Mateo 8 - Nyamwezi New Testament 1951

¹ Alisi aho wamalaga kutelemuka ku lugulu mavuto mingi ga vanhu gamulondaga.

² Na wa mbizi wegelaga na wamukuvilaga, uhaya, Guku, ulu veve ulikova ulikovola kumpizya.

³ Na wagololaga kukono kwakwe, wamukumaja na wahaya, Ndikova, upile. Na itungo lili mbizi zyakwe zyapilaga.

⁴ Na Yesu wamuwilaga, Lolaga, uleke kumuwila munhu, alisi uje ukiyoleche hambele na muhozya muhanya na ufumye mhenzi hoyene Mose walagilaga yive vusangilwaho kuwavo.

⁵ Na aho Yesu wingilaga mu Kapernaumu, mutwale

⁶ wizaga kuwakwe, wamwigongelaga, uhaya, Guku,

⁷ mukumba wane alalile ku numba alemalile na aliduka muno.

⁸ Na Yesu alimuwila, Nkwiza namupizye. Mutwale wamwitavukaga, uhaya, Guku, nkasikile isima ati veve wingile hansilili na vukumbo wane, alisi

⁹ uguyombe muhayo duhu, na mukumba wane akupila. Kwisi na nene ndi munhu hansilili na vukovozi, ndi navo valugaluga hansilili na nene, na ulu ndimuwila umo, Jaga, nawe uja; na ungi, Nzugu, nawe uwiza, na

¹⁰ musese wane, Itaga yeniyi, nawe aliyita. Alisi aho Yesu wigagwa genaya, wakumaja na wavawilaga venavo vamulondile, Yalole ndimuwila inwe, ntali kuvona luhigi luhanya kitisi lwenulu mugati na Israeli.

¹¹ Alisi ndimuwila inwe ati, vingi vakufuma ku kiya na ku mweli na vakwikala hakulila hamohene na Abrahamu na Isaka na Yakobo mu vutemi wa mwilunde.

¹² Alisi vana va vutemi vakutagilwa hanze mu giti; henaho kukuviho kulila na kusya mino.

¹³ Na Yesu wamuwilaga mutwale, Jaga, yikukwilile kitisi wasanizaja. Na mukumba wakwe wapilaga itungo lyenilo.

¹⁴ Na aho Yesu wingilaga mu numba yamwa Petro wamuvonaga nina vukwi alalile, alwalile homa. Na

¹⁵ wamudimaga kukono, na homa yamulekulaga na wavukaga na wamuvonekaja.

¹⁶ Alisi aho yavagi mhindi vamuletelaga vanhu va migavo vingi, na wayifumaja

¹⁷ na muhayo duhu, na wavapizaja valwile vose, kigele yifikile kitisi yayombilwe na mufumbuzi Yesaya homwene wahaya, Mwenuyu wagavukaja mavusakazu giswe na wagasombaga mavulwile giswe.

¹⁸ Alisi haho Yesu wayivonaga mbuto yamupilimaga, walagilaga kuvuka kumwambu.

¹⁹ Na mumanicha fitabu umo wamwegelaga na wamuwila, Muhembeki, nkukulonda kosekose uko ulija.

²⁰ Na Yesu wamuwilaga, Makeye gali na wikalo wago na manoni ga hʼilunde gali na fyali, alisi Mwana wa munhu akavile na hakugusagamizya mutwe gwakwe.

²¹ Na ungi wa vahemba vakwe wamuwilaga, Guku hambele umpe luhusa kuja nakamuzike vava.

²² Yesu wamuwilaga, Undonde, na uvaleke vafu vavazike vafu vavo.

²³ Na aho wingilaga mu wato, vahemba vakwe vamulondaga.

²⁴ Na muyaga muhanya gwavukaga mu nyanza kusika wato wakumbagwa na mavimbi, alisi mwenekili walalaga tulo.

²⁵ Na vahemba vamwegelaga, vamumisaja,

²⁶ vuhaya, Guku, utupizye, tulizimila! Na alivawila, Kuki mulogoha, inwe vʼisanizyo ido? Na wavukaga na waguhilimilaga muyaga na nyanza, na havagi sele vuliko.

²⁷ Alisi vanhu vakumaja na vayombaga, Munhu ki mwenuyu, muyaga na nyanza zilimudonhoka!

²⁸ Na aho wafikaga kumwambu mu nsi ya Vagerasi, vasangaja nawe vanhu va migavo vavili, hovene vafumaga ku fivimbi, vadaki muno, sisyo kuduhu munhu wakovolaga kuvita nzila yeniyo.

²⁹ Na vahamukaga na vayombaga, Ulikovaki kuwiswe, veve Mwana wa Mulungu? Kinahe, wizaga kutuducha na itungo liswe

³⁰ litali? Alisi kasinzo kufuma kuwavo lyavagi idale ihanya lya nguluve zilidima.

³¹ Alisi migavo yamulombaga na yuhaya, Ulu ulitufumya, ututumizye twingile mwidale lya nguluve.

³² Na wayiwilaga, Jagi! alisi yafumaga na yingilaga mwidale lya nguluve, na idale lyose lyatelemukilaga mwiga mugati na nyanza na lyafwilaga mu minzi.

³³ Alisi vadimi vapelaga, na aho vafikaga mu kaya vapozaja gose na genaya gavakwililaga vanhu va migavo.

³⁴ Haho va mukaya vose vafumaga kusanja na Yesu, na aho vamuvonaga, vamulombaga afume mwigunguli lyavo.