Vafilipi 3 - Nyamwezi New Testament 1951

¹ Hangi vadugu vane, mudehe mugati na Guku! Yikavile kutimba kuwane kumutonela inwe hanahana

² genaya duhu, alisi yilimuvelela inwe. Mwikomye ku mbwa; mwikomye ku vatumami vavi; mwikomye ku venavo valiwigulazya venekili.

³ Kwisi iswe tuli venavo vatahirivilwe, iswe hovene tulimwisenga Mulungu mugati na Roho na tuliwikumilizya mugati na Kristo Yesu, iswe hovene tukavile kusendamalika moyo kwigulya na muvili,

⁴ nulu nene, ulu nakovaga, nakovolaga kusendamalika moyo kwigulya na muvili. Ulu umo aliganika ati alikovola kusendamalika moyo kwigulya

⁵ na muvili, haho nene mwene muno. Nane natahirivilwe ha lusiku lwa mnane; ndi wʼigongo lya Israeli na ku mugana gwamwa Benyamini; ndi Muhebrayo mugati na Vahebrayo;

⁶ ku ngʼhama ndi Mufarisayo; mugati na migangadiko nalidukaja ivilingano; ku vugololoku wa mu ngʼhama navage vuduhu kimelo.

⁷ Alisi genayo gavage vuduhu vusulu kuwane, nagasolozaja kuvi vufwililwa kunguno yamwa Kristo.

⁸ Ahene, ndigasolozya gose kuvi vufwililwa kunguno ya vusulu wenuvo vuhanya, howene vuligakila gose, wa kumumanicha Kristo Yesu, Guku wane, kunguno yakwe nafwilililwe gose na kugasolozya gose kuvi madakala,

⁹ kigele namugade Kristo, na navonwe mugati nawe, na nave na vugololoku wane, ngʼo wenuvo wa mu ngʼhama, sumbwa wenuvo vulifuma kwisanizyo hamwa Kristo, wenuvo vulifuma kumwa Mulungu mugati na

¹⁰ isanizyo, kigele namumaniche na nguzu zya vuhembuke wakwe, na nave na lusangi nawe mugati na

¹¹ maluduko gakwe, na namwikole mugati na kufwa kwakwe, nene mwene nafikeho ha vuhembuke wa vafwile.

¹² Nkavile kuyomba ati namalaga kugapandika ninga namalaga kuvi mukomezu, alisi ndigangadika muno, kigele nagapandike, kunguno nene napandikilwe na Kristo Yesu.

¹³ Vadugu, nene nkavile kwiganika mwenekili ati nagapandikaga, alisi yeniyi ndita: ndigalavila genayo gali kunuma yane,

¹⁴ na ndinyanyamila ku genayo gali kumbele, na ndigangadika kufika ku mhelo ya wisiganilwa ku vugade wa lwito lwa mwigulya lwa Mulungu mu Yesu Kristo.

¹⁵ Kunguno yeniyi iswe vose hovene tuli vakomezu, tuve na malome genaya. Na ulu muliloma heke mugati na mihayo yimo, Mulungu akumufumbulila inwe yeniyi yene.

¹⁶ Sumbwa yeniyi duhu: genayo twagapandikaga, tusimize mugati na genayo.

¹⁷ Vadugu, mugalonde mapambala gane, na muvalole venavo hovene mugati na kusimiza kwavo valilulonda lumeho lwenulo holwene twamupaga inwe.

¹⁸ Kwisi vingi valisimiza—kitisi namuwilile inwe kingi—kitisi

¹⁹ vanisi va musigiti gwamwa Kristo, mhelo yavo yili vuzimile, lukumo lwavo lulimo mu zoma zyavo, na miganiko gavo gali ku genayo ga liwelelo.

²⁰ Kwisi muzengo gwiswe guli kwilunde, kufumako tulimulindila

²¹ Mupizya, Guku wiswe Yesu Kristo, homwene akugugalukizya muvili gwa vusakazu wiswe kugwikola muvili gwa lukumo lwakwe, ku nguzu zyenizyo mugati nazyo alikovola kugatula gose hansilili na vukovozi wakwe.