Vukundukule 4 - Nyamwezi New Testament 1951

¹ Hanuma na genaya nalolaga, na navonaga muzigo gulugulilwe mwilunde, na muzwi ugo gwa mbele, hogwene nagwigagwa kitisi kalumbete, gwayombaga nane, guhaya, Linaga henaho, nane nkukolecha genayo galakwile kumbele.

² Na itungo lili navagimo mugati na Roho; na lolaga, isumbi lyavagi litulilwe mwilunde, na

³ kwisumbi wikalaga umo; na uyo homwene wikalaga wikolaga iwe lya yaspi na sardio, na itavangwa lyapilimaga isumbi, mu kulilola lyavagi kitisi sumaridi.

⁴ Na masumbi makumi avili na anne galipilimaga isumbi ilo, na ku masumbi genayo vikalaga vanamhala makumi avili na vanne, vazwalile myenda ya pe, na ngala zya dhahabu ku mitwe zyavo.

⁵ Na kwisumbi gafumaga malukuva na filaka na makuhilima, na mafyenge mpungati gavagi galivaka hambele nʼisumbi, hogene gali roho mpungati zya Mulungu.

⁶ Na hambele nʼisumbi yavagiho kitisi nyanza ya ilole kitisi krustalo, na hagati hambele nʼisumbi na ha malwande gʼisumbi fitundwa finne fyokalile na minso kumbele na kunuma.

⁷ Kitundwa cha mbele chayikolaga nsimba; kitundwa cha vuvili chayikolaga nzagamba; kitundwa cha vudatu chavagi na vusyu kitisi munhu; kitundwa cha vunne chalikolaga inanda lililala.

⁸ Na fitundwa fyenifi finne fyose fyavagi na manana mkaga, na ha malwande gose na mugati fyokalile na minso, na vuduhu kuzova, halimi na havuziku, fyayomba, Musondo, Musondo, Musondo, ali Guku Mulungu, Muvezya fyose, homwene wavagiho, na aliho, na akuviho.

⁹ Na ulu fitundwa fyenifyo finne filimukuzya na filimupa isima na filimulumbila mwenuyo alikala kwisumbi,

¹⁰ homwene alizuvuka myaka na myaka de, haho venavo vanamhala makumi avili na vanne valimusukambila uyo alikala kwisumbi na kumukuvila mwenuyo alizuvuka myaka na myaka de, na valizitula ngala zyavo hambele nʼisumbi, vuhaya,

¹¹ Veve wasikile isima, Guku, Mulungu wiswe, kupiwa lukumo nʼikuzyo na vukovozi; kwisi veve wafitundile finhu fyose, na kunguno ya kikowa chako fyavagiho na fyatundilwe.