Milimo 24 - Nyamwezi New Testament 1951

¹ Hanuma na nsiku itano muhozya muhanya Anania wikaga hamohene na vanamhala vamo na muyombi, Tertulo; navo vamupaga munachalo mhola yamwa Paulo.

² Haho uyu witanagwa Tertulo wavukizaja

³ kumuvula, na wayombaga, Hansilili naʼho tuli na kuhola kwingi, Feliki muhanya, na mu vulindilizi wako milimo mivi zilivezeleziwa mugati nʼigongo lyenili, na tuliganukula gose matungo gose na hosehose na kalumbilo kose.

⁴ Alisi naleke kukuzovya, ndikulomba utudegeleke mihayo mido ku kisa chako.

⁵ Kwisi twamuvonaga munhu mwenuyu ali muvi na muvukizya wa vugome mugati na Vayahudi vose mu liwelelo lyose, na hangi ali muhanya wa kiheli cha Vanazareti.

⁶ Hangi wagemaga kulivipya isengelo; twamudimaga, na twakovaga kumuyangula hanuma na ngʼhama yiswe.

⁷ Alisi mutwale Lisia wizaga, na wamunyampulaga na nguzu ku makono giswe, na wavalagilaga vavulani vize kuwako.

⁸ Kuwakwe ulikovola, mugati na kumuvuzilizya veve mwenekili, kupiwa mhola zyose kunguno yazyo tulimuvula.

⁹ Na Vayahudi navo vamuvulaga, na vayombaga ati yili syenisyo.

¹⁰ Aho munachalo wamuhungezezaja kukono kigele ayombe, Paulo witavukaga, Kunguno ndimanicha kitisi wavile muyanguzi wʼigongo lyenili mu myaka

¹¹ mingi, ndivula na kudeha. Kwisi ulivela kumanicha kitisi zyavitaga nsiku ikumi na lumo duhu, kufuma henaho nalinaga ku Yerusalema kumwisenga Mulungu.

¹² Na vakambwine mwisengelo kwiyanilizya na munhu, ninga kuvezya vugome mu mbuto, ninga mu masinagogo, ninga mu kaya.

¹³ Ninga vakakovolile kugasangilwa kuwako hogene valimbula lelo.

¹⁴ Alisi genaya ndizumilizya hambele naʼho ati ku Nzila yeniyi valiyitana kiheli, ndimutumamila Mulungu wa vahenga viswe, na ndisanizya hogene gatonilwe mu ngʼhama, nago gatonilwe mu fitabu fya vafumbuzi.

¹⁵ Na ndi nako kwisigizya kumwa Mulungu, hokwene navo vene valikulindila, ati vukwiza vuhembuke wa vagololoku na vigomu.

¹⁶ Kunguno yeniyi ndigangadika hanahana kuvi na moyo gwa pe hambele na Mulungu na vanhu.

¹⁷ Hanuma na myaka mingi nizaga kuvaletela vʼigongo liswe kalumbilo na fipanwa.

¹⁸ Na Vayahudi vafumile ku Asia vansangaga mu milimo yeniyi aho nasondohivagwa mwisengelo.

¹⁹ Yilivadima venava kuviho hambele naʼho vavule, ulu vali nago muhayo kunguno yane.

²⁰ Ninga vanhu ava venekili vavuyombe wigomu wenuvu vavuvonaga hawane, aho nimaga hambele

²¹ nʼivanza, sumbwa hamo muhayo gumo, hogwene nahamukaga, aho nimaga mugati navo; Kunguno ya vuhembuke wa vafwile ndiyangulwa walelo hambele ninwe.

²² Aho Feliki wagigagwa genaya, wagudizaja muhayo, kwisi wamanikaja mhola ya Nzila vuliko, na wayombaga, Ulu muteko Lisia akwika henaha, nkuguyangula muhayo gwinwe.

²³ Na wamulagila mutwale amulindile, alisi mugati na vukondu, na aleke kuvahangilizya vanwaniye kumutumamila.

²⁴ Hanuma na nsiku zimo wizaga Feliki hamohene na mukima wakwe Drusila, homwene wavagi Muyahudi, wamwitanaga Paulo na wamudegelekaga kunguno

²⁵ yʼisanizyo kumwa Kristo Yesu. Alisi aho wayombaga kunguno ya vugololoku na wilengu na kitanga kilakiza, Feliki wogohaga na witavukaga, Lelo jaga duhu, alisi ulu navonaga itungo ndakwitane hangi.

²⁶ Hangi wisigizaja ati akupiwa mapesa na Paulo, na kunguno yeniyi wamwitanaga hangi na hangi, wasunsumulaga nawe.

²⁷ Alisi aho myaka ivili yavitaga, Feliki walondagwa na Porkio Festo; na kunguno Feliki wakovaga kuvatogezya Vayahudi wamulekaga Paulo atungilwe.