Mateo 14 - Nyamwezi New Testament 1951

¹ Mwitungo lyenilo mutemi Herode wigagwa mhola yamwa Yesu.

² Na wavawilaga vakumba vakwe, Mwenuyu ali Yohana Moja; wahembukile ku lufu, na kunguno yeniyi nguzu zyenizi zilitumama muwakwe.

³ Kwisi Herode waliwamudima Yohana na wamutulaga mu jela kunguno yamwa Herodia, muke wa muduguye Filipo.

⁴ Kwisi Yohana wamuwilaga, Guli mwiko kuwako kuvi nawe.

⁵ Na wakovaga kumuvulaga, alisi vavogohaga vanhu, kwisi vamwilolelaga kitisi ali mufumbuzi.

⁶ Alisi aho sikukulu ya kuvyalwa kumwa Herode yafikaga, mwana mukima wamwa Herodia wanegulaga hambele navo na wamutogezaja Herode. Kunguno yeniyi wamulaganaja na mulahi kumupa icho akumulomba.

⁷ Alisi uyu wasemezivagwa na nina,

⁸ na alihaya, Umpe henaha mutwe gwamwa Yohana Moja mu lubehe.

⁹ Na mutemi wasayaga, alisi kunguno ya mulahi na kunguno ya venavo vikalaga nawe hakulila, walagilaga apiwe.

¹⁰ Na wamutumizaja munhu, wamutinaga mutwe mu jela.

¹¹ Na mutwe gwakwe gwaletagwa mu lubehe, na mwanike wagupivagwa na wamufililaga nina.

¹² Na vahemba vakwe vagusolaga muvili gwakwe na vaguzikaga; na vajaga vakamupozezaja Yesu.

¹³ Aho Yesu wayigagwa, wafumagako na wajaga mu wato kusika henaho haduhu vanhu; na aho vanhu vigagwa, vamulondaga mbuto lwa magulu kufuma ku makaya gavo.

¹⁴ Na aho wafumaga wavavonaga vanhu vingi, na wavasayilaga na wavapizaja valwile vavo.

¹⁵ Alisi aho lyavagi limi lya mhindi, vahemba vakwe vamwegelaga, vuhaya, Henaha ibalangu na limi lyadohaga; uvadahye vanhu, kigele vaje mu tukaya vakigulile chakulya.

¹⁶ Alisi Yesu wavawilaga, Vakafundile

¹⁷ kuja, inwe vapagi chakulya. Alisi valimuwila, Tukavile na kinhu henaha, sumbwa mikate itano na masomba avili.

¹⁸ Alisi alivawila, Mundetele yeniyi.

¹⁹ Na wavalagilaga vanhu vikale mu maswa; na wayisolaga mikate itano na masomba avili, na walangamilaga kwilunde na wadosaja luvango, na wayimegulaga

²⁰ na wavapaga vahemba, navo vavapaga vanhu. Na vose valyaga na vigutaga, na wagasolelaga matonge hogene gasigalaga, na gokalaga matala ikumi na avili.

²¹ Alisi avo valyaga vavagi vagosya fihumbi fitano, kuleka vakima na vana.

²² Haho itungo lili wavakungilizaja vahemba kwingila mu wato, vatongele kuvuka kumwambu, aho atali alivadahya vanhu.

²³ Na aho wamalaga kuvadahya

²⁴ vanhu, walinaga ku lugulu kukalomba. Na aho vuziku wila wavagiko inene. Alisi mwitungo lyenilo wato wasegenelaga hagati na nyanza na wayegezivagwa na mavimbi, kwisi muyaga gwavagi gulifuma kumbele yavo.

²⁵ Alisi ha zamu ya vunne ya vuziku Yesu wizaga kuwavo aliyumba higulya na nyanza.

²⁶ Alisi aho vamuvonaga aliyumba higulya na nyanza vakangagwa, vuhaya, Guli muzimu; na valilaga kunguno ya vova.

²⁷ Alisi itungo lili Yesu wayombaga navo, uhaya, Idibagi

²⁸ moyo, honene, muleke kogoha! Na Petro wamwitavukaga, uhaya, Guku, ulu uli veve, ndagilage nize kuwako higulya na minzi.

²⁹ Na alimuwila, Nzugu! Na Petro wafumaga mu wato na wayumbaga higulya na minzi afike kumwa Yesu.

³⁰ Alisi aho waguvonaga muyaga gwa nguzu wogohaga, aho alivukizya kunwivila walila

³¹ muno, uhaya, Guku, umpizye! Haho Yesu wagololaga kukono na wamudimaga, umuwila, Veve wʼisanizyo ido, kuki wasusaja?

³² Na aho vamalaga kwingila mu wato muyaga gwalembelaga.

³³ Alisi venavo vavagi mu wato vamukuvilaga, vuhaya, Loleyene veve uli Mwana wa Mulungu.

³⁴ Na aho vamalaga kuvuka, vingilaga mu nsi ya Genezareti.

³⁵ Na vanhu va henaho, aho vamumanikaja, vafilaga mhola ku malwande gose, na vamuletelaga vose hovene vavagi vasatu.

³⁶ Na vamulombaga, valikumye duhu ibomho lya mwenda gwakwe; na vose hovene valikumaja vapizivagwa.