Mateo 17 - Nyamwezi New Testament 1951

¹ Na hanuma na nsiku mkaga Yesu wavajanaga Petro na Yakobo na Yohana, muduguye, na alivafila vinene ku lugulu lulihu.

² Na muvili gwakwe gwagalukaga hambele navo, na vusyu wakwe wayekemaga kitisi limi, na myenda yakwe yavagi ya pe kitisi mwanga.

³ Na lolaga, vigelaga hawavo Mose na Elia valisunsumula nawe.

⁴ Na Petro witavukaga na alimuwila Yesu, Guku, yilivela muno iswe tuliho henaha; ulu ulikova nkuzenga henaha nkambi idatu, yimo kuwako na yimo kumwa Mose na yimo kumwa Elia.

⁵ Aho wavagi atali aliyomba, ilunde lya pe lyavakinganizaja; na muzwi gwafumaga kwilunde na gulihaya, Mwenuyu ali Mwana wane, mutoneke, homwene alintogezya, mumwigwe mwenuyu.

⁶ Na aho vahemba vigagwa, vagwaga vakundamaga ha vusyu wavo na vogohaga munogwene.

⁷ Na Yesu wavegelaga na wavakumaja, uhaya, Muvuke

⁸ na muleke kogoha! Alisi aho valangamilaga vakawine ungi sumbwa Yesu inene.

⁹ Na aho vavagi valitelemuka ku lugulu Yesu wavagizaja, uyomba, Muleke kumuwila munhu genaya mwagavonaga kusika Mwana wa Munhu wahembukile ku lufu.

¹⁰ Na vahemba vakwe vamuvuzaja, vuhaya, Kungunoki haho vamanicha fitabu valiyomba ati: Elia

¹¹ kolaga ize hambele? Alisi witavukaga na wahaya,

¹² Ahene, Elia akwiza na akuvezelezya gose. Alisi ndimuwila inwe ati, Elia wamalaga kwiza, na vakamumanikizye, sumbwa vamwitilaga gose hogene vakovaga. Sisyo sisyene Mwana wa Munhu akudukiwa navo.

¹³ Haho vahemba vamanikaja kitisi aliyomba navo kunguno ya Yohana Moja.

¹⁴ Na aho vafikaga ha mbuto ya vanhu, mugosya umo

¹⁵ wamwegelaga na alimusukambila na aliyomba, Guku, umuvonele kisa mwana wane, kwisi ali mulwile wa kafunta na alidukiwa sivi; kwisi kingi aligwila mu moto na kingi mu minzi.

¹⁶ Na namuletaga ku vahemba vako, navo vilagwa kumupizya.

¹⁷ Na Yesu witavukaga, uhaya, Inwe, vuvyalwa wʼivengwe na wa vutavanya, kusika nanali nkuviho hamohene ninwe? Kusika nanali

¹⁸ nilambilizye ninwe? Muletagi hawane. Na Yesu wagudakilaga mugavo, nago gwamufumaga na muyanda wapizivagwa itungo lyenilo.

¹⁹ Haho vahemba vamwegelaga Yesu kumhelo na vayombaga, Kungunoki iswe

²⁰ twilagwa kugufumya? Nawe alivawila, Kunguno yʼisanizyo linwe ido; kwisi yalole ndimuwila inwe, ulu mbe mwavagi nʼisanizyo kitisi luveke lwa haradali mukuluwila lugulu lwenulu, Uvuke henaha na uje uko! na lukuja, na kuduhu kinhu kikuvi kigaka kuwinwe.

²¹ Alisi mutindo gwenugu kufuma ngʼo, sumbwa mu kulomba na kufunga.

²² Alisi aho vahingulaga mu nsi ya Galilaya, Yesu wavawilaga, Mwana wa Munhu ali bihi kupanwa mu

²³ makono ga vanhu; navo vakumuvulaga na ha lusiku lwa vudatu akuhembuka. Na vasayaga munogwene.

²⁴ Alisi aho vafikaga mu Kapernaumu va kodi yʼisengelo vamwegelaga Petro na vayombaga, Kinahe, muhembeki winwe akavile kufumya kodi yʼisengelo?

²⁵ Nawe wayombaga, Alifumya. Na aho wingilaga mu numba Yesu watongelaga kumuvuzya na wayombaga, Ulivona kinahe Simoni, vatemi va liwelelo valisola ihongo ninga kodi ku vanhu ki, ku vana ninga ku

²⁶ vageni? Alisi aho wayombaga, Ku vageni, Yesu

²⁷ wamuwilaga, Haho vana vali vanamiko. Alisi kwigela ngʼo tuve isiki lya kwikumpa kuwavo, uje ku nyanza na ukatagile ndovani, na usole isomba lya mbele holyene lilifuma na ugwasamye mulomo gwalyo na ukuvonamo fedha; yeniyo uyisole na uvape venavo kuwane na kuwako.