Varoma 12 - Nyamwezi New Testament 1951

¹ Haho ndimuhana inwe vadugu kunguno ya kisa cha Mulungu, muyifumye mivili yinwe yive kitambo kizuvuku na kisondo cha kumutogezya Mulungu; mwenumo mulikuvila Mulungu na masala.

² Na muleke kuvigikizya venava va liwelelo lyenili, sumbwa mupiluke mupiwe masala mapya ga moyo, kigele mumaniche cheniki kili kikowa na Mulungu, icho hochene kili kisoga na kilimutogezya na kili kikomezu.

³ Kunguno ya kisa cheniki napivilwe ndimuwila inwe vose, kuduhu umo alome mahanya kunguno yakwe mwenekili kukila genayo galisika kulomwa, sumbwa alome mugati na kugemela masala, kitisi Mulungu

⁴ wavagavanaja vose kipimo kʼisanizyo. Kitisi tuli na fivalango fingi mugati na muvili gumo, alisi fivalango

⁵ fyose fikavile kutumama mulimo gumo, sisyo sisyene iswe tuli vingi mugati na muvili gumo mugati na Kristo, alisi iswe vose tuli fivalango kila umo ku mwiye.

⁶ Alisi kunguno tuli nafyo fipanwa fya kisa hekeheke hanuma na kisa chenicho twapivagwa, ulu kipanwa cha vufumbuzi, tuvutumile hanuma na kipanwa kʼisanizyo liswe; ulu vukumba, tuvutumame sisoga vukumba wiswe;

⁷ muhembeki avudime vuhembeki wakwe;

⁸ na muhani mugati na vuhani wakwe; mupani, nawe apane na moyo gwa pe; muhanya, nawe agangadike; homwene alivonela kisa, nawe avezye na kudeha.

⁹ Kutogwa kwinwe kuve vuduhu vugulumi; mugagaye genayo gali mavi, mudimane na genayo gali masoga.

¹⁰ Mugati na kwitogwa hamohene, mwitogwe na moyo gose; mugati na kwikuzya hamohene, umo amutongele mwiye.

¹¹ Muleke kuvi vadizu mu migangadiko yinwe, muvake mu roho, mumutumamile Guku, mudehe mugati nʼisigizyo;

¹² mujame mu mamikosi; muve na vujamu

¹³ mugati na kulomba, mugati na mafundo ga vasondo muve na lusangi hamohene; mugangadike kuvazimana vageni.

¹⁴ Muvadosye venavo valimupezya inwe, mudosye na muleke kufwizila.

¹⁵ Mudehe na venavo valideha, na mulile na venavo valilila.

¹⁶ Muve na moyo gumo hamohene; muleke kugakova genayo gali makumuku, sumbwa mudimane na genayo gakavile makumuku.

¹⁷ Muleke kwiganika muwinwe venekili ati muli vavalaganu; muleke kusyokezya kavi na kavi; mugangadike kuvezya genaya gali masoga hambele na vanhu vose.

¹⁸ Ulu yakovolwa ha lwande lwinwe muve na kuhola na vanhu vose.

¹⁹ Muleke kwihola inwe venekili vatoneke, sumbwa mukihege kisila, kwisi yitonilwe, Kwihola kuli kuwane, nene nkusyokezya, alihaya Guku.

²⁰ Sumbwa, ulu mwanisi wako ali na nzala, umulisye; ulu ali na nota, umunwisye; kwisi ulu ulita yeniyi ukumukumingila makala ga moto ku mutwe gwakwe.

²¹ Uleke kukindwa na kavi, sumbwa ukakinde kavi mugati na kasoga.