Vukundukule 12 - Nyamwezi New Testament 1951

¹ Haho lumeho luhanya lwavonagwa mwilunde: mukima azwalile limi, na mwezi gwavagi hansilili na magulu gakwe, na ngala ya masonda ikumi na avili yavagi ku mutwe gwakwe.

² Nawe wavagi ali na mwitungo, alilila mu vusungu na vusatu wa kuvyala.

³ Na lumeho lungi lwavonagwa mwilunde: nhumbamasaka nhanya ya za, hoyene yavagi na mitwe mpungati na mapembe ikumi, na ku mitwe yayo fyavagi filungu mpungati.

⁴ Na mukila gwayo gwalikwesaga ifungu lya vudatu lya masonda ga mwilunde, na gwagaponaja ku liwelelo. Na nhumbamasaka yimaga hambele na mukima homwene wavagi bihi kuvyala, kigele yimumile mwana

⁵ wakwe, ulu wamuvyalaga. Na wamuvyalaga mwana mugosya, homwene akuvasunga va mafyalo na mulanga gwa chuma; na mwana wakwe wajanagwa kumwa Mulungu na kwisumbi lyakwe.

⁶ Na mukima wapelelaga kwibalangu henaho ali na hanhu havezelezivilwe na Mulungu kuwakwe, kigele vamulisye henaho nsiku kihumbi na magana avili na makumi mkaga.

⁷ Haho vulugu wavukaga mwilunde: Mikaeli na vamalaika vakwe valasanaga vulugu na nhumbamasaka. Nhumbamasaka yalasanaga hamohene na vamalaika vayo;

⁸ alisi vakakindile ngʼo, na wikalo wavo vukawinwe hangi mwilunde.

⁹ Na nhumbamasaka iyo nhanya yaponezivagwa, iyo nzoka ya kale, hoyene yilitanwa Mutolani na Shetani, homwene alipuvya liwelelo lyose, waponezivagwa ku liwelelo, na vamalaika vakwe vaponezivagwa hamohene nawe.

¹⁰ Na nagwigagwa muzwi muhanya mwilunde, gulihaya, Lelo vupizya, na nguzu, na vutemi wavile wa Mulungu wiswe, navo vukovozi wavile wamwa Kristo wakwe; kwisi waponezivilwe mugambi wa vadugu viswe, homwene wavagambaga hambele na Mulungu wiswe halimi na havuziku.

¹¹ Na venavo vamukindaga ku nguzu ya magazi ga Kadilana na ku nguzu ya muhayo gwa vusangilwaho wavo, navo vavagi vakayitogilwe myuye yavo kusika kufwa.

¹² Kunguno yeniyi, dehaga veve ilunde, ninwe hovene mulikala mugati nalyo. Alisi musyolo kwigulya na liwelelo na nyanza, kwisi mutolani wasyokaga kuwinwe, na ali na kisila kihanya, kunguno alimanicha ati atali ali na katungo kado duhu.

¹³ Na aho nhumbamasaka yavonaga ati yaponezivilwe ku liwelelo yamulondezaja uyo mukima, homwene wamuvyalaga mwana mugosya.

¹⁴ Alisi mukima wapivagwa manana avili ga inanda ilo ihanya, kigele alalile kwibalangu ku wikalo wakwe, alisiweko itungo limo na matungo na nusu ya itungo limo, kule na nzoka iyo.

¹⁵ Na nzoka yatugaga minzi kitisi mongo ku mulomo gwayo, yamutugilaga mukima, kigele afilwe na mongo.

¹⁶ Alisi nsi yamugwasaja mukima, nayo yasamaga mulomo gwayo na yagumilaga mongo, hogwene nhumbamasaka yagulukaga ku mulomo gwayo.

¹⁷ Na nhumbamasaka yamukilagwa mukima, na yajaga kukalasana vulugu na venavo vasigalaga ku mugana gwakwe, venavo hovene valiyilindila mikumo ya Mulungu, na vali navo vusangilwaho wamwa Yesu.