igongo na kiyombele na vuvyalwa na va chalo,

¹⁰ naʼho wavavezaja kuvi vutemi na vahozya kumwa Mulunga wiswe, navo vakutema ku liwelelo.

¹¹ Na nalolaga, na nigagwa muzwi gwa vamalaika vingi, valipilimila ilo isumbi na ifyo fitundwa na avo vanamhala, na luvalo lwavo lwavagi fihumbi ikumi ka fihumbi ikumi, na fihumbi ka fihumbi, na vayombaga

¹² na muzwi muhanya, Kadilana kasinzilwe kasikile isima kupiwa nguzu na vusavi na ngelo na vukovozi na isima na ikuzyo na luvango.

¹³ Na nigagwa fitundwa fyose fya mwilunde na fya muliwelelo na fya hansilili na liwelelo na fya mu nyanza na fyose hofyene filimo mugati nayo filiyomba, Mwenuyo alikala kwisumbi na Kadilana vapiwe luvango na isima na lukumo na vukovozi kusika myaka na myaka de.

¹⁴ Na ifyo fitundwa finne fyayombaga, Amen, navo vanamhala vagwaga hasi na vakuvilaga.