Milimo 13 - Nyamwezi New Testament 1951

¹ Mwivilingano lya mu Antiokia vavagimo vafumbuzi, Barnaba, Simeoni alitanwa Nigeri, na Lukio wa Kirene, na Maneni walelelagwa hamohene na mutemi Herode, na Saulo.

² Aho vamutumamilaga Guku na vafungaga, Roho Nsondo wayombaga, Munsolele Barnaba na Saulo ku milimo yeniyi, hoyene navitanilile.

³ Aho vafungaga na valombaga, vavatulilaga makono, na vavatavulaga

⁴ Aho vatumizivilwe syenisyo na Roho Nsondo, vikaga ku Seleukia, na kufuma henaho vavugaga kusika Kipro.

⁵ Aho vafikaga ku Salami, vatanizaja muhayo gwa Mulungu mu masinagogo ga Vayahudi, na vavagi nawe Yohana wa kuvagwasya.

⁶ Aho vahingulaga kisilwa chose kusika Pafo, vamuvonaga mufumu, mufumbuzi wa vulamba Muyahudi, lina lyakwe Baryesu.

⁷ Uyu wikalaga ha munachalo Sergio Paulo, munhu wa masala. Mwenuyu wavitanaga Barnaba na Saulo; kwisi wakovaga kugudegeleka muhayo gwa Mulungu.

⁸ Alisi Elima, mufumu, (kwisi yeniyi yili nguno ya lina lyakwe) wiyanilizaja navo, wagemaga kumuhangilizya munachalo aleke kusanizya.

⁹ Alisi Saulo, homwene alitanwa Paulo, wokalaga na Roho Nsondo, wamwikomaja, uhaya,

¹⁰ Veve mwana wamwa Shetani, wokalile na vugulugulu vose na kayaya kose, veve mwanisi wa vugololoku vose, uleke kupilula nzila ngololoku zyamwa Guku.

¹¹ Lolaga, kukono kwa Guku kuli higulya naʼho, ukuhofula, na veve kuvona ngʼo limi mwitungo limo. Na itungo lili gamwikilaga lwiti na giti, na wababasyababasya, na wakovaga umo amutongele.

¹² Aho munachalo wagavonaga hogene gakwilaga, wasanizaja, na witilulaga kunguno ya vuhembeki wamwa Guku.

¹³ Haho Paulo na viye vavugaga mu wato kufuma ku Pafo kusika ku Perge mu Pamfilia, na Yohana wavalekaga, na wasyokaga ku Yerusalema.

¹⁴ Kufuma Perge vahingulaga kusika Antiokia mu Pisidia, na ha lusiku lwa sabato vingilaga mu sinagogo na vikalaga.

¹⁵ Hanuma na kusomwa kwa ngʼhama na vafumbuzi, vahanya va sinagogo vatumizaja kuwavo vahaya, Vadugu, ulu muli nago muhayo gwa kuvahana vanhu, muyombe.

¹⁶ Haho Paulo wavukaga, wahungezaja kukono, na wayombaga. Inwe vagosya vʼIsraeli ninwe mulimogoha Mulungu, degelekagi.

¹⁷ Mulungu wa vanhu ava Visraeli wavasogolaga vahanya viswe, na wavakulilizaja, aho valovelaga mu Misri, na wavafumaja mwenumo na kukono kwinulilwe.

¹⁸ Na myaka makumi anne wavalembelaga kusimiza kwavo mwibalangu.

¹⁹ Aho waliwagazimangucha magongo mpungati mu nsi ya Kanaani, na wavapaga nsi yavo yive isalo.

²⁰ Hanuma na myaka magana anne na makumi atano wavapaga vayanguzi kusika mfumbuzi Samweli.

²¹ Haho valombaga vapiwe mutemi, na Mulungu wavapaga Saulo, mwana Kisi, munhu wʼigongo lyamwa Benyamini, myaka makumi anne.

²² Aho wamwingaja mwenuyo, wamukindikaga Davidi ave mutemi wavo, kunguno yakwe wasangilagwa, na wahayaga, Namuvonaga Davidi mwana Isai, munhu homwene aligutogezya moyo gwane, homwene akuvezya kikowa chane chose.

²³ Ku mugana gwakwe Mulungu

²⁴ wavaletelaga Visraeli Mupizya Yesu, kitisi walaganaja, aho Yohana, hambele na kwiza kwakwe, wavatanizaja

²⁵ vanhu vose vʼIsraeli kogiwa kwa kunogoleka. Aho Yohana wadimaga kumalizya lugendo lwakwe wahayaga, Muliniganika nene ndi nani? Nkavile Uyu, alisi lolagi, aliza umo hanuma nane, homwene nkasikile isima kumutungula filatu fya magulu gakwe.

²⁶ Vagosya vadugu, vana va vuvyalwa wamwa Abrahamu, na inwe mulimogoha Mulungu, kuwiswe muhayo gwa vupizya wenuvu gwatumizivilwe.

²⁷ Kwisi venavo valikala mu Yerusalema na vahanya vavo vavagi vakamumanikizye, sumbwa vamutemaga kitanga, na mwenumo vayisikilizaja mihayo ya vafumbuzi, hoyene yilisomwa kila sabato.

²⁸ Nulu vakawine nguno ya kumuvulaga, vamulombaga Pilato uyo avulagwe.

²⁹ Aho vagasikilizaja gose hogene gatonilwe kunguno yakwe, vamwikaja ku

³⁰ muti, na vamulalikizaja mu kivimbi. Alisi Mulungu wamuhembukaja ku lufu; na wavonagwa nsiku ningi na venavo,

³¹ hovene valinaga nawe kufuma Galilea kuja ku Yerusalema, na hovene lelo vali vasangilwa vakwe hambele na vanhu.

³² Na iswe tulivatanizya inwe ilagano, holyene lyapanilwe ku vahenga kitisi Mulungu walisikilizaja kuwiswe, vana vavo, aho wamuhembukaja Yesu;

³³ kitisi yatonilwe mu Zaburi ya vuvili, Veve uli Mwana wane, nakuvyalaga walelo.

³⁴ Alisi kunguno wamuhembukaja ku lufu, aleke kusyoka ku vuvozu, wayombaga giki, Nhuvapa inwe fipanwa fisondo na fijamu fyamwa Davidi.

³⁵ Kwisi aliyomba mu Zaburi yingi, Veve kuzumya ngʼo Musondo wako avole.

³⁶ Aho Davidi wayitumilaga ndaka ya Mulungu mu vuzuvuku wakwe, wagulalaga, nawe watulagwa ku vahenga vakwe, na wavolaga.

³⁷ Alisi mwenuyo Mulungu wamuhembukaja akavolile.

³⁸ Kunguno yeniyi mumaniche inwe vagosya vadugu, ati mugati nawe kulitaniziwa kutondolwa kwa mavukenaguzi.

³⁹ Vose hovene valisanizya valigololwa nawe ku gose, hogene mukakovolilwe

⁴⁰ kugololwa na ngʼhama ya Mose. Kunguno yeniyi mwikomaje, ngena genayo gayombilwe na vafumbuzi gamusikile inwe.

⁴¹ Lolagi, inwe vʼivengwe, mukumye na muzimanguke; Kwisi ndivezya mulimo mu nsiku zinwe, Mulimo hogwene inwe kusanizya ngʼo, ulu umo wamupozezaja.

⁴² Aho vafumaga vavalombaga vatanizye mihayo yeniyi ha sabato yingi.

⁴³ Aho vʼivilingano vasambalaga Vayahudi vingi na vahemba mugati na vapagani, hovene vamogohaga Mulungu, vavalondaga Paulo na Barnaba, hovene vayombaga navo, na vavahanaga vadimane na kisa cha Mulungu.

⁴⁴ Ha sabato yingi vakundihanaga vose va mukaya, vagudegeleke muhayo gwa Mulungu.

⁴⁵ Aho Vayahudi vazivonaga mbuto, vadimagwa nʼivuva, vazyanilizaja

⁴⁶ mihayo zyamwa Paulo, na vafusaga. Alisi Paulo na Barnaba vayombaga na vugimu, vuhaya, Yagudimaga muhayo gwa Mulungu gutaniziwe hambele kuwinwe; alisi kunguno mwagusindikaga, na muliganika, ati mukasikile isima kupiwa vuzuvuku wa hanahana, kasinaga tulivasyokela vapagani.

⁴⁷ Kwisi syenisyo Guku watulagilaga, Nakutulaga uve lumole lwa vapagani, Kigele uve vupizya kusika mhelo ya liwelelo.

⁴⁸ Aho vapagani vayigagwa, vadehaga, na vagukumukaja muhayo gwa Guku, na vose hovene vasogolagwa ku vuzuvuku wa hanahana vasanizaja.

⁴⁹ Na muhayo gwa Guku gwasambalaga mu nsi yose.

⁵⁰ Alisi Vayahudi vavagomesaja vakima vʼisima, hovene vamogohaga Mulungu na vahanya va mukaya, kuvapezya Paulo na Barnaba, na vavafumaja kuvita maluvimbi gavo.

⁵¹ Navo vavakunkumulilaga luvuvu lwa magulu gavo, na vajaga ku Ikonio.

⁵² Na vahemba vokazivagwa na kudeha na Roho Nsondo.