Milimo 28 - Nyamwezi New Testament 1951

¹ Aho twapizivagwa twawilagwa ati kisilwa iki kilitanwa Melita.

² Na vapagani vatutogezaja muno, kwisi vapembaga moto, na vatwanukulaga vose kunguno ya mbula na mbeho.

³ Alisi aho Paulo wakumingaga muligo gwa nkwi na wazipembaga mu moto, nzoka yafumaga kunguno ya vusevu, na yigovenhanaja ha kukono kwakwe.

⁴ Aho vapagani vayivonaga nzoka yigovenhanaja ha kukono kwakwe viwilaga, Loleyene, munhu mwenuyu ali muvulagi, homwene, nulu wapizivagwa ku nyanza, vugolozi vukamulekile azuvuke.

⁵ Alisi walisansamulilaga isimi mu moto, nawe akagulazivilwe.

⁶ Navo viganikaga akuvimba, ninga akugwa itungo lili na akufwa; alisi aho valembelaga muno, na vavonaga kitisi akagulazivilwe, vapilulaga miganiko gavo, na vahayaga, Uyu ali Mulungu.

⁷ Henaho bihi chavagi kivanza cha muhanya wa kisilwa, lina lyakwe Publio, nawe watwanukulaga, na watugenihaja na kutogezya nsiku idatu.

⁸ Lelo ise wamwa Publio walwalaga homa na kuhala magazi. Paulo wingilaga kuwakwe, na walombaga, na watulaga makono gakwe kwigulya nawe, na wamupizaja.

⁹ Aho genaya gakwilaga, valwile vangi va mu kisilwa vizaga na vapizivagwa.

¹⁰ Navo vatukuzaja nʼisima ihanya, na aho twavukaga valinaja finhu mu lyato, hofyene twafifundaga.

¹¹ Hanuma na myezi idatu twavugaga mu lyato lya Aleksandria, holyene lyadilaga ha kisilwa mwitungo

¹² lya mbeho, lumeho lwalyo Mavasa. Na twingilaga mu

¹³ Sirakusa, na twikalaga kunu nsiku idatu. Kufuma kwenuko twavalamaga, na twasikaga ku Regio. Hanuma na lusiku lumo muyaga gwa sukuma gwayumaga, na hawangaluke twasikaga ku Puteoli.

¹⁴ Kwenuko twavasangaga vadugu, na twalombagwa kwikala hawavo nsiku mpungati. Haho twasikaga mu Roma.

¹⁵ Kufuma kwenuko vadugu, aho vigagwa mhola ziswe, vasangaja niswe ku Apiforo na Trestaberene. Aho Paulo wavavonaga wamulumbilaga Mulungu, na wazamaga.

¹⁶ Aho twasikaga ku Roma mutwale wavatavulaga vatungwa ku muteko, sumbwa Paulo wapivagwa luhusa ikale inene hamohene na mulugaluga, homwene wamulindilaga. Hanuma na nsiku idatu wavitanaga vahanya va Vayahudi.

¹⁷ Aho vivilingaga wavawilaga, Inwe vagosya vadugu, nulu nkavavezezizye vanhu viswe kinhu kimo, ninga ngʼo fitilwe fya vahenga viswe, natungagwa mu Yerusalema, na nafilagwa mu makono ga Varoma.

¹⁸ Navo, aho vambuzaja, vakovaga kuntungula, kwisi kuwane haduhu nguno ya kumbulaga.

¹⁹ Alisi aho Vayahudi vafumaja maluvuzi, nakungilizivagwa kulomba nayangulwe na Kaisari, nulu navagi nkavile na muhayo gwa kuvavula vʼigongo liswe.

²⁰ Kunguno yeniyi namwitanaga inwe kwiza kumbona na kuyomba nane; kwisi kunguno ya isigizyo lya Israeli natungagwa na munyololo gwenugu.

²¹ Navo vamuwilaga, Tukapivilwe ninga barua ku Uyahudi kunguno yako, ninga vadugu vakizile kuleta mhola ninga kuyomba muhayo muvi kunguno yako.

²² Alisi tulikova kwigwa kuwako genaya uligiganika; kwisi kunguno ya kiheli cheniki tulimanicha ati yayombagwa sivi hose.

²³ Aho wakindikaga lusiku, vizaga vingi kuwakwe mu numba yakwe, na wavolekaja na wasangilagwa kunguno ya vutemi wa Mulungu, nawe wagemaga kuvagada kunguno yamwa Yesu kufuma ku ngʼhama yamwa Mose na vafumbuzi, kufuma handiyu kusika hamhindi.

²⁴ Na vamo vagasanizaja genaya gayombagwa, na vangi vakasanizizye.

²⁵ Na aho vavagi vakagelanilile hamohene vajaga, aho Paulo wayombaga muhayo gumo, Loleyene Roho Nsondo wayombaga ku vahenga viswe ku mulomo gwa mufumbuzi Yesaya, na wahaya,

²⁶ Uje ku vanhu venava na uhaye, Kwigwa mukwigwa, alisi kumanicha ngʼo. Kulola mukulola, alisi kuvona ngʼo;

²⁷ Kwisi myoyo ya vanhu venava yaguniwa, Na matwi gavo matimbu mu kwigwa, Na minso gavo vagatindizaja, Ngena vavone na minso gavo, Ninga vigwe na matwi gavo, Ninga vamaniche na myoyo yavo, Ninga vapiluke moyo kigele navapizye.

²⁸ Kunguno yeniyi mumaniche ati vupizya wenuvu wa Mulungu wafilagwa ku vapagani, navo vakwigwa.

²⁹ Aho wagayombaga genaya, Vayahudi vajaga, na viyanilizaja muno vavo kuvavo.

³⁰ Na wikalaga myaka ivili mu numba yakwe, mwenumo wasikilaga, na wavanukulaga vose, hovene vizaga

³¹ kuwakwe, nawe wavutanizaja vutemi wa Mulungu, na wahembekaga kunguno yamwa Guku Yesu Kristo na vugimu wingi vuduhu kuhangiliziwa na munhu.