Varoma 13 - Nyamwezi New Testament 1951

¹ Kila munhu itunye mwenekili hansilili na serikali, kwisi haduhu serikali hoyene yikafumile kumwa Mulungu, na yeniyi hoyene yiliho yakindikilwe na Mulungu.

² Sisyo homwene aliyigomela serikali, alilugomela ludonho lwa Mulungu, na venavo vagome vakwiletela venekili vuyanguzi.

³ Kwisi venavo valitema vakavile kuvogohya vanhu kunguno ya mulimo musoga, sumbwa mulimo muvi. Alisi ulu ukatogilwe kuyogoha serikali, uvezye kasoga, naʼho ukupiwa vukumuku nayo.

⁴ Kwisi serikali yili mukumba wa Mulungu wa kukuvelela veve. Alisi ulu ulita tuvi, wogohe, kunguno yikavile kuludima lupanga cha gele, kwisi ali mukumba wa Mulungu, alihola ha mwenuyo alita kavi, kigele apiwe luduko.

⁵ Kunguno yeniyi yilimudima kwitunya moyo, ngʼo kunguno ya luduko duhu, sumbwa savasava kunguno ya muzwi gwa moyo.

⁶ Kunguno yeniyi yene inwe mulilipa kodi, kwisi vali vakumba va

⁷ Mulungu, hovene valitunganika milimo yeniyi. Muvalipe vose chenicho mulitondwa; uyo wa kodi, kodi; uyo wʼihongo, ihongo; uyo wa kogohwa, kogohwa; uyo wʼisima, isima.

⁸ Muleke kutondwa kinhu kimo na munhu umo, sumbwa kwitogwa, kwisi homwene alimutogwa mwiye

⁹ wayimazizye ngʼhama. Kwisi genaya, Uleke kusihya, uleke kuvulaga, uleke kwiva, uleke kwigomelwa, ninga ulu guliho na mukumo gungi hangi, gose gatungilwe hamohene mugati na muhayo ugu, Umutogwe muzenganwa wako kitisi uliwitogwa veve mwenekili.

¹⁰ Kutogwa kukavile kumwitila muzenganwa kavi, kunguno yeniyi kutogwa kuli vumazya ngʼhama.

¹¹ Na ndiyomba yeniyi kunguno mulimanicha ati saa yafikile inwe mumisye ku tulo, kwisi vupiziwa wiswe vuli bihi lelo kukila henaho twavukizaja kusanizya:

¹² Vuziku wadima kumala, na limi lyegelaga bihi. Kunguno yeniyi tuyileke milimo ya giti, na tusagalile masilanga ga mwanga.

¹³ Tusimize na ludonho kitisi yilidima halimi, ngʼo mugati na kalya na kanwa, ngʼo mugati na vuyanzani na vusengʼhya, ngʼo mugati na

¹⁴ vutongani na ivuva, sumbwa mumuzwale Guku Yesu Kristo, na muleke kugukuzya muvili na kugamazya mawivonya gago.