Milimo 9 - Nyamwezi New Testament 1951

¹ Alisi Saulo wavagi atali alivogohya vahemba vamwa Guku na kuloma kuvavulaga, wajaga ku muhozya muhanya,

² na wamulombaga barua ya kujila ku Damasko ku masinagogo, kigele, ulu wavonaga vamo, vagosya ninga vakima va Nzila yeniyi, avatunge, na avafile ku Yerusalema.

³ Aho wavagi ajile na wegelaga Damasko, kisalasala chene lumole lwamukemelaga kufuma kwilunde.

⁴ Wagwaga hasi, na wigagwa muzwi gwamuwilaga, Saulo, Saulo, kuki ulimpezya?

⁵ Nawe wayombaga, Uli nani Guku? Na uyo witavukaga, Nene ndi Yesu, honene ulimpezya.

⁶ Alisi uvuke na wingile mu kaya, mwenumo ukuwilwa hogene galikudima kuvezya.

⁷ Alisi vanhu hovene vayumbaga nawe vimaga sele; kwisi vagwigagwa muzwi, alisi vakawine munhu.

⁸ Haho Saulo wagungumukaga hasi; alisi aho minso gakwe gatunulaga, akawine kinhu; na vamudimaga kukono, na vamutongekaga mu Damasko.

⁹ Na nsiku idatu wavagi akakovolile kuvona, na akalile na akanwile.

¹⁰ Mu Damasko wikalaga muhemba, lina lyakwe Anania, na Mulungu wamuwilaga mu wigele, Anania.

¹¹ Nawe wahaya, Kalame, Guku. Guku wamuwilaga, Uvuke na uje kwigeta, holyene lilitanwa Igololoku, na uvuzye mu numba yamwa Yuda kunguno ya munhu,

¹² lina lyakwe Saulo wa Tarso; kwisi lolaga, alilomba, nawe wamuvonaga munhu, lina lyakwe Anania, alingila hawakwe na alimutulila makono, kigele avone hangi.

¹³ Anania witavukaga, Guku, nigagwa ku vingi kunguno ya munhu mwenuyo, vuvi vose howene wavitilaga vasondo vako mu Yerusalema.

¹⁴ Na henaha ali na vukovozi ku vahozya vahanya kuvatunga vose, hovene valilitana lina lyako.

¹⁵ Alisi Guku wamuwilaga, Jaga duhu, kwisi mwenuyu ali kikolo hochene nasogolaga, kigele avafilile vapagani na vatemi na vana vʼIsraeli lina lyane.

¹⁶ Kwisi nkumolecha gose genaya akudukiwa kunguno ya lina lyane.

¹⁷ Haho Anania wajaga, wingilaga mu numba, na wamutulilaga makono, na wayombaga, Mudugu Saulo, Guku wantumizaja, Yesu homwene wigelaga kuwako ku nzila yeniyo wizilaga, kigele uvone hangi na wokaziwe na Roho Nsondo.

¹⁸ Itungo lili gagwaga kitisi magambala kufuma ku minso gakwe, na wavonaga, na wavukaga, na wogivagwa.

¹⁹ Haho walyaga chakulya, na wapivagwa nguzu hangi. Na wikalaga nsiku zimo hamohene na vahemba mu Damasko.

²⁰ Itungo lili watanizaja mu sinagogo ati Yesu ali Mwana wa Mulungu.

²¹ Vose hovene vamwigagwa vakumaja, na vayombaga, Akavile mwenuyo, homwene wavadukaja vose, hovene valitanaja lina lyenili mu Yerusalema? na kunguno yeniyi wafikaga henaha, avatunge na avafile ku vahozya vahanya.

²² Alisi Saulo wakulaga mu nguzu, na wavanilizaja Vayahudi, hovene vikalaga mu Damasko, mugati na kuyomba ati mwenuyu ali Kristo.

²³ Aho nsiku zyavitaga, Vayahudi valomaga ndaka ya kumuvulaga. Alisi Saulo wigagwa kunguno ya ndaka yavo.

²⁴ Na venavo vayilindilaga mivita ya kaya ha limi na.

²⁵ ha vuziku, kigele vamuvulage. Alisi vahemba vakwe vamusolaga ha vuziku, na vamwikaja mu musege ku lugutu.

²⁶ Aho waliwasikaga ku Yerusalema, wagemaga kudimana na vahemba; alisi vose vamogohaga; kwisi vavagi vakasanizizye,

²⁷ kitisi wavile muhemba. Haho Barnaba wamusolaga, na wamufilaga ku vatume, na wavasunsumulilaga kitisi wamuvonaga Guku ku nzila, na wayombaga nawe, na kitisi wasangilagwa na vugimu mu Damasko mu lina lyamwa Yesu.

²⁸ Nawe wavagi hamohene navo mu Yerusalema, na wavagi alingila na

²⁹ alifuma navo, na wasangilagwa na vugimu mu lina lyamwa Guku. Na wayombaga na wiyanilizaja na Vayahudi vafumile ku Ugriki; navo valomaga ndaka ya kumuvulaga.

³⁰ Aho vadugu vigagwa mhola yeniyi, vamufilaga ku Kesarea, na vamutumizaja kusika Tarso.

³¹ Sisyo ivilingano lyavagi na kuhola mu nsi yose ya Uyahudi na Galilaya na Samaria, na vijamilizaja, na vasimizaga mu kumogoha Mulungu, na vingihaga mu kuhulikiwa na Roho Nsondo.

³² Yakwilaga, aho Petro wayumbaga hose hose, wikaga

³³ ku vasondo, hovene vikalaga mu Lida. Kunu wamuvonaga munhu, lina lyakwe Enea, homwene walalaga

³⁴ ha vulili myaka mnane, kwisi walemalile. Na Petro wamuwilaga, Enea, Yesu Kristo alikupizya, uvuke, na uwanze vulili wako.

³⁵ Na itungo lili wavukaga. Na vose hovene vikalaga mu Lida na Saroni vamuvonaga, na vapilukaga moyo kumulonda Guku.

³⁶ Mu Yope wikalaga muhemba mukima, lina lyakwe Tabita, nguno yalyo Kasya. Mwenuyu wavezaja milimo misoga mingi,

³⁷ na wapanaga fipanwa fingi. Yakwilaga mu nsiku zyenizyo, ati uyu walwalaga, na wagulalaga Haho vamugusaga, na vamulalikizaja mu chumba higulya.

³⁸ Kunguno Lida yavagi bihi na Yope, vahemba, aho vigagwa ati Petro ali kwenuko, vavatumaga vanhu vavili kuwakwe kumulomba, aleke kukendela kwiza kuwavo.

³⁹ Haho Petro wavukaga, na wajaga navo. Aho wafikagako, vamutongelaga ku chumba higulya, na vasimbe vakima vose vimaga bihi nawe valilila na vamolekaja malinda na myenda zyose, hozyene Kasya wasumage, aho wavagi hamohene navo.

⁴⁰ Alisi Petro wavafumaja vose, nawe wasukambaga magulu gakwe, na walombaga. Haho welekelaga ku mulambo, uhaya, Tabita, uvuke! Nawe watunuzaja minso gakwe, na aho wamuvonaga Petro wikalaga.

⁴¹ Nawe wamupaga kukono na wamuvukaja, na wavitanaga vasondo na vasimbe vakima, na wamwimikaga muzuvuku hambele navo.

⁴² Genaya gakumukaga mu

⁴³ Yope yose, na vingi vamusanizaja Guku. Haho wikalaga nsiku ningi mu Yope hamwa Simoni, munuka ndili.