Mateo 15 - Nyamwezi New Testament 1951

¹ Haho vizaga hamwa Yesu kufuma ku Yerusalema

² Vafarisayo na vamanicha fitabu, vuhaya, Kungunoki vahemba vako valifileka fitilwe fya va kale? Kwisi vakavile kwikalava makono ulu valilya.

³ Alisi witavukaga na wavawilaga, Kuki inwe vene muliguleka mukumo gwa Mulungu kunguno ya fitilwe finwe?

⁴ Kwisi Mulungu wahayaga, Umukuzye nso na noko; na, Homwene alimufusa ise ninga nina afwe lufu.

⁵ Alisi inwe muliyomba, Homwene akumuwila ise ninga nina ati, icho ulikova kugwasiwa na nene chavile kipanwa kumwa Mulungu, mwenuyu akafundile kumukuzya ise na nina.

⁶ Na sisyo inwe mwaguvulaga muhayo gwa Mulungu kunguno ya fitilwe finwe.

⁷ Inwe vagulumi, Yesaya wafumbulaga loleyene kunguno yinwe aho wayombaga,

⁸ Va chalo cheniki valinkuzya na mulomo, Alisi myoyo yavo yili kule na nene.

⁹ Alisi valinkuvila cha gele, Kwisi valihembeka mavuhembeki hogene gali mikumo ya vanhu.

¹⁰ Na haho wayitanaga mbuto, wavawilaga, Igagwi na

¹¹ mumaniche, ngʼo icho kilingilila mu mulomo kilimwilavuzya munhu, sumbwa icho kilifumila ku mulomo, chenicho kilimwilavuzya munhu.

¹² Haho vahemba vamwegelaga, vumuwila, Ulimanicha ati Vafarisayo vagayaga aho vigagwa muhayo gwenugu?

¹³ Alisi witavukaga, uhaya, Mimelo yose yikahambilwe na Vava wane

¹⁴ wʼilunde yikudubulwa. Muvaleke! Vali vahofu hovene valivatongela vahofu vichavo; alisi ulu muhofu alimutongela muhofu mwiye, vose vavili vakugwila mwikandilo.

¹⁵ Na Petro witavukaga, umuwila, Utulotolele mukolani ugu.

¹⁶ Yesu wayombaga, Ninga inwe

¹⁷ vene mutali muli vuduhu masala? Mutali kumanicha ati chenicho kilingilila mu mulomo kilivita mu nda na

¹⁸ kilifumiliziwa kwibala? Alisi hogene galifumila ku mulomo galifuma ku moyo, na genaya galimwilavuzya munhu.

¹⁹ Kwisi ku moyo galifuma miganiko mavi: vuvulagi, vusihya, vuyanzi, wivi, vulembekezya, vufusani.

²⁰ Genaya galimwilavuzya munhu, alisi kulya na makono gakikalavile kukavile kumwilavuzya munhu.

²¹ Na Yesu wafumaga kwenuko na wajaga ku magunguli ga Tiro na Sidoni.

²² Na mukima Mukananaya wafumaga ku magunguli genayo na wamuhamukilaga, uhaya, Umbonele kisa Guku, Mwana wamwa Davidi, mwanike wane alidimwa sivi na migavo.

²³ Alisi akamwitavukile ninga muhayo gumo. Na vahemba vakwe vamwegelaga, vamulombaga, vuhaya, Umuleke aje, kwisi alilila kunuma yiswe.

²⁴ Alisi wavitavukaga, Nkatumizivilwe sumbwa ku ngʼholo zyazimilile zya numba ya Israeli.

²⁵ Alisi uyu wizaga wamukuvila, uhaya,

²⁶ Guku, ngwasaje! Alisi wamwitavukaga, uhaya. Yikavelile kusola mukate gwa vana na kuguponezya ku tuwa.

²⁷ Alisi wayombaga, Ahene Guku, alisi tuwa twene tukulyaga tuvuvungili twenutu tuligwa hansilili na meza zya vaguku vato.

²⁸ Haho Yesu witavukaga na wamuwila, Mukima, isanizyo lyako lili ihanya; yikukwilile kitisi ulikova. Na mwanike wakwe wapilaga itungo lyenilo.

²⁹ Na Yesu wafumaga kwenuko na wafikaga bihi na nyanza ya Galilaya na walinaga ku lugulu na wikalaga kwenuko.

³⁰ Na mbuto ningi zya vanhu vizaga kuwakwe, hovene vavaletaga valema, vihinile, vahofu, va

³¹ kameme, na vangi vingi; na vavatulaga ha magulu gakwe, nawe wavapizaja. Sisyo vose vakumaja aho vavonaga va kameme valiyomba na vihinile valipila na valema valiyumba na vahofu valivona; na vamukumukaja Mulungu wa Israeli.

³² Haho Yesu wavitanaga vahemba vakwe, uvawila, Nene ndisatiwa lusungu ku mbuto yeniyi, kwisi vadilaga nsiku idatu hawane, na vakavile nacho chakulya; na kuvadahya vali na nzala nkatogilwe, kwigela ngʼo vagwe wesa mu nzila.

³³ Na vahemba vakwe vamuwilaga, Tupiwe kuhe henaha mwibalangu mikate ya kukwila,

³⁴ va mbuto yeniyi nhanya vigute? Na Yesu alivawila, Muli nazyo mikate zinga? Alisi ava vahaya, Mpungati na tusomba tudo.

³⁵ Na walagilaga mbuto yikale hasi.

³⁶ Na wayisolaga mikate mpungati na masomba, na walumbilaga, na wayimegulaga, na wavapaga vahemba,

³⁷ navo vayipaga mbuto. Na vose valyaga na vigutaga; na vasolelaga matonge gasigalaga na gokalaga matala mpungati.

³⁸ Alisi avo hovene valyaga vavagi vagosya fihumbi finne, kuleka vakima na vana.

³⁹ Na wayidahaja mbuto, na wingilaga mu wato na wajaga ku malwande ga Magdala.