Vukundukule 21 - Nyamwezi New Testament 1951

¹ Haho nalivonaga ilunde ipya na liwelelo ipya; kwisi ilunde lya mbele na liwelelo lya mbele gavitile, na nyanza yavagi haduhuho.

² Na nayivonaga iyo kaya nsondo, Yerusalema, yilisoka kwilunde kufuma kumwa Mulungu, yivezelezivilwe kitisi mutolwa, homwene wazwikilwe ku mugosi wakwe.

³ Na nagwigagwa muzwi muhanya kufuma kwilunde, gulihaya, Lolaga, ihema lya Mulungu lili mugati na vanhu, nawe akwikala hamohene navo, navo vakuvi vakwe na Mulungu mwenekili akuvi hamohene navo, na akuvi Mulungu wavo,

⁴ na akugapyagula minsozi gose ku minso gavo; na lufu kuviho ngʼo hangi, ninga ngʼo misayo, ninga ngʼo kililo, ninga ngʼo vusatu kuviho hangi; kwisi ga mbele gavitile.

⁵ Na uyo wikalaga kwisumbi wayombaga, Lolaga, ndivezya gose mapya. Wambwilaga, Tonaga, kwisi mihayo yeniyi yili mijamu na ya lole.

⁶ Na wambwilaga, Yamalaga kukwila. Nene ndi Alfa na Omega, mbuki na mhelo. Nene nkumupa mwenuyo ali na nota ku kasela ka minzi ga vuzuvuku cha kisa.

⁷ Homwene alikinda, akugasala genaya, nane nkuvi Mulungu wakwe, nawe akuvi mwana wane.

⁸ Alisi vova na vivengwe na vagaywa na vavulagi na valava na valogi na visenga fimbulimbuli na valamba vose, ifungu lyavo likuvi mu nyanza yilivaka na moto na fibiriti; lwenulu luli lufu lwa vuvili.

⁹ Na umo wa vamalaika, hovene vavagi nafyo fiseme mpungati fyokalile na maluduko ga mhelo, wizaga kuyomba nane, uhaya, Nzugu, nkukolecha mutolwa, mukima wa Kadilana.

¹⁰ Na wanfilaga mu roho ku lugulu luhanya na lulihu, na wanolekaja kaya iyo nsondo,

¹¹ Yerusalema, yilisoka kufuma kumwa Mulungu, yili nalo lukumo lwa Mulungu. Mwanga gwayo gwavagi kitisi gwa iwe ilambu mupango munogwene, kitisi gwa iwe lya yaspi lya kristalo.

¹² Yavagi na lugutu luhanya na lulihu; yavagi na mivita ikumi na ivili, na kwigulya na mivita vamalaika ikumi na vavili, na mina gatonilwe kwigulya nayo, hogene gali mina ga magongo ga vana

¹³ vʼIsraeli: mu kiya mivita idatu, mu sukuma mivita idatu, mu dakama mivita idatu, mu mweli mivita idatu.

¹⁴ Na lugutu lwa kaya lwavagi na mawe ikumi na avili ga musingi, na kwigulya nago mina ga Vatume ikumi na vavili va Kadilana.

¹⁵ Na uyo wayombaga nane wavagi na kipimo, musununu gwa dhahabu, kigele ayipime kaya na mivita yayo na lugutu lwayo.

¹⁶ Na kizengele cha kaya kili cha mapembe anne, na vulihu wayo vuli kitisi vugalihu wayo. Na wayipimaga kaya na ugo musununu stadio fihumbi ikumi na fivili, vulihu na vugalihu na wima wayo vuli savasava.

¹⁷ Na walupimaga lugutu lwayo, mikono igana na makumi anne na inne ku kipimo cha vanhu, hochene kili kipimo cha vamalaika.

¹⁸ Lugutu lwayo lwazengilwe na yaspi, na kaya yazengilwe na dhahabu vuliko, kitisi ilole lya pe.

¹⁹ Misingi ya lugutu lwa kaya yazwikilwe na kila mutindo gwa mawe malambu mupango: musingi gwa mbele gwavagi gwa yaspi, gwa vuvili safiro, gwa vudatu

²⁰ kalkedon, gwa vunne sumaradi, gwa vutano sardoniki, gwa mkaga sardio, gwa mpungati krisolito, gwa mnane berilo, gwa kenda topazio, gwa ikumi krisoparso, gwa ikumi na kamo haukinto, gwa ikumi na tuvili ametisto.

²¹ Na mivita ikumi na ivili yavagi lulu ikumi na ivili, kila muvita lulu yimo; na barabara ya kaya yavagi

²² dhahabu vuliko, kitisi ilole lya pe. Na nkawine isengelo mugati nayo, kwisi Guku Mulungu, Muvezya

²³ fyose, ali isengelo lyayo, na Kadilana. Na kaya yeniyi yikalifundile limi ninga mwezi kuyezya; kwisi lukumo lwa Mulungu luliyezya, na Kadilana kavagi mwanga gwayo.

²⁴ Na va mafyalo vakusimiza mu mwanga, na

²⁵ vatemi va liwelelo vakufilamo lukumo lwavo; na mivita yayo kulugalwa ngʼo halimi; kwisi vuziku kuvimo ngʼo.

²⁶ Na vakufilamo lukumo na isima lya va mafyalo.

²⁷ Na kinhu cha zoma kwingilamo ngʼo ninga ngʼo umo homwene alivezya vuvipya na vulamba; sumbwa avo duhu hovene vatonilwe mu kitabu cha vuzuvuku cha Kadilana.