Mateo 23 - Nyamwezi New Testament 1951

¹ Haho Yesu wayombaga na mbuto ya vanhu na

² vahemba vakwe, uhaya, Kwisumbi lyamwa Mose valikala vamanicha fitabu na Vafarisayo.

³ Haho gose genaya vakumuwila inwe, genaya mwite na mugamazye, alisi muleke kwita hanuma na milimo yavo, kwisi valiyomba alisi vakavile kwita.

⁴ Valitunga miligo mitimbu na valivavagazya vanhu, alisi venekili vakatogilwe kuyisegezya ninga ngʼo na kala kamo.

⁵ Milimo yavo yose valivezya kigele vavonwe na vanhu, kwisi valizigalihilizya karatasi zya kulombela na valigakulilizya mabomho ga myenda yavo,

⁶ na valitogwa hakwikala kumbele hakulila,

⁷ na masumbi ga kumbele mu masinagogo gavo na kugisiwa mu magulilo na kwitanwa Rabi.

⁸ Alisi inwe muleke kwitanwa Rabi, kwisi umo ali muhembeki winwe, homwene Kristo, na inwe vose muli va vudugu.

⁹ Na inwe muleke kumwitana umo vava ku liwelelo, kwisi umo ali Vava winwe, homwene ali mwilunde.

¹⁰ Na hangi muleke kwitanwa vakilongozi, kwisi kilongozi winwe ali umo, homwene Kristo.

¹¹ Homwene ali muhanya mugati ninwe ave mukumba winwe.

¹² Homwene aliwikulilizya mwenekili akudoheleziwa; na homwene aliwidohelezya mwenekili akukuliliziwa.

¹³ Musyolo kuwinwe vamanicha fitabu na Vafarisayo, inwe vagulumi, kunguno mulivalugalila vanhu vutemi wʼilunde, kwisi inwe venekili mukavile kwingila, ninga kuvaleka vingile venavo valikova kwingila.

¹⁴ Musyolo kuwinwe vamanicha fitabu na Vafarisayo, inwe vagulumi, kunguno mukuzilyaga numba zya vasimbe, na mu vuyengani mukulombaga itungo ihanya; kunguno yeniyi mukuyangulwa vuyanguzi vutimbu munogwene.

¹⁵ Musyolo kuwinwe vamanicha fitabu na Vafarisayo, inwe vagulumi, kwisi mulivita mu nyanza na mu nsi kumugada umo ave muhemba; na ulu wingilaga, haho mulimuvezya kuvi mwana wamwa Shetani, muvi kavili kuvita inwe venekili.

¹⁶ Musyolo kuwinwe vakilongozi vahofu, hovene muliyomba, Homwene alilahilila kwisengelo gukavile muhayo; alisi homwene alilahilila ku dhahabu ya mwisengelo ali mutondwa.

¹⁷ Inwe vagulumi na vahofu! Kinani kili kihanya, dhahabu ninga isengelo holyene

¹⁸ lyayisondohizye dhahabu? Hangi muliyomba, Homwene alilahilila ku hakuhozezya gukavile muhayo, alisi homwene alilahilila ku kipanwa hochene kiliho kwigulya naho ali mutondwa.

¹⁹ Inwe vahofu! Kinani kili kihanya, kipanwa ninga hakuhozezya, hohene halikisondohya kipanwa?

²⁰ Haho homwene alilahilila ku hakuhozezya alilahilila kuho hamohene na gose galiho kwigulya naho.

²¹ Na homwene alilahilila kwisengelo, alilahilila kulyo hamohene na mwenuyo alikalamo.

²² Na homwene alilahilila kwilunde alilahilila kwisumbi lya Mulungu.

²³ Musyolo kuwinwe vamanicha fitabu na Vafarisayo, inwe vagulumi, kunguno mukulipaga ifungu lya ikumi ku luwiga na nzano na kumini, alisi mwagalekaga hogene gali malambu mu ngʼhama: vugololoku, kigongo, isanizyo; yilimudima kugamazya genaya vuduhu kugaleka genayo gangi.

²⁴ Inwe vakilongozi vahofu, hovene muliswiza mbu alisi mulimila ntwangavulende.

²⁵ Musyolo kuwinwe vamanicha fitabu na Vafarisayo, inwe vagulumi, mulikigusa kikombe na sahani hibala, alisi mugati fyokalile na wivi na wivonya.

²⁶ Veve Mufarisayo muhofu, hambele ukiguse kikombe na sahani mugati, kigele five fya pe na hanze.

²⁷ Musyolo kuwinwe vamanicha fitabu na Vafarisayo, inwe vagulumi, kunguno mulifikola fivimbi fyasilivilwe na nswakala, hofyene filigela hibala fisoga, alisi mugati fyokalile na maguha ga vafu na zoma zyose.

²⁸ Sisyo inwe vene muligela hanze hambele na vanhu kitisi vagololoku, alisi mugati mulokala na vugulumi na wigomu.

²⁹ Musyolo kuwinwe vamanicha fitabu na Vafarisayo, inwe vagulumi, kunguno mulifizenga fivimbi fya vafumbuzi na muligazwikila malumeho ga kuvizukila vagololoku na muliyomba,

³⁰ Ulu mbe twavagiho mu nsiku zya vansiswe, mbe tukasangilile navo ha magazi ga vafumbuzi.

³¹ Sisyo mulisangilwa kwigulya ninwe venekili ati muli vana va vavulagi va vafumbuzi.

³² Muyokazye ngelo ya vansinwe.

³³ Inwe nzoka, vuvyalwa wa mayoka, lumehoki mulivela kukipela kitanga cha Gehena?

³⁴ Kunguno yeniyi ndivatumizya kuwinwe vafumbuzi na va ngelo na vamanicha fitabu, na mugati navo mukuvavulaga vamo na kuvakomela ku musigiti, na mukuvatulagula vamo milanga mu masinagogo ginwe, na mukuvapezezya kufuma kaya yimo kusika kaya yingi,

³⁵ kigele gize kwigulya ninwe magazi magololoku gose hogene gazwikivilwe mu liwelelo kufuma magazi gamwa Abele mugololoku kusika magazi gamwa Zakaria mwana Baraka, homwene mwamuvulagile hagati nʼisengelo na hakuhozezya.

³⁶ Yalole ndimuwila inwe ati, gose genaya gakufika kwigulya na vuvyalwa wenuvu.

³⁷ Yerusalema, Yerusalema hoveve ulivavulaga vafumbuzi na kuvatulagula mawe venavo vatumizivilwe kuwako, kanga nakovaga kuvavilinga vana vako kitisi igongo lilituvilinga twana twalyo hansilili na manana

³⁸ galyo, alisi inwe mwakanaga. Lolagi, numba yinwe yikulekwa itongo.

³⁹ Kwisi ndimuwila inwe, vukumbu na lelo inwe kumbona ngʼo hangi kusika mulayombe, Adosiwe homwene aliza mu lina lya Guku.