Mateo 4 - Nyamwezi New Testament 1951

¹ Haho Yesu walinivagwa na Roho kwibalangu kigele agemwe na Shetani.

² Na hanuma na kufunga nsiku makumi anne na mavuziku makumi anne nzala yamukolaga.

³ Na muhumbiki wamwegelaga, umuwila, Ulu veve uli Mwana wa Mulungu, ugawile mawe genaya gave mikate.

⁴ Alisi uyu witavukaga, uhaya, Yatonilwe, Munhu kuzuvuka ngʼo ku mukate duhu, alisi ku kila muhayo hogwene gulifuma ku mulomo gwa Mulungu.

⁵ Haho Shetani alimutongeka ku kaya nsondo, na alimwimika ku kansonge kʼisengelo na alimuwila, Ulu veve uli Mwana wa Mulungu, witikile hasi; kwisi yatonilwe,

⁶ Akuvalagila vamalaika vakwe kunguno yako na vakukuvucha mu makono, Kwigela ngʼo wikumpe kwiwe.

⁷ Yesu wamuwilaga, Hangi yatonilwe, Uleke kumuhumbika Guku Mulungu wako.

⁸ Hangi Shetani alimutongeka ku lugulu lulihu muno, na alimolecha mavutemi gose ga liwelelo na malukumo

⁹ gago na alimuwila, Genaya gose nkukupa veve ulu ulisukamba kunkuvila nene.

¹⁰ Haho Yesu alimuwila, Ingagaho Shetani, kwisi yatonilwe, Umukuvile Guku Mulungu wako na umutumamile uyo inene.

¹¹ Haho Shetani wamulekaga, na vamalaika vizaga vamutumamilaga.

¹² Alisi aho Yesu wigagwa ati Yohana wafungilwe wajaga ku Galilaya.

¹³ Na wasamaga ku Nazareti na wajaga na wikalaga mu Kapernaumu ya hanyanza mu

¹⁴ maluvimbi ga Zebuloni na Naftali; kigele yifikile kitisi yayombilwe na mufumbuzi Yesaya, homwene alihaya,

¹⁵ Nsi ya Zebuloni na nsi ya Naftali Ha lwande lwa nyanza ku mwambu ya Yordani, Galilaya ya vapagani:

¹⁶ Vanhu hovene vikalage mu giti vaguvonaga mwanga muhanya, Na mwanga gwavafumilaga venavo hovene vikalage mu mudaka gwa lufu.

¹⁷ Kufuma hʼitungo lyenilo Yesu wavukizaja kutanizya na kuyomba, Mupiluke moyo, kwisi vutemi wʼilunde wegelaga.

¹⁸ Na aho wayumbaga ha nguka ya nyanza ya Galilaya, wavavonaga vavili va vudugu, Simoni homwene alitanwa Petro, na muduguye Andrea, hovene vavagi valivutagila vukila mu nyanza, kwisi vavagi valovi.

¹⁹ Na alivawila, Mundonde, nane nkumuvezya inwe kuvi valova vanhu.

²⁰ Na itungo lili vagalekaga mavukila,

²¹ na vamulondaga. Na aho wasenegelaga hambele wavavonaga vangi vavili va vudugu, Yakobo mwana Zebedayo na muduguye Yohana, hovene vavagi mu wato hamohene na nsavo Zebedayo, na vavagi valigavezelezya mavukila gavo, na wavitanaga.

²² Na itungo lili vavulekaga wato na nsavo na vamulondaga.

²³ Na Yesu wapilimaga mu Galilaya yose na wahembekaga mu masinagogo gavo na watanizaja Mhola ya Chelu ya vutemi, na wapizaja mavulwile gose na mavulema gose mugati na vanhu.

²⁴ Na vukumuku wakwe wasambalaga mugati na Shami yose; na vamuletelaga valwile vose hovene vadimagwa na mavulwile ga mitindo yose na mavusatu, vanhu va migavo, va kafunta, valema;

²⁵ na wavapizaja. Na mavuto mingi ga vanhu gamulondaga kufuma ku Galilaya na Dekapoli na Yerusalema na Uyahudi na ku mwambu ya Yordani.