Vakolose 4 - Nyamwezi New Testament 1951

¹ Inwe vaguku, muvape vasese vinwe chavo na kitisi yiligelanila, kunguno mulimanicha ati inwe vene muli nawe Guku mwilunde.

² Mujame muno mu kulomba; mulombe na moyo gose na kalumbilo.

³ Na hangi mutulombele iswe vene, kigele Mulungu atulugulile muzigo ku Muhayo, kuyitanizya mbisila yamwa Kristo, kunguno yayo ndi mutungwa,

⁴ kigele nayifumbule kitisi yilindima kuyomba.

⁵ Musimize mugati na masala hambele na venavo vali hanze, kigele mulitumile sisoga itungo.

⁶ Hanahana mihayo yinwe yive misoga na yinoniwe na munyu, kigele mumaniche kumwitavuka kila umo kitisi yilimudima inwe.

⁷ Tikiko, mudugu mutoneke, mukumba mujamu, mutumami mwichane mugati na Guku, akumupozezya

⁸ inwe gose kunguno ya kikalile chane; mwenuyo ndimutumizya kuwinwe, kigele mumaniche mhola ya kikalile kiswe, na kigele ayihuliche myoyo yinwe.

⁹ Hamohene nawe akuviho Onesimo, mudugu mujamu na mutoneke, homwene ali wa mukaya yinwe, venavo vakumupozezya inwe mhola zya henaha.

¹⁰ Aristako, mutungwa mwichane, na Marko, mwipwa wamwa Barnaba, valimugisya inwe; kunguno yakwe mwamalaga kupiwa mhola, na ulu alifika kuwinwe,

¹¹ haho mumwanukule—na Yesu, homwene alitanwa Yusto, avo vinene mugati na venavo vatahirivilwe vali vatumami vichane mu vutemi wa Mulungu, hovene vanhulikaja nene.

¹² Epafra alimugisya inwe, ali wa mukaya yinwe, na mukumba wamwa Kristo Yesu, na alimulasanila inwe mu kulomba kwakwe, kigele inwe mwime vakomezu na mukimaniche kikowa chose cha Mulungu.

¹³ Kwisi ndimupa vusangilwaho wenuvu ati, wagangadikaga muno kunguno yinwe na kunguno ya vana Laodikia na vana Hierapoli.

¹⁴ Lukasi, mufumu

¹⁵ mutoneke, na Demasi alimugisya. Muvagisye vadugu mu Laodikia na Numfa na ivilingano holyene lilivilinga mu numba yakwe.

¹⁶ Na ulu barua yeniyi yamalaga kusomwa hawinwe, haho mulole yisomwe savasava mwivilingano lya Laodikia, na ati inwe muyisome barua ya ku Laodikia.

¹⁷ Hangi mumuwile Arkipo, Uwikomye sisoga vukumba wenuvo wapivagwa mugati na Guku, kigele uvusikilizye. Lugisi na kukono kwane nene mwenekili Paulo.

¹⁸ Muyizukile minyololo yane. Kisa kiveho hamohene ninwe.