Milimo 18 - Nyamwezi New Testament 1951

¹ Hanuma na genaya Paulo wafumaga ku Atene na wafikaga ku Korinto.

² Kwenuko wamuvonaga Muyahudi umo lina lyakwe Akila, muvyalilwa mu Ponto, nawe wizaga mu nsiku izyo kufuma ku Italia hamohene na mukima wakwe Priskila, kunguno Kaisari Klaudio wavalagilaga Vayahudi vose vafume ku Roma, na wafikilaga hawavo.

³ Na kunguno wavagi na mulimo gumo kitisi venavo wikalaga navo na watumamaga, kwisi vavagi vafundi va kusuma mahema.

⁴ Alisi ha Sabato zyose wasunsumulaga mu Sinagogo, na wavakindaga Vayahudi na Vagriki.

⁵ Aho Sila na Timoteo vikaga kufuma ku Makedonia, Paulo wagangadikaga kugutanizya muhayo, na wasangilagwa hambele na Vayahudi ati Yesu ali Kristo.

⁶ Alisi aho vivitanaja nawe na vamufusaga wakunkumulaga myenda yakwe na wavawilaga, Magazi ginwe gaveho higulya na mitwe yinwe. Nene ndi vuduhu

⁷ musango, kufuma lelo ndija ku vapagani. Nawe wafumaga kwenuko na wingilaga mu numba yamwa Yusto, homwene wamogohaga Mulungu, numba yakwe yavagi bihi na Sinagogo.

⁸ Na Krispo, muhanya wa sinagogo, wamusanizaja Guku hamohene na vose va munumba yakwe, na Vakorinto vingi hovene vigagwa vasanizaja na vogivagwa.

⁹ Na Guku wamuwilaga Paulo ha vuziku mu wigele, Ukogohe ngʼo, utanizye

¹⁰ duhu, na ukahulike ngʼo. Kunguno nene ndiho hamohene naʼho, na kuduhu umo akukudima ninga akukwitila kavi, kwisi ndi navo vanhu vingi mu kaya yeniyi.

¹¹ Na wikalaga kunu mwaka gumo na myezi mkaga, na wahembekaga muhayo gwa Mulungu mugati navo.

¹² Aho Galio wavagi munachalo wa Akaya, Vayahudi vamutingaga Paulo kwilome limo, na vamufilaga

¹³ hambele nʼisumbi lya vuyanguzi, na vayombaga, Mwenuyu aligada vanhu kwisenga Mulungu ku mutindo

¹⁴ hogwene gukagelanilile na ngʼhama. Aho Paulo wendaga kuyomba, Galio wavawilaga Vayahudi, Inwe Vayahudi, ulu mbe wavagi vusumule ninga vuyengani ahene mbe navagi tayari kumudegeleka.

¹⁵ Alisi ulu malwanilo kunguno ya mihayo ninga mina ninga ngʼhama yinwe, haho mwikomaje inwe venekili, kwisi nkatogilwe kuvi muyanguzi wa genaya.

¹⁶ Na wavapezaja kwisumbi lya vuyanguzi.

¹⁷ Haho vose vamudimaga Sostene, muhanya wa sinagogo, na vamutulagulaga hambele nʼisumbi lya vuyanguzi, na Galio akagadonhokile genaya. Aho Paulo wamalaga kwikalako nsiku ningi wavadahaja vadugu.

¹⁸ Haho wavugaga ku Shami hamohene na Priskila na Akila, alisi hambele wamogagwa mu

¹⁹ Kenkrea, kwisi waliwalumba. Aho wasikaga ku Efeso wavalekaga avo henaho, nawe mwenekili wingilaga mu sinagogo na wiyanilizaja na Vayahudi.

²⁰ Alisi aho vamulombaga ikale hangi nsiku akazumizye,

²¹ sumbwa wavadahaja, uhaya, Yandima kuja ku Yerusalema ku sikukulu yizile, alisi ndasyoke hangi kuwinwe ulu Mulungu alitogwa. Haho wavugaga kufuma Efeso.

²² Aho wafikaga ku Kesarea walinaga na waligisaja ivilingano na wikaga ku Antiokia.

²³ Aho wamalaga kwikalako nsiku wavukaga na wahingulaga kaya ku kaya mu nsi ya Galatia na Frigia, na wavajamilizaja vahemba vose.

²⁴ Lelo wizaga ku Efeso Muyahudi, lina lyakwe Apolo, homwene wavyalililwe mu Aleksandria, wavagi wa masala muno na wenge mu mavutone.

²⁵ Mwenuyu wavagi ahembekilwe nzila ya Guku, wahimagizivagwa na roho kuyomba na kuhembeka na ludonho kunguno ya Yesu, nulu wakumanikaja koja kwamwa Yohana duhu. Nawe wavukizaja kuyomba na vugimu mu sinagogo.

²⁶ Aho Priskila na Akila vamwigagwa vamwanukulaga hawavo na vamolekaja nzila ya Mulungu sisoga. Na aho wakovaga kuja ku Akaya vadugu vamugwasaja na vavatonelaga vahemba vamwanukule.

²⁷ Na aho wafikaga kunu wavagwasaja muno venava vasanizaja ku kisa cha Mulungu.

²⁸ Kwisi wavakindaga Vayahudi vuliko hambele na vanhu vose na wavolekaja mugati na vutone ati Yesu ali Kristo.