Vahebrayo 8 - Nyamwezi New Testament 1951

¹ Lelo muhayo muhanya gwa zyenizyo tuliziyomba guli giki: Tuli nawe Muhozya Muhanya wa mutindo gwenugu, homwene wikalile ha mulila gwʼisumbi lya

² Mutemi wa mwilunde, Mukumba wa Hasondo na wʼihema lya loleyene, holyene Guku walikomaga, na ngʼo munhu.

³ Kwisi kila muhozya muhanya alitulwa kigele afumye fipanwa na fitambo; kunguno yeniyi yilimu dima mwenuyu nawe ave nacho cha kufumya.

⁴ Lelo, ulu wavagi mu liwelelo, mbe wavagi akavile muhozya, kunguno valiho va kufifumya fipanwa kitisi ngʼhama zililagila;

⁵ na venavo valitumama ku mukolani na kinziminzimi cha genaya ga mwilunde, kitisi Mose walagilagwa na Mulungu, aho wakovaga kulivezya ihema; kwisi wahaya, Wikomye kigele ugavezye gose ku mukolani hogwene golekivagwa kuwako ku lugulu.

⁶ Alisi lelo uyu wapivagwa vutumami vukumuku muno, kwisi ali Mufungi wʼilagano isoga, holyene lyaki ndikwa kwigulya na malagano masoga muno.

⁷ Kwisi ulu lyenilo lya mbele lyavagi lili gele kimelo, mbe haka kovilwe hanhu ku lya vuvili.

⁸ Alisi mu kuvona ipuvyo kuwavo alihaya, Lolagi, nsiku ziliza, alihaya Guku, Aho ndavezye ilagano ipya na va munumba yamwa Israeli na va munumba yamwa Yuda,

⁹ Ngʼo kitisi ilagano ilo nalivezaja na vansavo mu lusiku ulo, Aho navadimaga makono kuvafumya ku nsi ya Misri; Kwisi vakajamile mwilagano lyane, Nane nkavadililile, uhaya Guku.

¹⁰ Kwisi lyenili lili ilagano holyene ndalivezye na va munumba yamwa Israeli Hanuma na nsiku zyenizyo, alihaya Guku, Ndazitule ngʼhama zyane mu miganiko gavo, Na ndazitone mu myoyo zyavo; Nane ndave Mulungu wavo, Navo valave vanhu vane.

¹¹ Navo valaleke kwihembeka, kila munhu na muzenganwa wakwe, Nulu kila munhu na muduguye mu kuyomba, Umumaniche Guku; kwisi vose vakumumanicha, Kufuma mudo kusika muhanya.

¹² Kwisi ndave na kisa ku mavusumule gavo, Na ndaleke kugizukila hangi mavukenaguzi gavo.

¹³ Mu kuyomba, Ilagano ipya, walinamhalukizye lya mbele; alisi icho cha kale na chasakalile kili bihi kwingika.