Varoma 3 - Nyamwezi New Testament 1951

¹ Lelo Vayahudi valivakila vangi na mutindo ki? na vutahiriwa vulivavelelaki?

² Vulivela ku mitindo zyose. Hambele kunguno valagiliziwa mihayo ya Mulungu.

³ Lelo kinahe, ulu vamo vavagi nʼivengwe, ivengwe

⁴ lyavo lilivela kuwinja vujamu wa Mulungu? Byololo, yikavile sisyo! Sumbwa Mulungu igele kuvi wa lole, nulu kila munhu ali mulamba, kitisi yatonilwe, Vugololoku wako wigele mugati na mihayo yako, Na ukinde henaho uliyangulwa.

⁵ Alisi tuyombe kinahe, ulu wigomu wiswe vulivudulihanya vugololoku wa Mulungu? Kinahe, Mulungu ali mwigomu ulu alitula kisila? (ndiyomba kitisi vanhu

⁶ vakuyombaga). Byololo, yikavile sisyo! Ulu ngʼo, mbe Mulungu akuliyangula liwelelo na mutindoki?

⁷ Na ulu hanayene ya Mulungu yilikula ha lukumo lwakwe mugati na vulamba wane, kuki nene mwene

⁸ ntali ndiyangulwa kitisi mukenaguzi? Kuki tuleke kuyomba kitisi valitulembekezya ati tuliyomba, Twite kavi, kigele kasoga kigele? Vuyangulwa wavo vuli vugololoku.

⁹ Lelo kinahe, iswe twavakilile vangi? Byololo, ninga hado ngʼo. Kwisi twamalaga kuvavula Vayahudi na

¹⁰ Vagriki vene ati vali vakenaguzi, kitisi yitonilwe,

¹¹ Kuduhu mugololoku, ninga umo ngʼo, Kuduhu wa ngelo, Kuduhu umo homwene alimukova Mulungu,

¹² Vose vazimilile, vose swe vadedelehile, Kuduhu umo alivezya kasoga, Ninga umo ngʼo.

¹³ Ilongomilo lyavo lili kitisi kivimbi kilugukile, Na malulimi gavo galiyomba vulamba, Ndulila ya kipili yilimo mu milomo yavo.

¹⁴ Milomo yavo yokalile na mafwizilo na vululu.

¹⁵ Magulu gavo gali mangu kugazwicha magazi.

¹⁶ Vuzimanguke na maluduko galimo mu nzila zyavo.

¹⁷ Na nzila ya kuhola vakayimanikizye.

¹⁸ Kumogoha Mulungu kuli haduhu hambele na minso gavo.

¹⁹ Alisi tulimanicha ati gose genaya galiyombwa na ngʼhama, galiyomba ku venavo vali hansilili na ngʼhama, kigele kila mulomo gumumiwe, na yililidima liwelelo

²⁰ lyose kuyangulwa na Mulungu; kunguno kuduhu munhu akugololwa hambele nawe mugati na milimo ya ngʼhama, kwisi kumanicha vukenaguzi kuliza mugati na ngʼhama.

²¹ Alisi lelo vugololoku wa Mulungu wigelaga vuduhu ngʼhama, wapivagwa vusangilwaho na ngʼhama na vafumbuzi;

²² vugololoku wa Mulungu howene vulifuma mu kumusanizya Yesu Kristo, na howene vuliho kwigulya na vose hovene valisanizya, kwisi haduhu vulekane.

²³ Vose vakenagulile na valigayiwa lukumo hamwa Mulungu,

²⁴ na valigololwa cha kisa mugati na kisa chakwe kunguno ya vukomolwa wenuvu vulimo mugati

²⁵ na Yesu Kristo, homwene Mulungu wamutulaga ave muswanya mugati na kugasanizya magazi gakwe, lumeho lwa vugololoku wakwe isyo Mulungu mugati na kulembela kwakwe akagikomizye mavukenaguzi

²⁶ genayo gakwilile kale; lumeho lwa vugololoku wakwe wa nsiku zyenizi, kigele ave mugololoku, na amugolole mwenuyu homwene alimusanizya Yesu.

²⁷ Kuhe lelo kwikumilizya kwiswe? Kwalugalililwe hanze. Mugati na ngʼhama zya mutindo ki? Mugati na ngʼhama zya milimo? Byololo, sumbwa mugati na ngʼhama zʼisanizyo.

²⁸ Kwisi tuligudima muhayo gwenugu ati, munhu aligololwa kwisanizyo vuduhu milimo ya ngʼhama.

²⁹ Ninga Mulungu ali Mulungu wa Vayahudi duhu? akavile wa vapagani vene? Ndiyo, ali Mulungu wa vapagani vene.

³⁰ Kwisi Mulungu ali umo duhu, homwene akuvagolola venavo vatahirivilwe kunguno yʼisanizyo, na venavo vakatahirivilwe savasava kunguno yʼisanizyo lyene.

³¹ Kinahe, lelo tulizivulaga ngʼhama kunguno yʼisanizyo? Byololo, yikavile sisyo! Sumbwa tulizijamilizya ngʼhama.