Mateo 3 - Nyamwezi New Testament 1951

¹ Alisi mu nsiku zyenizyo wavukaga Yohana Moja,

² alitanizya mwibalangu lya Uyahudi, uhaya, Mupiluke moyo,

³ kwisi vutemi wʼilunde wegelaga. Kwisi uyo ali mwenuyo wayombilwe na mufumbuzi Yesaya, alihaya, Muzwi gwa umo alihamuka mwibalangu: Muyivezelezye nzila yamwa Guku, Mutugelanizye tufufuyila twakwe.

⁴ Alisi Yohana mwenuyu wazwalage kizwalo cha vuyenze wa ntwangavulende na musipi gwa ndili mu mukimbili gwakwe, na chakulya chakwe chavage nzige na vuki wa mwipolu.

⁵ Mwitungo ilo vajaga kuwakwe vana Yerusalema vose na vana Uyahudi vose na va chalo

⁶ chose cha bihi na Yordani; na vogivagwa nawe mu mongo Yordani aho valigaziumilizya mavukenaguzi gavo.

⁷ Alisi aho wavavonaga Vafarisayo na Vasadukayo vingi vizile ha voja wakwe, wavawilaga, Inwe vuvyalwa wa nzoka, nani wavahugukaja inwe kukipela

⁸ kisila kilakiza? Sisyo mufyambye fisumo filigelanila ha kupiluka moyo.

⁹ Na muleke kwiganika mu myoyo yinwe ati, tuli nawe vava Abrahamu; kwisi ndimuwila inwe ati, Mulungu alikovola kumuhembukizya Abrahamu vana ku mawe genaya.

¹⁰ Alisi lelo mbasa yitulilwe hʼitina lya muti, haho kila muti hogwene gukafyambizye fisumo fisoga gukubutwa na gukutagilwa mu moto.

¹¹ Nene ndimoja inwe na minzi ha kupiluka moyo, alisi mwenuyo homwene aliza hanuma yane ali na nguzu kukila nene, na nene nkasikile isima ninga kusomba filatu fyakwe; mwenuyo akumoja inwe na Roho Nsondo na moto.

¹² Ali nʼitangwa mu kukono kwakwe, akulupyagula lumbuga lwakwe na akuzipona ngano mu nhungugu zyakwe, alisi mamuyaye akugatwimila mu moto hogwene kuzima ngʼo.

¹³ Haho Yesu wizaga kufuma ku Galilaya kusika

¹⁴ Yordani kumwa Yohana, kigele ogiwe nawe. Alisi Yohana wamuhangilizaja na wahaya, Nene ndifunda

¹⁵ kogiwa naʼho, na veve uliza kuwane? Alisi Yesu witavukaga na wamuwilaga, Yizumiwe lelo, kwisi syenisyo yilitudima iswe kumazya ludonho lose; haho wazumaja.

¹⁶ Na aho Yesu wamalaga kogiwa na wafumaga ku minzi, ilunde lyamulugukilaga na wayivonaga Roho ya Mulungu yilisoka kitisi nkunda yilimudemela.

¹⁷ Na muzwi kufuma kwilunde gulihaya, Mwenuyu ali Mwana wane, mutoneke homwene ndimudehela.