Mateo 28 - Nyamwezi New Testament 1951

¹ Na aho sabato yavitaga, hʼikingilima ha lusiku lwa mbele lwa yuma, vizaga Maria Magdalena na Maria uyo ungi kukilolela kivimbi.

² Na lolaga, nyamuditimya nhanya yaditimaga, kwisi malaika wamwa Guku wikaga kufuma kwilunde, wegelaga na walisindikaga iwe na wikalaga kwigulya nalyo.

³ Na kwigela kwakwe kwavagi kitisi lukuva na mwenda gwakwe gwa pe kitisi theluji.

⁴ Na kunguno ya kumogoha valindilizi vadetemaga na vavagi kitisi vafwile.

⁵ Alisi malaika wavawilaga vakima, uhaya, Muleke kogoha, kwisi ndimanicha ati mulimukova Yesu uyo wakomelilwe ku

⁶ musigiti, Akavileho henaha, kunguno wahembukaga kitisi wayombage; nzugi, mulole henaho walalage.

⁷ Hangi muje wangu mukavawile vahemba vakwe ati wahembukaga; lolagi, alimutongela inwe kuja ku Galilaya, kwenuko mukumuvona. Lolagi, namuwilaga inwe sisyo.

⁸ Na vafumaga wangu ku kivimbi na kogoha na kudeha kuhanya, na vapelaga kukavapozezya vahemba yeniyi.

⁹ Na lolaga, Yesu wasangaja navo, uhaya, Mwagisiwa inwe! Navo vegelaga, vagakumbataga magulu gakwe na vamusukambilaga.

¹⁰ Haho Yesu wavawilaga, Muleke kogoha! Muje, mukavapozezye vadugu vane vaje ku Galilaya, na kwenuko vakumbona.

¹¹ Na aho vavagi vajile, lolaga, vamo va valindilizi vingilaga mu kaya na vavawilaga vahozya vahanya genaya gakwilaga.

¹² Navo vivilingaga hamohene na vavezaja ndaka, vavapaga valugaluga mapesa mingi,

¹³ vuhaya, Muyombe: Vahemba vakwe vizaga ha vuziku na vamwivaga aho twali tulalile tulo.

¹⁴ Na ulu mhola yeniyi yilifika hambele na munachalo, haho

¹⁵ tukumwikondelekezya, inwe muleke kwisusuma. Navo vagasolaga mapesa na vavezaja kitisi vahembekagwa; na muhayo gwenugu gwakumukaga mugati na Vayahudi kusika lelo.

¹⁶ Na vahemba ikumi na umo vajaga ku Galilaya ku lugulu lwenulo Yesu wavalagilaga.

¹⁷ Na aho vamuvonaga vamukuvilaga, alisi vamo vasusihanaja.

¹⁸ Na Yesu wegelaga bihi na wayombaga navo, uhaya, Nene napivilwe vukovozi vose mwilunde na mu liwelelo.

¹⁹ Haho jagi, mukavavezye vahemba va machalo gose, na muvoje venava mu lina lya Vava na lya Mwana na lya Roho Nsondo.

²⁰ Na muvahembeke kumazya gose genaya namulagilaga inwe. Na lolagi, nene ndiho hamohene ninwe nsiku zyose kusika kusila kwa liwelelo.