Varoma 16 - Nyamwezi New Testament 1951

¹ Ndimulagilizizya inwe Febe, ilumbu liswe, homwene ali mutumami wʼivilingano lya Kenkrea, kigele mumwanukule mugati na Guku,

² kitisi yilivadima vasondo, na mumugwasye mu milimo yose mwenumo alafunde vugwasya winwe; kwisi wavagi mugwasya ku vingi na kuwane nene mwene.

³ Muvagisye Priska na Akila, vatumami vichane mugati na Kristo Yesu, hovene vavagi tayari kubutwa mitwe kunguno ya vupanga wane.

⁴ Venava ndivalumbila, alisi ngʼo nene duhu, sumbwa mavilingano gose mugati na vapagani galivalumbila.

⁵ Ndiligisya ivilingano holyene lilimo mu numba yavo. Mumugisye Epeneto, mutoneke wane, homwene ali wa mbele mu Asia mugati na kumusanizya Kristo.

⁶ Mumugisye Maria, homwene watumamaga na nguzu kunguno yinwe.

⁷ Muvagisye Androniko na Yunia hovene vali vʼigongo lyane na vatungwa vichane, na vali vakumuku mugati na vatume, na vali vatongelezi vane mugati na Kristo.

⁸ Mumugisye Amplia, mutoneke wane mugati na Guku.

⁹ Mumugisye Urbano, mutumami mwichane

¹⁰ mugati na Kristo, na Staku, mutoneke wane. Mumugisye Apele homwene wajamile kijamu mugati na Kristo. Muvagisye va numba yamwa Aristobulo.

¹¹ Mumugisye Herodioni wʼigongo lyane. Muvagisye va numba yamwa Narkiso hovene valimo mu Guku.

¹² Muvagisye Trifena na Trifosa, vatumami vamwa Guku. Mumugisye Persisi, mutoneke, homwene watumamaga muno mugati na Guku.

¹³ Mumugisye Rufo, musogolwa mugati na Guku, na nina homwene ali mayu kuwane savasava.

¹⁴ Muvagisye Asinkreto, Flegoni, Herma, Patroba, Herme na vadugu hovene valiho hamohene navo. Muvagisye Filologe na Yulia na Nereo na ilumbuye na Olimpa na vasondo vose vali hamohene navo.

¹⁵ Mwigisye hamohene na kunonela kusondo.

¹⁶ Va mavilingano gose gamwa Kristo valimugisya inwe.

¹⁷ Ndimwigongela inwe vadugu, muvikomye venavo hovene valivuvengelezya vuhembeki wenuvo inwe mwahembekilwe, na valileta mavulekane na migogolo, muvavambale venavo.

¹⁸ Kwisi venavo vakavile kumutumamila Guku wiswe Kristo, sumbwa nda zyavo venekili duhu, na valiyipuvya myoyo ya vahuliku na mihayo misemu na misoga.

¹⁹ Vudonhoke winwe wakumukaga hambele na vose; kunguno yeniyi ndimudehela inwe. Alisi ndikova muve vavalaganu mugati na kasoga, na muve valele mugati na kavi.

²⁰ Alisi Mulungu wa kuhola akumukandamizya Shetani wanguwangu hansilili na magulu ginwe. Kisa cha Guku wiswe Yesu Kristo kiveho hamohene ninwe!

²¹ Timoteo, mutumami mwichane, na Lukio na Yasoni

²² na Sosipatro vʼigongo lyane, valimugisya inwe. Nene Tertio, mutoni wa barua yeniyi, ndimugisya inwe mugati na Guku.

²³ Gayo, mugenihwa wane na wa ivilingano lyose lyamwa Kristo, alimugisya inwe. Erasto, kasika lufungulo wa mukaya, na mudugu Kwarto valimugisya inwe.

²⁴ (Kisa cha Guku wiswe Yesu Kristo kiveho hamohene ninwe vose).

²⁵ Mulungu homwene alikovola kumujamilizya inwe mugati na Mhola ya Chelu yatanizivilwe na nene, na mugati na itanizyo kunguno yamwa Yesu Kristo kunguno ya vufumbulwe wa mbisila hoyene yavagi yivisilwe kufuma kale, alisi lelo, kunguno ya mukumo

²⁶ gwa Mulungu wa hanahana, yafumbulilwe mugati na mavutone ga vafumbuzi, kigele vapagani vose vafikeho

²⁷ ha vudonho wʼisanizyo, mwenuyu Mulungu inene wa ngelo apiwe lukumo mugati na Yesu Kristo kusika myaka na myaka de. Amen.