Mateo 27 - Nyamwezi New Testament 1951

¹ Na aho wangalukaga vahozya vahanya vose na vanamhala va chalo valomaga ndaka kwigulya na Yesu, kigele vamuvulage.

² Na vamutungaga na vamufilaga na vamutavulaga ku munachalo Pontio Pilato.

³ Na aho Yudasi, homwene wamugambaga, wavonaga ati watemagwa kitanga, wakondaga moyo na wazisyokaja fedha izyo makumi adatu ku vahozya vahanya na

⁴ vanamhala, uhaya, Nene nakenagulaga aho nagagambaga magazi gakavile na musango. Navo vayombaga, Yili milimo yiswe? Yili milimo yako veve mwenekili.

⁵ Na wagatagilaga mapesa mwisengelo, wafumaga na wajaga wakinigaja mwenekili.

⁶ Alisi vahozya vahanya vazisolaga fedha na vayombaga, Mwiko kuzitula zyenizi mwisanduku lya kalumbilo, kwisi zili mupango gwa magazi.

⁷ Na aho vamalaga kwitozya vakigulaga nazyo kiwanja cha muvumbi kuvazika mwenumo vageni.

⁸ Kunguno yeniyi kiwanja cheniki kilitanwa kiwanja cha magazi kusika lelo.

⁹ Haho gwafikilaga muhayo gwayombilwe na mufumbuzi Yeremia, homwene wayombaga, Na vazisolaga fedha makumi adatu, mupango gwa uyo wakalagwa mupango, homwene vana vʼIsraeli

¹⁰ vamukalaga mupango; na vazifumaja kukigula kiwanja cha muvumbi, kitisi Guku wandagilaga.

¹¹ Na Yesu wafilagwa hambele na munachalo, munachalo wamuvuzaja, uhaya, Veve uli mutemi wa Vayahudi?

¹² Yesu wamwitavuka, Veve wayombaga. Na ha mbulano zya vahozya vahanya na vanamhala akitavukile ninga muhayo gumo.

¹³ Haho Pilato wamuwilaga, Ukavile kwigwa gose genaya venava valisangilwa

¹⁴ kwigulya naʼho? Nawe akamwitavukile hangi ninga muhayo gumo; sisyo munachalo wakumaja munogwene.

¹⁵ Alisi ha sikukulu munachalo wavagi na kitilwe cha kuvatungulila va chalo mutungwa umo homwene vamukovaga.

¹⁶ Na itungo lyenili vavagi nawe mutungwa umo mukumuku, lina lyakwe Baraba.

¹⁷ Aho venava vivilingaga Pilato wavawilaga, Mulikova namutungulile inwe nani, Baraba ninga Yesu homwene alitanwa Kristo?

¹⁸ Kwisi wamanikaja ati vamufumaja kunguno ya ivuva.

¹⁹ Na aho wikalaga kwisumbi lya kitanga, mukima wakwe watumizaja kuwakwe, uhaya, Uleke kuvi na mihayo kwigulya na mugololoku mwenuyo, kwisi lelo nadukaga munogwene mu kiloti kunguno yakwe.

²⁰ Na vahozya vahanya na vanamhala vavasemenganaja va mbuto ya vanhu vakove Baraba na kumuvulaga Yesu.

²¹ Munachalo witavukaga na wavawilaga, Mulikova namutungulile nani mugati na venava vavili?

²² Navo vayombaga, Baraba. Pilato alivawila, Haho namwitileki Yesu, homwene alitanwa Kristo? Vose valiyomba, Akomelwe ku musigiti!

²³ Na munachalo wahaya, Kavi ki mwenuyu witaga? Navo vahamukaga munogwene, Akomelwe ku musigiti!

²⁴ Alisi aho Pilato wavonaga ati wavagi akakovolile kuvezya kinhu, sumbwa ibubu lyakulaga munogwene, wasolaga minzi na wikalavaga makono hambele na vanhu na wayombaga, Nene nkavile kutondwa ku magazi ga mwenuyu mugololoku, lolagi, guli muhayo gwinwe.

²⁵ Na va chalo vose vitavukaga, vuhaya, Magazi gakwe gaveho kwigulya niswe na kwigulya na vana viswe.

²⁶ Haho wavatungulilaga Baraba; na aho wamalaga kumutulagula Yesu, wamutavulaga akomelwe ku musigiti.

²⁷ Haho valugaluga va munachalo vamufilaga Yesu ku numba ya Serikali na vavavilingaga hamohene va mbuto yose ya valugaluga.

²⁸ Na aho vamalaga kumuzula myenda yakwe,

²⁹ vamuzwikaga mwenda gwa za, na vagovengʼhanaja ngata ya mingʼhwa na vayitulaga ku mutwe gwakwe, na vamudimikizaja isununu mu mulila gwakwe, vamusukambilaga na vamuyeyaga, vuhaya, Tulikugisya veve mutemi wa Vayahudi.

³⁰ Na vamutugilaga mate na valisolaga isununu na vamutulaga ku mutwe gwakwe.

³¹ Na aho vamalaga kumuyeya, vamuzulaga mwenda gwenugu na vamuzwikaga myenda yakwe, na vamufilaga akakomelwe ku musigiti.

³² Na aho vavagi vajile, vasangaja na munhu, muna Kirene, lina lyakwe Simoni, mwenuyu vamukungilizaja agusombe musigiti gwakwe.

³³ Na aho vafikaga henaho

³⁴ halitanwa Golgata, nguno yago, Hakapanga, vamupaga mvinyo yisangilizivilwe na ndulila, na aho alivunda wakanaga kunwa.

³⁵ Aho vamalaga kumukomela ku musigiti, vagavanaga myenda yakwe mugati na kwesa kavale, kigele yifikile kitisi yayombilwe na mufumbuzi, Vagavanaga myenda yane, na kunguno ya kizwalo, chane vesaga kavale.

³⁶ Na vikalaga vamulindilile henaho.

³⁷ Na vatulaga kwigulya na mutwe gwakwe lumanyilo lwa mbulano yakwe, MWENUYU ALI YESU, MUTEMI WA VAYAHUDI.

³⁸ Na hangi vakomelagwa hamohene nawe vasambo

³⁹ vavili, umo ha mulila na mwiye ha lumoso. Na avo valivita vamufusaga na vatinginaja mitwe yavo, vuhaya,

⁴⁰ Veve homwene ulilibomola isengelo na ulilizenga mu nsiku idatu, wipizye veve mwenekili!

⁴¹ Ulu veve uli Mwana wa Mulungu, usoke ku musigiti. Sisyo savasava vahozya vahanya vamufusaga hamohene na vamanicha fitabu na vanamhala, vuhaya,

⁴² Vangi wavapizaja na akakovolile kwipizya mwenekili! Ulu ali mutemi wʼIsraeli, asoke ku musigiti, niswe tukumusanizya!

⁴³ Wamusanizaja Mulungu, na lelo amupizye ulu alimufunda; kwisi wayombaga, Nene ndi Mwana wa Mulungu.

⁴⁴ Sisyo sisyene vasambo avo vakomelilwe hamohene nawe vamufusaga.

⁴⁵ Na kufuma saa sita hilavulaga ku nsi yose kusika saa kenda.

⁴⁶ Na bihi na saa kenda Yesu wahamukaga na muzwi muhanya, uhaya, Eli, Eli lama sabaktani, nguno yayo: Mulungu wane, Mulungu wane, kuki

⁴⁷ wandekaga nene? Na vamo va venavo vimile kunu vayigagwa na vayombaga, Mwenuyu alimwitana Elia.

⁴⁸ Na umo mugati navo wapelaga, wasolaga ibuhyo, walyokazaja na siki, walikimikaga kwisununu na wamunwisaja.

⁴⁹ Na vangi vayombaga, Lekagi, tuvone ulu Elia akwiza kumupizya.

⁵⁰ Na Yesu walilaga hangi na kilaka kihanya na wadahaja moyo.

⁵¹ Na lolaga, mukingo gwʼisengelo gwatandukaga mapande avili kufuma higulya kusika hasi;

⁵² nsi yadetemaga, matale gatandukaga, fivimbi fyalugukaga na mivili mingi ya vafu vasondo

⁵³ yahembukaga, na vafumaga ku fivimbi, na hanuma na kuhembuka kwakwe vingilaga mu kaya nsondo na vigelaga ku vingi.

⁵⁴ Na muteko hamohene na venavo vamulindilaga Yesu, aho vayivonaga nyamuditimya na genayo gakwilaga vakangagwa munogwene, vuhaya,

⁵⁵ Loleyene, mwenuyo wavagi Mwana wa Mulungu. Na vakima vingi vavagiho henaho valilolela kufuma kule, hovene vamulondaga kufuma ku Galilaya na kumutumamila.

⁵⁶ Mugati navo vavagi Maria Magdalena na Maria, nina wamwa Yakobo na Yosefu, na nina wa vana vamwa Zebedayo.

⁵⁷ Na limi lya mhindi wizaga munhu musavi, muna Arimatia, lina lyakwe Yosefu, nawe wavagi muhemba wamwa Yesu.

⁵⁸ Mwenuyu wajaga kumwa Pilato na walombaga muvili gwamwa Yesu. Haho Pilato walagilaga gutavulwe kuwakwe.

⁵⁹ Na Yosefu wagusolaga muvili na waguvimbilaga mu mwenda musoga gwa pe,

⁶⁰ na wagutulaga mu kivimbi chakwe kipya hochene waliwakidula hʼitale, na walipilingitizaja iwe ihanya ha

⁶¹ muzigo gwa kivimbi, na wajaga. Na vavagiho henaho Maria Magdalena na Maria uyo ungi valikala ha welekela wa kivimbi.

⁶² Alisi hawangaluke, lusiku hanuma na lusiku lwa kwivezelezya, vahozya vahanya na Vafarisayo vivilingaga hamwa Pilato,

⁶³ vuhaya, Guku, tulizukila ati mupuvya mwenuyo wayombage aho wavage mupanga, Nene nkuhembuka hanuma na nsiku idatu.

⁶⁴ Haho ulagile kivimbi kilindilwe kusika lusiku lwa vudatu, kwigela ngʼo vahemba vakwe vize kumwiva na kuvawila vanhu ati wahembukaga ku lufu, na vupuvya wa mhelo vukuvi vuvi kukila wa mbele.

⁶⁵ Pilato wavawilaga, Henaha muli na valindilizi, jagi, mukalindile kitisi mumanikizye inwe venekili.

⁶⁶ Navo vajaga na valitungaga iwe na lumanyilo, na vavatulaga valindilizi vakilindile kivimbi.