Vukundukule 1 - Nyamwezi New Testament 1951

¹ Vukundukule wamwa Yesu Kristo, howene Mulungu wamupaga, kigele avoleche vakumba vakwe genayo galakwile wangu; na wamutumizaja malaika wakwe

² amoleche mukumba wakwe Yohana genayo; homwene wasangilagwa ku Muhayo gwa Mulungu na ku vusangilwa wamwa Yesu Kristo, gose genayo wagavonaga.

³ Welukilwa mwenuyo aligasoma, na venavo valigwigwa muhayo gwa vufumbuzi wenuvu na kugalindila genayo gatonilwemo; kwisi itungo lili bihi.

⁴ Yohana ku mavilingano mpungati ga mu Asia: Kisa kiveho hamohene ninwe na kuhola hokwene kulifuma ku mwenuyu, homwene aliho na wavagiho na akuviho, na hokwene kulifuma ku roho mpungati hozyene ziliho

⁵ hambele nʼisumbi lyakwe, na hokwene kulifuma kumwa Yesu Kristo, musangilwa wa lole, muvyalwa wa mbele wa vafwile, na muhanya wa vatemi va liwelelo; homwene atutogilwe na watukomolaga ku mavukenaguzi

⁶ giswe mugati na magazi gakwe, na watuvezaja kuvi vutemi na vahozya kumwa Mulungu, Vava wakwe: homwenuyu apiwe lukumo na vukovozi kusika myaka na myaka de.

⁷ Amen. Lolagi, akwiza mu malunde, na kila linso likumuvona, navo vamukimaga, na va magongo gose ga mu liwelelo vakulila kunguno yakwe. Yili syenisyo. Amen.

⁸ Nene ndi Alfa na Omega, Guku Mulungu aliyomba, homwene aliho na wavagiho na akuviho, Muvezya fyose.

⁹ Nene Yohana, mudugu winwe, na mwikinu mugati na mavuduki na vutemi na vujamu mugati na Yesu, navagiko ku kisilwa kilitanwa Patmo kunguno ya Muhayo gwa Mulungu, na kunguno ya vusangilwaho wamwa Yesu.

¹⁰ Navagimo mugati na Roho ha lusiku lwa Guku, na nigagwa kunuma yane muzwi muhanya

¹¹ kitisi gwa kalumbete, gulihaya, Hogene uligavona ugatone mu kitabu, na ukitumizye ku mavilingano mpungati, ku Efeso na Smurna na Pergamo na Tiatria na Sardi na Filidelfia na Laodikea.

¹² Nikevelaga navone muzwi hogwene gwayombaga nane; na aho nikevelaga,

¹³ navonaga tala mpungati zya dhahabu; na hagati na tala zyenizyo navonaga umo ikolile Mwana wa munhu, azwalile mwenda mulihu gusikile ku magulu, na itungile ha kikuva na musipi gwa dhahabu.

¹⁴ Mutwe gwakwe na nzwili zyakwe zyavagi zya pe kitisi vupamba wa pe, na kitisi theluji; na minso gakwe kitisi malambi

¹⁵ ga moto; na magulu gakwe kitisi shaba yilikema, ulu yalalukile mu ngʼanzo; na muzwi gwakwe kitisi kululumila kwa minzi mingi.

¹⁶ Na mu kukono kwa mulila wavagi nago masonda mpungati; na ku mulomo gwakwe lwafumaga lupanga lugi lwa vugi kuvili; na vusyu wakwe kitisi limi lilikema mu nguzu yalyo.

¹⁷ Na aho namuvonaga nagwaga ha magulu gakwe kitisi nafwile; nawe wantulilaga kukono kwakwe kwa mulila, uhaya,

¹⁸ Uleke kogoha, nene ndi wa mbele na wa mhelo, na ndi muzuvuku; navage nafwile, na lolaga, ndi muzuvuku kusika myaka na myaka de, na ndi nago malufungulo ga lufu na ga ha va mizimu.

¹⁹ Kunguno yeniyi ugatone genayo wagavonaga, genayo galiho na ago galakwile kumbele.

²⁰ Yeniyi yili mbisila ya masonda mpungati hogene wagawine mu mulila gwane, na ya tala izyo mpungati zya dhahabu: ago masonda mpungati gali vamalaika va mavilingano mpungati, na izyo tala mpungati zili mavilingano mpungati.