Milimo 21 - Nyamwezi New Testament 1951

¹ Aho twalekanaga navo twavugaga nzila ya ngolola na twasikaga ku Ko, na hawangaluke ku Rodo, na kufuma kwenuko ku Patara.

² Na aho twavonaga lyato holyene likuvuka kuja ku Foinikia twingilaga mwenumo na twavugaga.

³ Aho twavonaga Kipuro, twayilekaga ha lumoso na twavugaga kusika Ushami, na twasikaga ku Tiro, kwisi kwenuko miligo ya lyato yikwikiwa.

⁴ Aho twavavonaga vahemba twikalaga kwenuko nsiku mpungati, navo vamuwilaga Paulo ku

⁵ vukovozi wa Roho, aleke kulina ku Yerusalema. Aho twamalaga nsiku zyenizyo twavugaga na twajaga kumbele, na vose hamohene na vakima na vana vavo vatufililizaja hanze na kaya, na twasukambaga ha

⁶ nguka na twalombaga, Haho twidahaja navo, niswe twingilaga mu lyato, navo vasyokaga ku kaya.

⁷ Na twamalizaja lugendo lwiswe kufuma Tiro kusika Ptolomai, na twavagisaja vadugu na twikalaga navo lusiku lumo.

⁸ Hawangaluke twavukaga na twasikaga ku Kesaria na twingilaga mu numba ya mutanizya Filipo, homwene wavagi umo wa avo mpungati, na twikalaga hawakwe.

⁹ Mwenuyu wavagi navo vana vakima vanne hovene vafumbulaga.

¹⁰ Aho twikalaga kwenuko nsiku ningi wikaga mufumbuzi kufuma

¹¹ Uyahudi, lina lyakwe Agabo. Aho watufikilaga wagusolaga musipi gwamwa Paulo, witungaga magulu na makono na wayombaga, Roho Nsondo aliyomba giki, Sisyo Vayahudi mu Yerusalema vakumutunga mwenekili musipi ugu, navo vakumutavula mu makono ga vapagani.

¹² Aho twagigagwa genaya iswe na venekili kaya, twamulombaga aleke kulina ku Yerusalema.

¹³ Haho Paulo witavukaga, Mulivezyaki mu kulila na kumbinza moyo? Kwisi nene ndi tayari ngʼo kutungwa duhu sumbwa kuvulagwa savasava mu Yerusalema kunguno ya lina lyamwa Guku Yesu.

¹⁴ Aho wayikanaga ndaka yiswe twahulikaga na twayombaga, Kikowa chamwa Guku kikwile.

¹⁵ Hanuma na nsiku zyenizyo twasolaga fiseme fiswe na twalinaga ku Yerusalema.

¹⁶ Na vamo va vahemba va Kesaria valondehanaga niswe na vatufilaga kumwa Mnasoni wa Kipuro, muhemba wa kale, tugenihe hawakwe.

¹⁷ Aho twasikaga ku Yerusalema, vadugu vatwanukulaga na kudeha.

¹⁸ Hawangaluke Paulo wingilaga hamohene niswe kumwa Yakobo, na vanamhala vose vavagiko.

¹⁹ Aho wavagisaja wavapozezaja mihayo yose, gumo gumo, hoyene Mulungu wavezaja mugati na vapagani ku milimo yakwe.

²⁰ Navo aho vayigagwa vamukumukaja Mulungu na vamuwilaga, Mudugu, ulivona kitisi valiho fihumbi fingi fya Vayahudi hovene valisanizya, navo vose validadika kuyidima ngʼhama.

²¹ Alisi vawilagwa kunguno yako kitisi ulivahembeka Vayahudi vose hovene valikala mugati na vapagani vamuleke Mose, na ulivawila valeke kuvatahiri vana vavo na valeke kufilonda fitilwe.

²² Kinahe lelo? Sumbwa mwivilingo muhanya gukwivilinga, kwisi vakwigwa kitisi wizaga.

²³ Kunguno yeniyi uvezye kitisi tulikuwila: Tuli navo vagosya vanne hovene valumbaga.

²⁴ Uvajane venavo na wisondohye hamohene navo na uvalipilizye, kigele vamogwe mitwe yavo, haho vose vakumanicha ati cheniki vawilagwa kunguno yako kikavile cha lole, sumbwa veve mwene ulisimiza sisoga

²⁵ na ulizimazya ngʼhama. Alisi kunguno ya vapagani hovene vasanizaja twafumaja ilagilizyo, valeke kulonda muhayo gungi, sumbwa vilindile hambele na nyama yahozivilwe ku fimbulimbuli, na magazi, na yeniyi

²⁶ yanigilwe, na vulava. Haho Paulo wavasolaga avo vagosya, na hawangaluke wisondohaja hamohene navo, na wingilaga mwisengelo, na wafumaja mhola kitisi nsiku zya kwisondohya zyamalaga, haho kitambo chafumivagwa ku umo na umo mugati navo.

²⁷ Aho nsiku zyenizyo mpungati zyadima kumala, Vayahudi va Asia vamuvonaga mwisengelo na vagugomesaja mwivilingo na vamudimaga,

²⁸ na vahamukaga, Inwe vagosya vʼIsraeli, mugwasye. Mwenuyu ali munhu homwene alivahembeka vose hosehose kugaya igongo liswe na ngʼhama na hanhu henaha, na hangi wavingizaja Vagriki mwisengelo na wahavipaja henaha hanhu hasondo.

²⁹ Kwisi hambele vamuvonaga mu kaya hamohene na Trofimo wa Efeso, na viganikaga ati Paulo wamwingizaja mwenuyu mwisengelo.

³⁰ Na kaya yose yavipaga, na vanhu vikumingaga myega na vamudimaga Paulo na vamukulumulaga hanze nʼisengelo, na itungo lyenilo mizigo yalugalagwa.

³¹ Na aho vakovaga kumuvulaga, mhola yamufikilaga muteko wa valugaluga kitisi Yerusalema yose yavipaga.

³² Itungo lyenili wavasolaga valugaluga na vatwale na wikaga mwega kuwavo. Na avo aho vamuvonaga muteko na valugaluga voyaga kumutula Paulo.

³³ Haho muteko wegelaga, wamudimaga, na walagilaga atungwe na minyololo ivili, na wavuzaja, Mwenuyu ali nani? na

³⁴ witagaki? Vamo mugati na mwivilingo vahamukaga giki na vangi giki, na aho wavagi akakovolile kumanicha hanayene kunguno yʼibubu walagilaga afilwe mu ngomwa.

³⁵ Aho wasikaga hakulinila yakwilaga avukiwe na valugaluga kunguno ya nguzu ya mwivilingo.

³⁶ Kwisi mwivilingo muhanya gwa vanhu vavalondaga na vahamukaga, Mumwinje mwenuyu.

³⁷ Aho Paulo wingizivagwa mu ngomwa wamuwilaga muteko, Ndi na luhusa kukuwila muhayo? Nawe

³⁸ wayombaga, Ulimanicha Kigriki? Ukavile mwenuyo Mumisri homwene mu nsiku zyenizyo wavagomesaja na wavafilaga vavulagi fihumbi finne kwibalangu?

³⁹ Alisi Paulo wayombaga, Nene ndi Muyahudi wa Tarso, kaya mu Kilikia, muzengi wa mukaya nhanya. Ndikulomba umpe luhusa kuyomba na vanhu.

⁴⁰ Aho wamupaga luhusa Paulo wimilaga henaho hakulinila, wavahungezaja vanhu kukono, na aho havagi selesele, wayombaga navo mu kiyombele cha Kihebrayo, na uhaya: