Milimo 6 - Nyamwezi New Testament 1951

¹ Mu nsiku zyenizyo, aho luvalo lwa vahemba lwingihaga, Vagriki vavingʼungʼulilaga Vahebrayo kunguno vasimbe vavo vakima vavitilagwa mu kugavulilwa kwa nsiku zyose.

² Haho vʼikumi na vavili vayitanaga mbuto ya vahemba, vuhaya, Yikavelile iswe tuguleke

³ muhayo gwa Mulungu, kigele tutumame hakulila. Kunguno yeniyi vadugu, musogole mugati ninwe vagosya mpungati, hovene vali na vusangilwa vusoga na vokalile Roho na wenge, kigele tuvatule ku milimo yeniyi.

⁴ Sumbwa iswe tugangadike mu kulomba na mu milimo ya muhayo.

⁵ Muhayo gwenugu gwayitogezaja mbuto yose, na vamusogolaga Stefano, munhu okalile isanizyo na Roho Nsondo, na Filipo, na Porokoro, na Nikanoro, na Timoni, na Paramena, na Nikolao muhemba wa Vayahudi wa Antiokia.

⁶ Venava vavimilikaga hambele na vatume, navo valombaga, na vavatulilaga makono.

⁷ Muhayo gwamwa Mulungu gwasambalaga, na luvalo lwa vahemba lwingihaga muno mu Yerusalema, na mbuto nhanya ya vahozya validonhokaga isanizyo.

⁸ Na Stefano, okalile kisa na nguzu, witaga migaka na malumeho mahanya mugati na vanhu.

⁹ Haho vavukaga vamo va kiheli cha Valibertino, na cha Vakirene, na cha Vaaleksandria, navo valifuma ku Kilkia na

¹⁰ Asia, na viyanilizaja na Stefano. Alisi vavagi vakakovolile kwanilizya na ngelo ninga Roho, mugati nayo uyo wayombaga.

¹¹ Haho vavaletaga vanhu, hovene vayombaga, Twamwigagwa aliyomba mihayo ya kumufusa Mose na Mulungu.

¹² Navo vavagomesaja vanhu na vanamhala na vamanicha fitabu; vamwegelaga na

¹³ vamudimaga na vamufilaga hambele nʼivanza. Na vavimilikaga vasangilwa va vulamba, hovene vayombaga, Munhu uyu akoyile kuyomba mafusano kunguno ya Hasondo henaha na kunguno ya ngʼhama.

¹⁴ Kwisi twamwigagwa, aliyomba ati, Yesu wa Nazareti akuhahomagula henaha, na akufigalula fitilwe, hofyene Mose watupile.

¹⁵ Na vose hovene vikalaga mwivanza vamwikomaja, na vavuvonaga vusyu wakwe kitisi vusyu wa malaika.