Mateo 18 - Nyamwezi New Testament 1951

¹ Mwitungo lyenilo vahemba vamwegelaga Yesu na vayombaga, Nani ali muhanya mu vutemi wʼilunde?

² Na Witanaga kayanda na wakimilikaja hagati navo na

³ wayombaga, Yalole ndimuwila inwe, ulu mukapilukile moyo na kuvi kitisi tuyanda, inwe kwingila ngʼo mu

⁴ vutemi wʼilunde. Kwisi homwene aliwidohelezya mwenekili kuvi kitisi kayanda kenaka, mwenuyu ali muhanya mu vutemi wʼilunde.

⁵ Na homwene akukanukula kayanda kitisi kenaka mu lina lyane alinanukula nene.

⁶ Alisi homwene akumuvonya umo mugati na venavo vado hovene valinsanizya, yikumuvelela uyu muno iwe ihanya lya kusyela litungwe mu nhingo yakwe na atagilwe mu vusihu wa nyanza.

⁷ Musyolo ku liwelelo kunguno ya mawivonya. Kwisi kolaga mawivonya gize, alisi musyolo ku munhu mwenuyo alivuleta wivonya.

⁸ Alisi ulu kukono kwako ninga kugulu kwako kulikuvonya, ukubute na ukutage; yilikuvelela kwingila mu vuzuvuku ulemalile kukila kuvi na makono avili na kwingila mugati na hakuzimila mu moto gukazimaga.

⁹ Na ulu linso lyako lilikuvonya, ulinje na ulitage; yilikuvelela kwingila mu vuzuvuku uli na nsongo kukila kuvi na minso avili na kwingila mugati na hakuzimila.

¹⁰ Mwikomye ati mukamuvengelezye ngʼo umo wa venava vado; kwisi ndimuwila inwe ati vamalaika vavo kwilunde valivuvona hanahana vusyu wa Vava wane homwene ali mwilunde.

¹¹ Kwisi Mwana wa munhu wizaga kukipizya chenicho chazimilile.

¹² Muliganika kinahe? Ulu munhu ali na ngʼholo igana na yimo mugati nazyo yazimila, kinahe, akavile kuzileka izyo makumi kenda na kenda mu

¹³ lugulu na kuja kukayikova yeniyo yazimilile? Na ulu aliyivona, yalole ndimuwila inwe, aliyidehela yeniyi kukila zyenizyo makumi kenda na kenda hozyene zikazimilile.

¹⁴ Sisyo savasava Vava winwe wa mwilunde akatogilwe umo wa venavo vado azimile.

¹⁵ Alisi ulu muduguyo alikukenagulila, uje ukamuhane

¹⁶ muli mwinene duhu; ulu alikwigwa wamugadaga muduguyo; alisi ulu akavile kukwigwa, umujane umo hamohene naʼho ninga vavili, kigele kila muhayo gukindikwe ku milomo ya vasangilwaho vavili ninga vadatu.

¹⁷ Alisi ulu akavigilwe venavo, uliwile ivilingano; na ulu akavile kuligwa ivilingano savasava, ave

¹⁸ kuwako kitisi munhu wa hibala ninga wʼihongo. Yalole ndimuwila inwe, yose hoyene mukuyitunga mu liwelelo, nayo yikutungwa mwilunde; na yose hoyene mukutungula mu liwelelo, nayo yikutungulwa mwilunde.

¹⁹ Hangi ndimuwila inwe ati, ulu vavili mugati ninwe mu liwelelo vizumilizya hamohene kunguno ya icho valikova kukilomba, yikuvakwilila venava na Vava wane homwene ali mwilunde.

²⁰ Kwisi henaho vavili ninga vadatu vivilingile mu lina lyane, nene ndiho mugati navo.

²¹ Haho Petro wamwegelaga na alimuwila, Guku, kanga mudugu wane ankenagulile nane namutondole?

²² Kusika ka mpungati? Yesu alimuwila, Nkavile kukuwila kusika ka mpungati, sumbwa kusika makumi mpungati ka mpungati.

²³ Kunguno yeniyi vutemi wʼilunde vulimwikola mutemi mbati homwene wakovaga kusolozya misango na vakumba vakwe.

²⁴ Alisi aho wavukizaja kusolozya, umo waletagwa hambele nawe watondagwa matalanta fihumbi ikumi.

²⁵ Alisi kunguno wavagi akavile nacho cha kulina, gukuye wa lagilaga aguziwe hamohene na muke wakwe na vana vakwe na fyose ifyo wavagi nafyo, kigele musango gulipwe.

²⁶ Haho mukumba mwenuyu wagwaga ha magulu gakwe na wamukuvilaga, uhaya, Undembele na nkukulipa gose.

²⁷ Na gukuye wasativagwa lusungu ku mukumba mwenuyo na wamutungulaga na wamutondolaga musango gwakwe.

²⁸ Alisi aho mukumba mwenuyu wafumaga, wamuvonaga umo wa vakumba viye, homwene watondagwa nawe madenari igana; wamudimaga na wamunigaga, uhaya, Undipe genaya ulitondwa!

²⁹ Haho mukumba mwiye wagwaga ha magulu gakwe na wamulombaga, uhaya, Undembele na nkukulipa gose.

³⁰ Alisi akazumizye, sumbwa wajaga na wamuponezaja mu jela, kusika alipe musango gwakwe.

³¹ Alisi aho vakumba viye vavonaga genaya gakwilaga, vasayaga muno na vajaga kukamupozezya guku wavo genayo gakwilaga.

³² Haho gukuye alimwitana na alimuwila, Veve mukumba muvi, musango gose gwenugo nakutondolaga,

³³ kunguno wandombaga; naʼho yikakudimile kumuvonela kisa mukumba mwiyo, kitisi

³⁴ nakuvonelaga veve kisa? Na gukuye wagayaga na wamupanaga ku vaducha kusika alipe gose genayo watondagwe.

³⁵ Sisyo savasava Vava wane homwene ali mwilunde akumwitila inwe, ulu inwe mukavile kuvatondola vadugu vinwe na myoyo yinwe.