Mateo 22 - Nyamwezi New Testament 1951

¹ Na Yesu wavukizaja kuyomba navo hangi mu mikolani, uhaya,

² Vutemi wʼilunde vulimwikola mutemi mbati homwene wavezaja winga ku mwana wakwe.

³ Na wavatumizaja vakumba vakwe kuvitana avo valalikilwe; navo valemaga kwiza.

⁴ Hangi wavatumizaja vakumba vangi, uhaya, Muvawile avo valalikilwe, Lolagi, nakivezaja chakulya chane, nzagamba na nziku zyane zyavulagilwe na chose kiliho tayari, mwize ku winga.

⁵ Alisi avo vavengelezaja na vajaga, umo ku mugunda gwakwe, na ungi ku vuguzi wakwe.

⁶ Na avo vasigalaga vavadimaga vakumba vakwe na vavatulaga sivi na vavavulagaga.

⁷ Alisi mutemi wakilagwa na wavatumizaja valugaluga vakwe na vavavulagaga vavu lagi venavo na vayizigaja kaya yavo.

⁸ Haho alivawila vakumba vakwe, Winga vuli tayari, alisi valalikwa vakasikile isima.

⁹ Sisyo muje ku maka zya nzila, na vose avo mwavona muvitane ku winga.

¹⁰ Na vakumba venavo vafumaga na valondaga nzila zyose na vavavilingaga vose avo vavavonaga, vavi na vasoga, na numba ya winga yokalaga na vageni.

¹¹ Aho mutemi wingilaga kuvalola vageni, wamuvonaga munhu umo akazwalile mwenda gwa winga.

¹² Na alimuwila, Mwichane, lumehoki veve wingilaga mwenumu na ukazwalile mwenda

¹³ gwa winga? Nawe ahulikile sele. Haho mutemi wavawilaga vakumba vakwe, Mumutunge magulu na makono na mumuponezye mu giti ya hanze, kwenuko kukuviko kulila na kusya mino.

¹⁴ Kwisi vingi vitanilwe, alisi vado vasogolilwe.

¹⁵ Haho Vafarisayo vajaga na vitozaja hamohene isi vakumutega na muhayo.

¹⁶ Na vavatumizaja kuwakwe vahemba vavo hamohene na Vaherode, vuhaya, Muhembeki, tulimanicha ati uli wa lole na ulihembeka nzila ya Mulungu mugati na loleyene, na ukavile kogoha kunguno ya munhu ninga umo ngʼo, kwisi ukavile kuvulola vusyu wa vanhu.

¹⁷ Haho utuwile, ulivona kinahe, luliho luhusa kumulipa Kaisari kodi ninga ngʼo?

¹⁸ Alisi Yesu wavuvonaga vuvi wavo na wayombaga, Kungunoki mulingema, inwe vagulumi? Munoleche

¹⁹ ipesa lya kodi! Navo vamuletelaga denari yimo.

²⁰ Haho wavawilaga, Isumbano lyenili lyamwa nani na

²¹ vutone wenuvu wamwa nani? Navo vayombaga, Lyamwa Kaisari. Haho alivawila, Mumulipe Kaisari fyenifyo fyamwa Kaisari, na Mulungu fyenifyo fyamwa Mulungu.

²² Na aho vayigagwa, vakumaja, vamulekaga na vajaga.

²³ Na lusiku lwenulo Vasadukayo hovene vakuyombaga ati, kuduhu vuhembuke ku lufu, vamwegelaga na

²⁴ vamuvuzaja, vuhaya, Muhembeki, Mose wayombaga, Ulu umo alifwa vuduhu vana, haho muduguye amutole mukima wakwe na amuvyalile muduguye vana.

²⁵ Alisi lelo vavagiho mugati niswe vadugu mpungati, na wa mbele watolaga na wafwaga, na kunguno wavagi akavile na vana wamulekelaga muduguye mukima wakwe.

²⁶ Na sisyo savasava wa vuvili na wa vudatu kusika wa mpungati.

²⁷ Alisi hanuma na vose mukima mwene wafwaga.

²⁸ Mugati na vuhembuke ku lufu mukima akuvi muke wamwa nani mugati na venavo

²⁹ mpungati, kwisi vose valivamutola? Yesu witavukaga na wavawilaga, Inwe mulipuva kunguno mukagamanikizye mavutone ninga nguzu zya Mulungu.

³⁰ Kwisi mu vuhembuke ku lufu vakavile kutola ninga kutolwa ngʼo, sumbwa vakuvi kitisi vamalaika va Mulungu mwilunde.

³¹ Na kunguno ya vuhembuke wa vafwile, mukayisomile yeniyi Mulungu wamuwilaga inwe aho aliyomba,

³² Nene ndi Mulungu wamwa Abrahamu na Mulungu wamwa Isaka na Mulungu wamwa Yakobo? Mulungu akavile Mulungu wa vafwile sumbwa wa vazuvuku.

³³ Na aho mbuto ya vanhu vayigagwa yeniyi, vakumaja kunguno ya vuhembeki wakwe.

³⁴ Alisi aho Vafarisayo vigagwa ati wagumumaja mulomo gwa Vasadukayo,

³⁵ vivilingaga hamohene, na umo mugati navo, mumanicha ngʼhama, wamugemaga,

³⁶ umuvuzya, Muhembeki, mukumo ki guli muhanya mu ngʼhama?

³⁷ Nawe wamuwilaga, Umutogwe Guku Mulungu wako na moyo gose gwako na myuye yose yako na ngelo zyose zyako.

³⁸ Gwenugu guli mukumo muhanya na gwa mbele.

³⁹ Na gwa vuvili guligwikola gwenugo, Umutogwe muzenganwa wako kitisi uliwitogwa veve mwenekili.

⁴⁰ Mu mikumo yeniyi ivili zisangizye ngʼhama zyose na vafumbuzi.

⁴¹ Aho Vafarisayo vavagi vatali vivilingile hamohene, Yesu wavavuzaja, uhaya, Muliganikaki kunguno yamwa

⁴² Kristo, ali mwana wamwa nani? Valimuwila, Wamwa Davidi.

⁴³ Nawe alivawila, Lumehoki Davidi alimwitana mu roho Guku, aho wayombaga,

⁴⁴ Guku wamuwilaga Guku wane, Wikale ha mulila gwane kusika ndivatula Vanisi vako ha magulu gako?

⁴⁵ Ulu Davidi alimwitana Guku, lumehoki haho ali mwana wakwe?

⁴⁶ Na kuduhu umo wakovolaga kumwitavuka muhayo ninga gumo; na vukumbu na lusiku lwenulo kuduhu umo wagimaga kumuvuzya hangi ninga muhayo gumo.