Vukundukule 17 - Nyamwezi New Testament 1951

¹ Na umo wa venavo vamalaika mpungati, hovene vavagi nafyo ifyo fiseme mpungati wizaga kuwane na

² wayombaga nane, uhaya, Nzugu, nkukolecha vuyangulwa wa mulava muhanya, homwene alikala kwigulya na minzi mingi, mwenuyo vatemi va liwelelo viyanzile nawe, na venavo valikala ku liwelelo vakolilwe na mvinyo ya vulava wakwe.

³ Na wanifilaga mu Roho kwibalangu; na namuvonaga mukima ikalile kwigulya na ndimu ya za muno, hoyene yokalile na mina ga mafusano, nayo yavagi na mitwe mpungati na mapembe ikumi.

⁴ Na mukima azwalile mwenda mulaluku na gwa za, na azwikilwe dhahabu na mawe malambu mupango na lulu; wavagi nacho kineneko cha dhahabu mu kukono kwakwe chokalile na mavi na zoma zya vulava wakwe.

⁵ Na mu vusyu wakwe litonilwe lina ili lya mbisila: Babiloni nhanya, nina wa valava na mavi ga liwelelo.

⁶ Na namuvonaga uyo mukima akolilwe na magazi ga vasondo na magazi ga vasangilwaho vamwa Yesu; aho namuvonaga, nakumaja munogwene.

⁷ Na malaika wambwilaga, Kuki ulikumya? Nkukuwila mbisila ya uyo mukima na iyo ndimu yimusombile. hoyene yili nayo mitwe mpungati na mapembe ikumi,

⁸ Ndimu iyo wayivonaga yavagiho, alisi yikavileho, nayo yikufuma hamizimu na kujaha vuzimile; na venavo valikala ku liwelelo vakukumya, venavo mina gavo gakatonilwe mu kitabu cha vuzuvuku vukumbu na kutundwa kwa liwelelo, ulu valivona ati ndimu yavagiho,

⁹ alisi yikavileho, nayo yikwiza hangi. Henaha galifundwa masala na ngelo. Mitwe iyo mpungati yili malugulu mpungati aligikalila uyo mukima.

¹⁰ Nayo yili savasava vatemi mpungati, mugati navo vatano vagwile, umo aliho, na ungi atali kwiza, na ulu aliza akudila katungo kado duhu.

¹¹ Na iyo ndimu hoyene yavagiho na yikavileho, yili wa mnane, nawe ali umo wa avo mpungati, na alilonda nzila yakwe ya vuzimile.

¹² Na mapembe genayo ikumi wagavonaga gali vatemi ikumi, hovene vatali kupiwa vutemi, alisi vapivagwa vukovozi kitisi vatemi saa yimo hamohene na iyo ndimu.

¹³ Venava vali va moyo gumo, na valitavula nguzu na vukovozi wavo ku iyo ndimu.

¹⁴ Venava vakulasana vulugu na Kadilana, alisi Kadilana akuvakinda, kunguno ali Guku wa vaguku, na Mutemi wa vatemi, navo vene vitanwa na vasogolwa na vajamu vakukinda hamohene nawe.

¹⁵ Na malaika wambwilaga, Minzi genayo wagavonaga henaho uyo mulava alikala vali va magongo na va mavuto na va chalo na va fiyombele.

¹⁶ Na mapembe genayo ikumi wagavonaga na iyo ndimu vakumugaya uyo mulava na vakumuleka inene na zule na kulya nama yakwe na kumuzija mu moto.

¹⁷ Kwisi Mulungu wavapaga mu myoyo yavo kumazya ndaka yakwe mugati na moyo gumo, na kuvutavula vutemi wavo ku iyo ndimu kusika mihayo ya Mulungu yafikilaga.

¹⁸ Na mukima uyo wamuvonaga ali kaya nhanya, hoyene yilivatema vatemi va liwelelo.