Mateo 21 - Nyamwezi New Testament 1951

¹ Na aho vegelaga bihi na Yerusalema na vafikaga ha Betfage ha Lugulu lwa Maguta, Yesu wavatongezaja

² vahemba vavili na wavawila, Jagi ku kakaya kali ha welekela winwe, na haho mukuvona mpunda yitungilwe na kana hamohene nayo, muyitungule na mundetele.

³ Na ulu umo alimuwila inwe muhayo, haho muyombe, Guku alizifunda; na itungo lili akuzitumizya.

⁴ Genaya gose gakwilaga kigele muhayo gufikile gwayombilwe na mufumbuzi ati,

⁵ Mumuwile mwanike wa Sioni, Lolaga, mutemi wako aliza kuwako, Mudekanu, adamilile ku mpunda, ahene, ku kana ka mpunda, Mwana wa mpunda ya kuvucha miligo.

⁶ Alisi vahemba vajagako na vitaga kitisi Yesu wavalagilaga;

⁷ na vayiletaga mpunda na kana kayo, na vazyanzaga myenda zyavo kwigulya nazyo, nawe wikalaga kwigulya nazyo.

⁸ Alisi vingi mugati na mbuto ya vanhu vazyanzaga myenda zyavo mu nzila, na vangi vagabutaga matambi ku miti na vaganzaga mu nzila.

⁹ Alisi mbuto izyo zimutongelile na izyo zimulondile zyahamukaga zyuhaya, Hosana Mwana wamwa Davidi! Adosiwe homwene aliza mu lina lyamwa Guku! Hosana mwigulya muno!

¹⁰ Na aho wingilaga mu Yerusalema, kaya yose yatinginaga vuhaya, Nani mwenuyu?

¹¹ Alisi mbuto ya vanhu vayombaga, Mwenuyu ali mufumbuzi Yesu wa Nazareti ya Galilaya.

¹² Na Yesu wingilaga mwisengelo na wavapezezaja hanze vose hovene vavagi valiguzya na kugula mwisengelo na wazikunulaga meza zya vabadila mapesa na

¹³ masumbi ga vaguzya nkunda, na alivawila, Yatonilwe ati numba yane yikwitanwa numba ya kulomba, alisi inwe muliyivezya kuvi ipilinga lya vasambo.

¹⁴ Na vamwegelaga vahofu na valema henaha mwisengelo, na wavapizaja.

¹⁵ Alisi vahozya vahanya na vamanicha fitabu, aho vagavonaga genayo ga kukumya hogene witaga, na vayanda hovene vavagi valihamuka henaho mwisengelo na valihaya, Hosana ku Mwana wamwa Davidi! vagayaga na vamuwilaga, Uligwa genayo venava valiyomba?

¹⁶ Na Yesu wavawilaga, Ahene, mutali kusoma, Ku milomo ya vana vado na ya velele wivezezizye ikuzyo?

¹⁷ Na wavalekaga na wafumaga mu kaya na wajaga ku Betania na walalaga kwenuko.

¹⁸ Alisi ha wangaluke, aho wavagi alisyoka hangi mu

¹⁹ kaya, wavagi na nzala. Na aho wavonaga mukuyu bihi na nzila, wagwegelaga na akawine kinhu hago sumbwa madutu duhu. Na waguwilaga, Fikigele ngʼo fisumo kuwako kusika hanahana. Na itungo lili mukuyu gwanyalaga.

²⁰ Na vahemba, aho vavonaga vakumaja vuhaya, Lumehoki mukuyu gwenugu gwanyalaga

²¹ itungo lili? Alisi Yesu witavukaga na alivawila, Yalole ndimuwila inwe, ulu muli nʼisanizyo vuduhu kususihanya mukuvezya, ngʼo yeniyi yavezeziwa ku mukuyu duhu, alisi ninga ulu mukuluwila lugulu lwenulu, Vukaga na wiponezye mu nyanza, haho yikukwila.

²² Na gose hogene mukugalomba mugati na kulomba, ulu mulisanizya, mukupiwa.

²³ Na aho wingilaga mwisengelo, vahozya vahanya na vanamhala va chalo vamwegelaga aho wavagi alihembeka na valiyomba, Ku vukovozi ki ulita genaya?

²⁴ ninga nani wakupaga vukovozi wenuvu? Alisi Yesu witavukaga na wavawila, Nane nkumuvuzya inwe muhayo gumo, na ulu mulinitavuka, nane nkuvawila inwe

²⁵ ku vukovozi ki ndita genaya, Kogiwa kwamwa Yohana kwafumaga kuhe, kwilunde ninga ku vanhu? Na vitozaja hamohene na vayombaga ati,

²⁶ Ulu twayomba, Kwilunde, akutuwila, Kuki haho mukamusanizizye; alulu twayomba, Ku vanhu, tulivogoha vanhu, kwisi vose vamwilolelaga Yohana ati ali mufumbuzi.

²⁷ Na vamwitavukaga Yesu vuhaya, Tukamanikizye. Nawe wavawila, Nane mwene kumuwila inwe ngʼo ku vukovozi ki ndita genaya.

²⁸ Alisi mulivona kinahe? Wavagiho munhu ali na vana vavili. Na wamwegelaga wa mbele umuwila, Mwana wane, uje walelo ukatumame mu mugunda gwa mizabibu.

²⁹ Alisi wamwitavukaga, uhaya, Ii, nkanile! alisi hanuma wanogolekaga na wajaga. Na wamwegelaga wa vuvili na wamuwilaga sisyo savasava.

³⁰ Nawe witavukaga, uhaya, Ahene, guku! alisi akajile.

³¹ Nani mugati na venava vavili witaga kikowa na ise? Valimuwila, Wa mbele. Yesu alivawila, Yalole ndimuwila inwe, vʼihongo na vayanzi vakumutongela inwe kwingila mu vutemi wa Mulungu.

³² Kwisi Yohana wizaga kuwinwe mu nzila ya vugololoku na mukamusanizizye; alisi vʼihongo na vayanzi vamusanizaja; alisi nulu mwayivonaga yeniyi mukanogolekile hanuma na kumusanizya. Mwigwe mukolani gungi.

³³ Wavagiho munhu mwene numba homwene walimaga mugunda gwa mizabibu, na wagupilimaja na lugutu na wasimbilagamo ituli lya kukamulila na wazengaga chamba; na wavatulaga mu

³⁴ mugunda valimi, na wajaga ku chalo kingi. Alisi aho itungo lya fisumo lyegelaga, wavatumizaja vakumba vakwe ku valimi kigele vanukule fisumo.

³⁵ Na valimi vavadimaga vakumba vakwe, umo vamutulagulaga, na ungi vamuvulagaga, na ungi vamutulagulaga mawe.

³⁶ Hangi wavatumizaja vakumba vangi vingi kukila va mbele, vavitilaga sisyo savasava.

³⁷ Alisi haho wamutumizaja kuwavo mwana wakwe, uhaya, Vakumogoha mwana wane.

³⁸ Alisi aho valimi vamuvonaga mwana vayombaga hamohene, Mwenuyu ali musaliki; kako, tumuvulage na tusole isalo lyakwe.

³⁹ Na vamudimaga na vamutagilaga hanze na mugunda gwa mizabibu na vamuvulagaga.

⁴⁰ Ulu haho akwiza guku wa mugunda

⁴¹ gwa mizabibu akuvitilaki valimi venavo? Valimuwila, Vavi venava akuvazigilizya, na akuvatula valimi vangi mu mugunda gwa mizabibu, hovene vakumupa

⁴² fisumo hʼitungo lyafyo. Yesu alivawila, Mutali kusoma mugati na vutone, Iwe holyene vazenguzi valikanaga lyavile iwe lya ha kituli; Genaya gafumile kumwa Guku na gali ga kukumya mu minso giswe.

⁴³ Kunguno yeniyi ndimuwila inwe ati, vutemi wa Mulungu vukwingiwa kuwinwe na vukupanwa kwigongo lingi holyene likwambya fisumo fyavo.

⁴⁴ Na homwene akugwila kwiwe lyenili akuvinzaguka; alisi mwenuyu likumugwila likumuviganyaviganya.

⁴⁵ Aho vahozya vahanya na Vafarisayo vayigagwa mikolani yakwe, vamanikaja ati aliyomba kunguno yavo.

⁴⁶ Na vakovaga kumudima, alisi vayogohaga mbuto ya vanhu, kwisi yamwilolelaga kitisi ali mufumbuzi.