Milimo 1 - Nyamwezi New Testament 1951

¹ Mwichane Teofilo, kitabu cha mbele nakutonelaga kunguno ya gose genayo, Yesu wavukizaja kuvezya na

² kuhembeka, kusika lusiku lwenulo walinivagwa mwilunde hanuma na kuvalagila mu Roho Nsondo vatume,

³ hovene wavasogolaga, ku venava wiyolekaja muzuvuku hanuma na kuduka kwakwe na mavusangilwa mingi, wigelaga kuwavo mu nsiku makumi anne, na wayombaga navo kunguno ya vutemi wa Mulungu.

⁴ Aho wavagi hamohene navo, wavalagila valeke kufuma ku Yerusalema, sumbwa valilindile ilagano lyamwa Vava,

⁵ holyene mwigilwe kuwane; kwisi Yohana wogaje na minzi; alisi inwe mukogiwa na Roho Nsondo hanuma na nsiku ndo.

⁶ Aho vavagi vivilingile vamuvuzaja, vuhaya, Guku, ulivugungumula vutemi wa Visraeli hangi mwitungo

⁷ lyenili? Nawe wavitavukaga, Yikavile kuwinwe kumanicha itungo na limi holyene Vava wakindikaga mu

⁸ vukovozi wakwe; sumbwa mukupiwa nguzu, ulu Roho Nsondo akwiza higulya ninwe, na mukuvi vasangilwa vane mu Yerusalema na mu nsi yose ya Uyahudi na Samaria na kusika mhelo ya liwelelo.

⁹ Aho wayombaga genaya, navo vavagi valimwilolela, walinivagwa, nʼilunde lyamwanukulaga hambele na minso gavo.

¹⁰ Aho valangamilaga minso gavo kwilunde hʼitungo lya kulina kwakwe, lolaga, vagosya vavili mu myenda ya

¹¹ pe vimaga hawavo, navo vayombaga, Inwe vagosya va Galilaya, kuki mulima na mulilangamila kwilunde? Mwenuyu Yesu walinivilwe kwilunde kufuma kuwinwe, akusyoka na mutindo gwenugu, kitisi mwamuvonaga alilina kwilunde.

¹² Haho vasyokaga ku Yerusalema kufuma lugulu lulitanwa Lugulu lwa Maguta, holwene luli bihi na Yerusalema, kufuma kwenuko lugendo lwa sabato.

¹³ Aho vingilagamo, valinaga ku chumba cha higulya, mwenumo vakwikalagamo; Petro na Yohana na Yakobo na Andrea, Filipo na Toma. Bartolomayo na Mateo, Yakobo mwana Alfeyo na Simoni Zelote na Yuda mwana Yakobo.

¹⁴ Vose venava vajamaga na moyo gumo mu kulomba, hamohene na vakima vamo na Maria, nina wamwa Yesu, na vaduguye.

¹⁵ Mu nsiku zyenizyo Petro wimilaga mugati na vadugu—yavagiho mbuto ya vanhu bihi nigana na makumi avili—na wayombaga,

¹⁶ Vagosya vadugu, yagudima muhayo gufikile, gwenugo Roho Nsondo wayombaga kale ku mulomo gwamwa Davidi kunguno yamwa Yudasi, homwene wavagi kalondo wa venavo vamudimaga Yesu;

¹⁷ kwisi wasolozivilwe hamohene niswe, na wapivilwe ifungu lya vukumba wenuvu.

¹⁸ Uyu wagadaga mugunda ku musyahala gwa wigomu wakwe, wisunikaga na watandukaga hagati, na mavula gakwe gose gafomokaga.

¹⁹ Genaya gamanikizivilwe na vazengi vose va mu Yerusalema; sisyo mugunda gwenugu gwitanagwa mu kiyombele chavo Hakeldama, kitisi mugunda gwa magazi.

²⁰ Kwisi yitonilwe mu kitabu cha Zaburi, Wikalo wakwe vuve itongo, Na kuduhu umo akwikalaho; na hangi, Ungi asole vutumami wakwe.

²¹ Kunguno yeniyi yilimudima umo mugati na vagosya avo, hovene vatulondaga matungo gose genayo Yesu

²² wingilaga na wafumaga hawiswe, kufuma koja kwamwa Yohana kusika lusiku lwenulo walinivagwa kwigulya kufuma kuwiswe, ave musangilwa kunguno ya vuhembuke wakwe hamohene niswe.

²³ Na vavimilikaga vavili, Yosefu alitanwa Barsaba na lina lya vuvili Yusto na Matia.

²⁴ Haho valombaga, Veve Guku, homwene uliyimanicha myoyo ya vose, utoleche nani

²⁵ wamusogolaga mugati na venava vavili, kigele awanukule vukumba na vutume wenuvu, howene Yudasi

²⁶ wavulekaga, aje nzila yakwe. Haho vesaga kavale mugati navo, na kavale kamugwilaga Matia, na mwenuyu wasogolagwa ave hamohene na vatume ikumi na umo.