Vahebrayo 12 - Nyamwezi New Testament 1951

¹ Kunguno tulipilimwa nʼilunde ihanya lya vasangilwa tutule kila muligo na vukenaguzi howene vulituhangilizya iswe, na tupele mwega na vujamu mu wikindya

² watulilwe hambele niswe, tumwikomye Yesu homwene walivukizaja isanizyo liswe na kulimalizya; homwene kunguno ya kudeha kwatulagwa hambele nawe wagudukilaga musigiti, vuduhu kuyikomya nsoni, nawe alikala ku mulila gwʼisumbi lya Mulungu.

³ Mumwizukilage homwene wavudukilaga vukani uvo wa vakenaguzi, ngena muzove nulu kunywagala mu myoyo zinwe.

⁴ Mutali kulasana kusika kumwagwa magazi mu vulugu

⁵ wa kuvukinda vukenaguzi, ninwe mwavulavilaga vuhani, howene vuliyomba niswe kitisi na vana, Mwana wane, uleke kuvuvengelezya vulangi wamwa Guku, Nulu kunywagala aho ulihanwa nawe.

⁶ Kwisi homwene Guku alimutogwa alimulanga, Na alimutula kila mwana homwene alimwanukula.

⁷ Mujame na mulangike; Mulungu alimuvezezya kitisi vana; kwisi nani mwana homwene ise akavile kumulanga?

⁸ Alisi ulu muli gele vulangi, howene vose vavile va lusangi, haho muli vana va kilava, na ngʼo vana va loleyene.

⁹ Hangi, twavagi navo vavava viswe va mivili ziswe vatulange, na twavapaga isima; kinahe, tukuleka kwitunya hansilili na Vava wa roho, na tuzuvuke?

¹⁰ Ahene, venavo vatulangaga nsiku ndo, kitisi venekili viganikaga ati yavela; alisi uyu ku vusulu wiswe, kigele tuve na lusangi mu vusondo wakwe.

¹¹ Kila vulangi mwitungo lyavo vukavile kwigela kitisi wa kudehela sumbwa wa kusaya; alisi hanuma vulivafumizya kisumo cha kuhola na vugololoku hovene va lendeleziwa navo.

¹² Kunguno yeniyi mugolole makono

¹³ galegeyaga na mayungo gagongovokaga; na mugavezezye magulu ginwe nzila ngololoku, kigele cheniki chalemala kileke kuzimiziwa, sumbwa sisoga kipiziwe.

¹⁴ Mugangadike kuvi na kuhola na vanhu vose, na vusondohiwa, vuduhu wenuvu kuduhu munhu akumu vona Guku.

¹⁵ Mwikomaje muno, kuduhu munhu akigayiwe kisa cha Mulungu; kuduhu itina lya vululu limele na kumuducha inwe, na mwenumo vingi vilavu ziwe;

¹⁶ kuduhu umo mulava nulu vuduhu vusondo kitisi Esau, homwene wavuguzaja vuhanya wakwe ku kigavo kimo cha chakulya.

¹⁷ Kwisi mulimanicha ati hanuma, aho wakovaga kulusala luvango, wakanilagwa, kwisi wali akawine ha kunogoleka, nulu walukovaga muno na minsozi.

¹⁸ Kwisi mukasikile ha lugulu lwa kukumiwa nalo lulivaka moto, nulu wingi wilavuzu na giti na kikungulya,

¹⁹ nulu muzwi gwa mulangale, nulu muzwi gwa mihayo, hogwene aho vagwigagwa vigongelaga, kigele muhayo

²⁰ gungi guleke kuhaywa kuwavo; kwisi vavagi vakakovolile kugavukilizya genayo galagilagwa. Ninga ulu idimu likulukumya lugulu likutulagulwa mawe.

²¹ Na wigele wavagi wa kukanga, nawe Mose wahaya, Naka ngwa muno na kudetema.

²² Sumbwa inwe mwafikaga ha lugulu lwa Siyoni na kaya ya Mulungu muzuvuku,

²³ Yerusalema ya mwilunde na mavuto ga vuyaga ga vamalaika, ivilingano lya vuvyalwa wa mbele, hovene vatonilwe mwilunde, na Mulungu Muyanguzi wa vose,

²⁴ na roho zya vagololoku vakomezu, na Yesu Mufungi wʼilagano ipya, na magazi ga kuminzilwa hogene galiyo mba sisoga kukila gamwa Abele.

²⁵ Mwikomaje, ngena mumukane homwene aliyomba. Kwisi ulu avo vakipizizye hovene vamukanaga, aho wavahanaga ku liwelelo, niswe tuleke kwipizya, hovene tulihega kuwakwe homwene watuhanaga kufuma kwilunde.

²⁶ Homwene muzwi gwakwe gwalitinginaja liwelelo kale; alisi lelo walaganaja, uhaya, Hangi kamo nkulitinginya, ngʼo liwelelo linene sumbwa ilunde lyene.

²⁷ Na muhayo ugu, Hangi kamo, gulolecha ati gakwingiwa hogene galitinginiwa; kwisi gavezivilwe kigele hogene gakavile kuti nginiwa gigele.

²⁸ Kunguno twawanukula vutemi howene vukakovolile kutinginiwa tuve nako kalumbilo kigele tumwisenge Mulungu kitisi yilimutogezya hamohene nʼikuzyo na kogoha;

²⁹ kwisi Mulungu wiswe ali moto hogwene gulilya.