Vahebrayo 6 - Nyamwezi New Testament 1951

¹ Kunguno yeniyi tugaleke mavuhembeki ga mbele gamwa Kristo, na tuje kumbele tuvusikile vukomezu, vuduhu kutula hangi musingi gwa vunogoleke ku milimo yafwile,

² na gwʼisanizyo kumwa Mulungu, na gwa vuhembeki wa mavogiwa na gwa kutulilwa makono, na gwa vuhembuke wa vafwile, na gwa vuyanguzi wa hanahana.

³ Na genaya tugavezye, ulu Mulungu wazu mya.

⁴ Kwisi venavo hovene valivamulikilwa lumole kamo, na valivakilavuzya kipanwa cha mwilunde, na

⁵ valivavile va lusangi lwa Roho Nsondo, na valivagulavuzya muhayo musoga gwa Mulungu, na nguzu zya

⁶ munsiku zilakiza, na haho vagwaga, kigaka kuvavezya vupya wa vunogoleke; kwisi valimukomela Mwana wa Mulungu ka vuvili kuwavo, na valimuponda nsoni ha welekela.

⁷ Kwisi nsi, hoyene yanwaga mbula, hoyene yilitonya kuyo kingikingi, na yilifumya makuvi ga kuvavelela venavo kunguno yavo yalimagwa, yilidosiwa na Mulungu;

⁸ alisi ulu yilifumya mingʼhwa na mbigili, yilikanwa, na yilenda kufuswa; mhelo yayo yitimwe.

⁹ Alisi vatoneke, nulu tuliyomba yeniyi, tulisanizya mihayo misoga kunguno yinwe, nayo hoyene yaleta vupizya.

¹⁰ Kwisi Mulungu akavile wa nhagila alavile milimo yinwe na kutogwa kwinwe mugati nako mwalikuzaja lina lyakwe, aho mwavatumamilaga vasondo, na mutali mulivatumamila.

¹¹ Na tulitamanilwa ati kila umo kuwinwe atumile vujamu ku vokale wʼisanizyo

¹² kusika mhelo, kigele muleke kuzova, sumbwa muvalonde avo hovene mugati nʼisanizyo na vulembezu valigasalika malagano.

¹³ Kwisi aho Mulungu wamupaga Abrahamu ilagano, walahila kuwakwe mwenekili kunguno kuduhu ungi

¹⁴ muhanya wa kumuvita, na wahaya, Loleyene, kudosya nakukudosya, na kwingihya nakukwingihilizya.

¹⁵ Na sisyo walisikilaga ilagano mu kulembela mbela.

¹⁶ Kwisi vanhu valimulahila homwene ali muhanya, na mulahi guli mhelo ya kwiyanilizya kose, na gulijamili zya.

¹⁷ Aho Mulungu wakovaga kuvolecha vuliko vasaliki vʼilagano kitisi ilome lyakwe likakovolile kugaluka,

¹⁸ haho wongezaja na mulahi; kigele ku genaya avili hogene gakakovolile kugaluka, mugati nago Mulungu akakovolile kulambaha, tuve nalyo ihimagizyo lya nguzu, iswe hovene twalipelelaga na kulidima isigizyo

¹⁹ holyene lili kumbele niswe; holyene tuli nalyo kitisi nanga ya myuye hoyene yili ndambu na njamu, nalyo

²⁰ lilingila mugati, kumbele na mukingo, homwene Yesu wingilagamo kitisi mutongelezi kunguno yiswe, aho wavile Muhozya Muhanya wa hanahana ku ludonho lwa Melkisedek.