Varoma 11 - Nyamwezi New Testament 1951

¹ Lelo ndivuzya, Kinahe, Mulungu wavataganizaja va chalo chakwe? Byololo, yikavile sisyo! Kwisi nene mwene ndi Mwisraeli ku vuvyalwa wamwa Abrahamu na kwigongo lyamwa Benyamini.

² Mulungu akavataganizizye va chalo chakwe, hovene wavamanikizye kufuma kale. Ninga mukamanikizye kitisi vutone vuliyomba kunguno yamwa Elia? Kitisi wavavula Visraeli hambele na Mulungu,

³ Guku, vavavulagile vafumbuzi vako, na vahabomolile henaho valikuhozezya veve, na nene nasigalaga ninene, na hangi valiyikova myuye yane.

⁴ Alisi kwitavuka kwa Mulungu kwamuwilaga kinahe? Nene nasigazaja kuwane vagosya fihumbi mpungati, hovene vakamusukambilile Baali.

⁵ Sisyo sisyene mwitungo lyenili lyene vusigale vuliho wasogolilwe mugati na kisa.

⁶ Alisi ulu yili ya kisa, haho yikavile ya milimo; ulu yikavile syenisyo, sanga kisa kikavile kisa hangi.

⁷ Haho yikuvi kinahe? Cheniki Visraeli vakikovaga vakakipandikile, alisi venavo vasogolilwe vakipandikaga; na venavo vasigalile valendelezivilwe moyo, kitisi yitonilwe,

⁸ Mulungu wavapile roho ya vutindizu, minso gakavile kuvona, na matwi gakavile kwigwa kusika walelo yeniyi.

⁹ Na Davidi nawe alihaya, Meza yavo yive kuwavo vutanta na mutego na kinhu cha kwipamizya na wihola.

¹⁰ Minso gavo gilavule, valeke kuvona, Uvahine migongo yavo nsiku zyose.

¹¹ Lelo ndivuzya, Vipamizye kusika vagwaga vuliko? Byololo, yikavile sisyo! Alisi mugati na vugwe wavo vupiziwa wavafikilaga vapagani, kigele vave nʼivuva.

¹² Alisi ulu vugwe wavo wavile luvango ku liwelelo, na vufwililwa wavo luvango ku vapagani, haho luvango lukukula munogwene mwitungo lya kwingiha kwavo!

¹³ Alisi ndiyomba ninwe vapagani, nene, kunguno ndi mutume wa vapagani, ndivukuzya vusimamizi wane,

¹⁴ kigele natule ivuva mu myoyo ya vʼigongo lyane, na navapizye vamo mugati navo.

¹⁵ Kwisi ulu vutaganiziwa wavo wavile vuswanya wa liwelelo, haho wanukulwa wavo vukuleka kuvi kitisi vuzuvuku hanuma na

¹⁶ lufu? Ulu vutomole vuli vusondo, haho vugali wene vuli vusondo; na ulu muzi guli musondo, haho matambi gene gali masondo.

¹⁷ Alisi ulu matambi gamo gatyanulilwe, na ulu veve, homwene uli itambi lya Muti gwa Maguta gwa mwipolu, ulitulwa mugati nago na wavile na lusangi na muzi gwa Muti gwa Maguta na

¹⁸ vunonu wago, haho uleke kwikumilizya veve mwenekili kunguno ya matambi genayo; alisi ulu uliwikumilizya, umaniche ati ukavile veve uligujamilizya muzi, sumbwa muzi gulikujamilizya veve.

¹⁹ Alisi veve ukuyomba, Matambi gatyanulilwe, kigele nene natulweho.

²⁰ Ahene vatyanulilwe kunguno yʼivengwe lyavo, naʼho ulidilamo kunguno ya isanizyo lyako. Uleke kuvi na

²¹ myete, sumbwa wogohe; kwisi ulu Mulungu wavagi akagavonelile kisa matambi genayo gafulumile ha muti gwenekili, sisyo sisyene akuleka kukuvonela veve kisa.

²² Uwikomye vusoga na vudaki wa Mulungu: vudaki kwigulya na venavo vagwile; alisi vusoga wakwe kwigulya naʼho, ulu ulidilamo mu vusoga wakwe; ulu ngʼo, veve mwene ukubutwa.

²³ Alisi venavo vene, ulu vakuleka kujama mugati nʼivengwe, vakutulwaho; kwisi Mulungu alikovola kuvatulaho hangi.

²⁴ Kwisi ulu veve wabutilwe ku Muti gwa Maguta, hogwene hanuma na kitundilwe chago guli gwa mwipolu, na watulilwe ha Muti musoga gwa Maguta, hogwene gwavagi gukavile kitundilwe chako, haho kingi muno venavo vakutulwaho ha Muti gwa Maguta, hogwene guli gwa kitundilwe chavo.

²⁵ Vadugu, kwigela ngʼo mwiganike muwinwe venekili ati muli va masala, muyimaniche mbisila yeniyi ati vulendelezu wa moyo howene wavafikilaga Visraeli vukavile vuliko kusika wingi wa vapagani wamalile kwingila,

²⁶ na haho Visraeli vose vakupiziwa, kitisi yitonilwe, Kufuma Siyoni akwiza Mukomozi, homwene akuyinja milimo yʼivengwe hamwa Yakobo;

²⁷ Na lyenili lili ilagano lyane kuwavo, aho namala kuginja mavukenaguzi gavo.

²⁸ Ha Mhola ya Chelu vali vanisi va Mulungu kunguno yinwe, alisi hanuma na vusogolwa vali vatoneke kunguno ya vaguku.

²⁹ Kwisi Mulungu akavile kwisusuma kunguno ya fipanwa fyakwe fya kisa na kwitana kwakwe.

³⁰ Kwisi kitisi inwe mwamutalaga Mulungu ha kale, alisi lelo mwavonelilwe kisa kunguno ya ivengwe

³¹ lyavo, sisyo lelo venavo vene vavile nʼivengwe, kigele venavo vene vavonelwe kisa kunguno ya kisa chenicho inwe mwapivilwe.

³² Kwisi Mulungu wavalugalilaga vose mugati nʼivengwe, kigele avavonele vose kisa.

³³ Ka, vusihu wa wingi wa wenge na wa masala ga Mulungu! Mavuyanguzi gakwe gakakovolilwe kugesiwa,

³⁴ na nzila zyakwe zikakovolilwe kwikomiwa! Kwisi, Nani walimanikaja ilome lyamwa Guku? Ninga

³⁵ nani walyaga ndaka hamohene nawe? Ninga nani hambele wamupaga kinhu kigele asyokeziwe nawe?

³⁶ Kwisi finhu fyose fyafumile kuwakwe, na filiho kunguno yakwe, na fikuviho kuwakwe. Mwenuyu ave na lukumo kusika myaka de! Amen.