Biblia Todo Logo
Bìoball air-loidhne

- Sanasan -

Vahebrayo 11 - Nyamwezi New Testament 1951

1 Lelo isanizyo lili isigizyo lya ku genaya tuligalindila, na kugazumya hogene gakavile kuvonwa.

2 Kwisi mugati nalyo va kale vavagi navo vusangilwa.

3 Kwisanizyo tulimanicha ati liwelelo lyatundilwe ku Muhayo gwa Mulungu, sisyo genaya galivonwa gakavezivilwe na genayo galigela ha pe.

4 Kwisanizyo Abele wamufumizizye Mulungu kitambo kisoga kukila chamwa Kaini, na ku chenicho wapivagwa vusangilwa ati wavagi mugololoku, kwisi Mulungu watogezivilwe na fipanwa fyakwe, na mugati nʼisanizyo lyakwe atali

5 aliyomba, nulu wafwaga. Kwisanizyo Enok wajanagwa, ngena aluvone lufu; na akigelile kwisi Mulungu wamujanaga; kwisi hambele na kujanwa kwakwe wali wapiwa vusangilwa ati wamutogezaja Mulungu.

6 Alisi vuduhu isanizyo kigaka kumutogezya Mulungu; kwisi homwene alimwegela Mulungu yilimudima kusanizya ati aliho, na alivasyokezya venavo hovene valimukova.

7 Kwisanizyo Noa, aho waliwolekiwa na Mulungu kunguno ya genayo gavagi gatali kwigela, mu kumogoha Mulungu, wavezaja lyato lya kuvapizya va munumba yakwe. Mugati nalyo waliyangulaga liwelelo, na wa vile musaliki wa vugololoku kwisanizyo.

8 Kwisanizyo Abrahamu, aho witanagwa, wadonhokaga kuja na kusamila hanhu hohene akuhanukula kitisi isalo, nawe wafumaga vuduhu kumanicha uko ajile.

9 Kwisanizyo wavagi mugeni mu nsi yʼilagano, kitisi mu chalo kigeni, na wikala mu mahema hamohene na Isaka na Yakobo,

10 vasaliki viye vʼilagano lyenili lyene. Kwisi wayilindilaga kaya ya musingi mujamu hoyene muzengi na muvezya wayo ali Mulungu.

11 Kwisanizyo Sara nawe wapivagwa nguzu kuvi na nda, nulu waliwavita itungo lyakwe, kwisi wamwiganikaga uyo mujamu homwene wamulaganaja.

12 Kunguno yeniyi vavyalagwa na munhu umo, nawe wavagi kitisi wafwile, wingi wavo kitisi masonda gʼilunde, na kitisi musenga gwa ha nguka ya nyanza gukakovolilwe kusoloziwa.

13 Vose venavo vafwaga mwisanizyo, vuduhu kugasikila malagano, sumbwa vagawine gatali kule na vagadehelaga, na vazumizye ati vavagi vageni na vakwavi mu liwelelo.

14 Kwisi avo valiyomba syenisyo valifumbula ati valiyikova nsi ya muzengo.

15 Na ulu mbe vayikumbulaga hoyene vayifumile, mbe vakovolaga kuyi syokela.

16 Alisi lelo vayitamanilwa nsoga muno, hoyene mwilunde, kunguno yeniyi Mulungu akawine nsoni kuwavo itanwe Mulungu wavo, kwisi wavavezezaja kaya.

17 Kwisanizyo Abrahamu, aho wagemagwa, wamufumaja Isaka ave kitambo; ahene, wamufumaja mwana wakwe umo inene, homwene walyanukulaga ilagano.

18 Nawe wawilagwa, Mugati na Isaka mugana gwako gukwitanwa na lina lyako.

19 Kwisi wamanikaja ati Mulungu wakovola kumuhembucha ku vafwile vene; kufumako wamwanukulaga hangi kitisi mukolani.

20 Kwisanizyo Isaka wavadosaja Yakobo na Esau ku genayo galakiza.

21 Kwisanizyo Yakobo mwitungo lya kufwa, wamudosaja kila umo wa vana vamwa Yosefu, na walombaga egamilile ku nsoto ya mulanga gwakwe.

22 Kwisanizyo Yosefu, ha mhelo ya nsiku zyakwe, wakanaja kusama kwa vana vʼIsraeli, na walagilaga kunguno ya maguha gakwe.

23 Kwisanizyo Mose, aho wavyalagwa, wavisagwa myezi idatu na vavyazi vakwe, kwisi vavonaga ati mwana ali mulenzi, navo vakogohile mukumo gwa mutemi.

24 Kwisanizyo Mose, aho wakulaga, wakanaga kwitanwa mwana wamwa WaFarao;

25 na walahaga kuvonelwa vuvi hamohene na vanhu va Mulungu kukila kuvudehela vusoga wa vukenaguzi mwitungo ido.

26 Kwisi wiganikaga ati kufusanwa kwamwa Kristo vusavi vuhanya kukila nsavo zya mu Misri;

27 kwisi walolaga kumbele ku vusyokeziwa, Kwisanizyo wafumaga Misri, vuduhu kuchogoha kisila cha mutemi; kwisi wajamaga kitisi wamuvonaga uyo homwene akavile kwigela.

28 Kwisanizyo wayivezaja Pasaka na kuvilwa kwa magazi, ngena muvulagi wa vuvyalwa wa mbele avakumye.

29 Kwisanizyo vayivukaga Nyanza ya Sham kitisi nsi nkalamuku; alisi Vamisri vanwivizivagwamo aho vagemaga.

30 Kwisanizyo malugutu ga Yeriko gagwaga, galigapilimwa nsiku mpungati.

31 Kwisanizyo Rahaba mulava akazimilile hamohene na venavo vakadonhokile, kwisi wavanukulaga vasulansi na kuhola.

32 Nayombeki hangi? kwisi nkugayiwa itungo, ulu nayombe kunguno yamwa Gideoni, na Baraka, na Samson, na Yefta, na Davidi, na Samweli, na vafumbuzi,

33 hovene kwisanizyo vagakindaga mavutemi, na vatemaga mugati na vugololoku, vasikilaga malagano, vayimumaja milomo ya masimba,

34 vazimaja nguzu zya moto, vipizaja ku vugi wa lupanga, hanuma na vusakale vapivagwa hangi nguzu, vavagi va nguzu mu

35 vulugu, vagapezaja mavuto ga vageni. Vakima vapivagwa vafwile vavo hangi mugati na kuhembuka. Vangi vadukivagwa vuduhu kuzumya kukomolwa, kigele vasikilile vuhembuke vusoga muno.

36 Vangi vadukaga kuyeywa na kutulagulwa milanga na kufungwa na kutulwa mu jela.

37 Vatulagulagwa mawe, vatandulagwa na musumeno, vagemagwa, vavulagagwa na lupanga; vazwalaga ndili zya ngʼholo na ndili zya mbuli, vagayivagwa mafundo, vadukaga mamikosi na tuvi.

38 Venavo liwelelo lyavagi likasikile isima kuvi navo, vayumbayumbaga mu mabalangu na malugulu na mapilinga na makandilo ga mu nsi.

39 Na vose venava nulu vavagi navo vusangilwa wʼisanizyo lyavo,

40 vakalisikilile ilagano; kwisi Mulungu waliwatutulila kasoga muno, valeke kukomeziwa vuduhu niswe.

Nyamwezi New Testament © Bible Society of Tanzania, 1951.

Bible Society of Tanzania
Lean sinn:



Sanasan