Vukundukule 2 - Nyamwezi New Testament 1951

¹ Umutonele malaika wʼivilingano lya mu Efeso: Genaya aliyomba mwenuyo aligadima masonda mpungati mu mulila gwakwe, na homwene alisimiza hagati na tala izyo mpungati zya dhahabu.

² Ndiyimanicha milimo yako na migangadiko yako na vujamu wako, na kitisi ukakovolile kwilambilizya na vanhu vavi; hangi wavagemaga venavo valiwiyitana vatume, alisi vakavile venavo, na wavonaga ati vali valamba.

³ Hangi uli navo vujamu na wavukaja vuduki kunguno ya lina lyane vuduhu kuzova.

⁴ Alisi ndi nago muhayo ugu kuwako ati, walekaga kutogwa kwako kwa mbele.

⁵ Kunguno yeniyi wizukile uko walagalako, na upiluke moyo, na uvezye milimo iyo ya mbele; ulu ukavile kuvezya, nkwiza wangu kuwako na kuyinja tala yako ha wikalo wayo, ulu ukavile kupiluka moyo.

⁶ Ahene, uli nago muhayo ugu ati, uliyigaya milimo ya Vanikolaiti, hoyene nene mwene ndiyigaya.

⁷ Homwene ali nago matwi, adegeleke kitisi Roho alivawila va mavilingano. Homwene alikinda, mwenuyu nkumupa kulya ku fisumo fya muti gwa vuzuvuku hogwene gulimo mu Paradisi ya Mulungu.

⁸ Umutonele malaika wʼivilingano lya mu Smurna: Genaya aliyomba mwenuyo ali wa mbele na wa mhelo, homwene wavage wafwile na wazuvukaga hangi.

⁹ Ndigamanicha mamikosi gako na vupina wako, nulu uli musavi, na mafusano ga venavo valiwiyitana Vayahudi, alisi vakavile venavo, sumbwa vali sinagogo yamwa Shetani. Uleke kogoha kunguno ya genayo uladukiwe.

¹⁰ Lolaga, Shetani akuvatagila vamo mugati ninwe mu jela, kigele mugemwe, ninwe mukudukiwa nsiku ikumi. Uve mujamu kusika ha kufwa, nane nkukupa ngala ya vuzuvuku.

¹¹ Homwene ali nago matwi, adegeleke kitisi Roho alivawila va mavilingano. Homwene alikinda, mwenuyu kukenagulilwa ngʼo na lufu lwa vuvili.

¹² Umutonele malaika wʼivilingano lya mu Pergamo: Genaya aliyomba mwenuyo ali nalo lupanga lwa vugi

¹³ kuvili: Ndimanicha henaho ulikala, henaho liliho isumbi lyamwa Shetani; naʼho ulilidima lina lyane na ukalikanile isanizyo lya muwane mwitungo lyamwa Antipa, musangilwaho wane mujamu, homwene wavulagilwe hawinwe henaho Shetani alikala.

¹⁴ Alisi ndi nago muhayo ugu mudo kuwako ati, uli navo vamo hawako hovene validimana na vuhembeki wamwa Bileamu, homwene wamuhembekaga Balaka kuvategela vana vʼIsraeli, kigele valye fitambo fya fimbulimbuli na kusihya.

¹⁵ Na sisyo sisyene uli navo venavo

¹⁶ validimana na vuhembeki wa Vanikolaiti, Upiluke moyo, ulu ukavile kupiluka moyo, nkwiza wangu kuwako na nkuvaletela venavo vulugu na lupanga lwa mulomo gwane.

¹⁷ Homwene ali nago matwi, adegeleke kitisi Roho alivawila va mavilingano. Homwene alikinda, mwenuyu nkumupa ku mana iyo yavisilwe, na kumupa iwe lya pe, na kwiwe lyenili litonilwe lina ipya, holyene kuduhu umo alilimanicha, sumbwa uyo alilipiwa.

¹⁸ Umutonele malaika wʼivilingano lya mu Tiatria: Genaya aliyomba Mwana wa Mulungu homwene ali na minso kitisi malambi ga moto, na magulu gakwe kitisi shaba.

¹⁹ Ndiyimanicha milimo yako na kutogwa kwako na isanizyo lyako na vukumba wako na vujamu wako, hangi milimo yako ya mhelo yiliyikinda iyo ya mbele.

²⁰ Alisi ndi nago muhayo ugu kuwako ati, ulimuzumya uyo mukima Yezebeli, homwene aliwiyitana mufumbuzi, na mugati na kuhembeka kwakwe alivapuvya vakumba vane kusihya na kulya fitambo fya fimbulimbuli.

²¹ Namupaga itungo lya kupiluka moyo, alisi alikana kupiluka moyo na kuleka kusihya kwakwe.

²² Lolaga, nkumutagila ku vulili wa kulwala, na venavo valisihya hamohene nawe vapiwe mamikosi mahanya, ulu vakavile kupiluka moyo ku milimo yavo.

²³ Nkuvavulaga vana vakwe; na mavilingano gose gakumanicha ati, honene ndi mwenuyu alizigesya nfigo na myoyo, nane nkumusyokezya kila umo mugati ninwe hanuma na milimo yakwe.

²⁴ Alisi kuwinwe vangi mu Tiatria, ku vose venavo vakavile kudimana na vuhembeki wenuvo, na vakagamanikizye mavusihu gamwa Shetani, kitisi valiyomba, kuwinwe ndiyomba giki: Nkuleka kumudwika Inwe muligo gungi;

²⁵ sumbwa genayo muli nago mugadime kusika nene nkwiza.

²⁶ Homwene alikinda na kuyidima milimo yane kusika mhelo, mwenuyu nkumupa vukovozi kwigulya na vapagani,

²⁷ nawe akuvatema na mulanga gwa chuma, kitisi fiseme fya vulongo filivelagulwa,

²⁸ kitisi nene mwene napivilwe na Vava; nane nkumupa ihangaye lya wangaluke.

²⁹ Homwene ali nago matwi, adegeleke kitisi Roho alivawila va mavilingano.