Mateo 13 - Nyamwezi New Testament 1951

¹ Lusiku lwenulo Yesu wafumaga ku numba na wikalaga ha nguka ya nyanza.

² Na mbuto zivilingaga hawakwe kusika wingilaga mu wato na wikalagamo, na mbuto zyose zimaga ha nguka.

³ Haho wavawilaga mingi mu mikolani wahaya: Muvivi wafumaga kuja kukaviva.

⁴ Na aho wavagi aliviva, zimo zyagwilaga mu nzila na manoni gizaga na gazilyaga.

⁵ Na zimo zyagwilaga kwitale uko zikavile na vulongo wingi, na kunguno zyavagi zikavile na vulongo wingi zyamelaga itungo lili.

⁶ Alisi aho limi lyafumaga, zyavavukaga, na kunguno zyavagi zikavile na mizi zyanyalaga.

⁷ Na zimo zyagwilaga mu mingʼhwa,

⁸ na mingʼhwa gakulaga na gazipinehezaja. Alisi zimo zyagwilaga mu vulongo vusoga na zyambaja fisumo, zingi igana, zingi makumi mkaga, zingi makumi adatu.

⁹ Homwene ali na matwi ga kwigwa, adegeleke.

¹⁰ Na vahemba vamwegelaga, vuhaya, Kuki uliyomba

¹¹ navo mu mikolani? Alisi wavitavukaga, uhaya, Inwe mwapivagwa kumanicha mbisila ya vutemi wʼilunde, alisi avo vakapivilwe.

¹² Kwisi homwene ali nacho akongeziwa, nawe akuvi nacho cha vuyaga na masese; alisi homwene akavile nacho, icho ali nacho akupuziwa.

¹³ Kunguno yeniyi ndiyomba navo mu mikolani, kwisi nulu valivona vakavile kuvona, na nulu valigwa vakavile kwigwa,

¹⁴ ninga kumanicha ngʼo. Na mu venava vufumbuzi wamwa Yesaya wafikilile, vulihaya, Kwigwa mukwigwa, alisi kumanicha ngʼo; Kuvona mukuvona, alisi kuvona ngʼo.

¹⁵ Kwisi moyo gwa va chalo cheniki gwalambile na vakavile kwigwa sisoga na matwi, Na minso gavo vagatindizizye, Kwigela ngʼo vavone na minso, Na vigwe na matwi, Na vamaniche na moyo, Na vapiluke moyo, Na nene navapizye.

¹⁶ Alisi gelukilwa minso ginwe, kwisi galivona, na matwi

¹⁷ ginwe, kwisi galigwa. Kwisi yalole ndimuwila inwe ati, vafumbuzi vingi na vagololoku vatamanilagwe kugavona genaya inwe muligavona, alisi vakagawine, na kwigwa genaya inwe muligigwa, alisi vakagigilwe.

¹⁸ Lelo mugudegeleke mukolani:

¹⁹ Homwene aligwigwa Muhayo gwa vutemi vuduhu kumanicha, aliza hawakwe mwenuyo Muvi na alisonza gwenugo gwavivilwe mu moyo gwakwe, mwenuyu ali kitisi izyo zyavivilwe ha nzila.

²⁰ Alisi izyo zyavivilwe kwitale zili kitisi mwenuyo homwene aligwigwa Muhayo na aligwanukula wangu na kudeha.

²¹ Alisi akavile na mizi mugati nawe na alijama itungo ido duhu, alisi ulu galivuka maluduko ninga kupeziwa kunguno ya Muhayo, haho aligayilizya.

²² Izyo zyavivilwe mu mingʼhwa zili kitisi mwenuyo homwene aligwigwa Muhayo, na myanya zya, liwelelo na vuyengani wa nsavo ziligupinehezya Muhayo na gulidila vuduhu fisumo.

²³ Izyo zyavivilwe mu vulongo vusoga zili kitisi mwenuyo aligwigwa Muhayo na aligumanicha; mwenuyo alifyambya fisumo, umo igana, ungi makumi mkaga, ungi makumi adatu.

²⁴ Na wavalangisaja mukolani gungi, uhaya, Vutemi wʼilunde vulimwikola munhu homwene wavivaga mbiyu nsoga mu mugunda gwakwe.

²⁵ Alisi aho vanhu valalaga, wizaga mwanisi wakwe na wavivaga mbiyu zya

²⁶ ngese mugati na ngano; na wajaga. Alisi aho mumelo

²⁷ gwakulaga na gwavisulaga, haho ngese yigelaga. Alisi vakumba vakwe vamwegelaga mwene numba, vumuwila, Guku, ukavivile mbiyu nsoga mu mugunda gwako, lelo ngese zyafumilehe? Alisi alivawila, Mwanisi witile yeniyi.

²⁸ Vakumba valimuwila, Ulikova tuje

²⁹ tukazigesele na kuzikuminga? Alisi wavawila, Byololo, kwigela ngʼo muzidubule ngano hamohene na ngese.

³⁰ Muleke zyose ivili zikule hamohene kusika hakwimbula; na itungo lya kwimbula nkuvawila vimbuzi, Musogole hambele ngese na muzitunge miligo na muzitwime, alisi ngano muzipone mu nhungugu zyane.

³¹ Na mukolani gungi wavalangisaja, uhaya, Vutemi wʼilunde vuliyikola mbiyu ya haradali, hoyene munhu wayisolaga na wayivivaga mu mugunda gwakwe.

³² Yili ndo kukila mbiyu zyose, alisi ulu yakulaga yuvi nhanya kukila miti yose ya makuvi, guvi muti, na manoni gʼilunde guwiza guwikala mu matambi gago.

³³ Mukolani gungi wavawilaga, Vutemi wʼilunde vulilikola itumbyo, holyene mukima walisolaga na walisangilizaja na ngelo idatu zya vufuma, kusika vose watumbaga vuliko.

³⁴ Yeniyi yose Yesu waziwilaga mbuto zya vanhu mu mikolani, na vuduhu mikolani akayombile navo ninga muhayo gumo ngʼo; kigele muhayo gufikile hogwene gwayombilwe na mufumbuzi, alihaya,

³⁵ Nkuyomba mu mikolani, nkuziyomba hozyene zyavisilwe vukumbu na kutundwa kwa liwelelo.

³⁶ Haho wayidahaja mbuto na wingilaga mu numba; na vahemba vakwe vamwegelaga, vuhaya, Utulotolele mukolani gwa ngese mu mugunda.

³⁷ Alisi witavukaga, uhaya, Muvivi wa mbiyu nsoga ali Mwana wa Munhu.

³⁸ Alisi mugunda guli liwelelo, na mbiyu nsoga vali vana va vutemi; alisi ngese vali vana va mwenuyo Muvi, na mwanisi homwene wayivivaga ali Shetani.

³⁹ Kwimbula kuli isilo lya liwelelo, alisi vimbuzi vali vamalaika.

⁴⁰ Kitisi ngese zilikumingwa na kutwimwa, sisyo

⁴¹ sisyene yikuviho hʼisilo lya liwelelo lyenili. Mwana wa Munhu akuvatumizya vamalaika vakwe, na vakukuminga mu vutemi wakwe magayilizyo gose na venavo

⁴² hovene valita tuvi; na vakuvaponezya mu ngʼanzo ya moto, mwenumo kukuviko kulila na kusya mino. Haho vagololoku vakuyekema kitisi limi mu vutemi wa Vava wavo.

⁴³ Homwene ali na matwi ga kwigwa, adegeleke!

⁴⁴ Vutemi wʼilunde vuliyikola nsavo yavisilwe mu mugunda hoyene munhu wayikugaga na wayivisaga, na mu kuyidehela alija ukaguzya gose ali nago, na ugugula mugunda gwenugo.

⁴⁵ Hangi vutemi wʼilunde vulimwikola munhu musuluzya homwene wazikovage lulu nsoga.

⁴⁶ Alisi aho wayivonaga yimo ya mupango muhanya muno, wajaga na wagaguzaja gose ago wavagi nago, na wayigulaga yeniyi.

⁴⁷ Hangi vutemi wʼilunde vuliwikola vukila waponezivagwa mu nyanza na wakumingaga masomba ga mitindo yose.

⁴⁸ Alisi aho vokalaga vavudutilaga ku nguka, na vikalaga na vagasolelelaga masoga mu fiseme, alisi mavi vagatagaga.

⁴⁹ Sisyo yikuvi hʼisilo lya liwelelo. Vamalaika vakufuma na vakuvalekanya vavi na vagololoku,

⁵⁰ na vakuvaponezya mu ngʼanzo ya moto, mwenumo kukuviko kulila na kusya mino.

⁵¹ Mumanikizye yose yeniyi? Valimuwila, Ndio.

⁵² Alisi wavawilaga, Kunguno yeniyi uyo mumanicha fitabu homwene wahembekagwa kunguno ya vutemi wʼilunde, alimwikola mwene numba homwene alifumya mu mbika yakwe fipya na fya kale.

⁵³ Na yakwilaga, aho Yesu wamalaga mikolani yeniyi wafumagako.

⁵⁴ Na aho wafikaga mu kaya umo wakulilaga wavahembekaga mu sinagogo yavo, syenisyo vose vakumaja na vayombaga, Mwenuyu wapivilwa

⁵⁵ kuhe masala genaya na nguzu zyenizi? Mwenuyu akavile mwana wa museremala? nina akavile kwitanwa

⁵⁶ Maria? na vazunaye vakavile Yakobo na Yosefu na Simoni na Yuda? na valumbuye vakavileho vose hamohene niswe? Haho kuhe mwenuyu wagapivilwa

⁵⁷ gose genaya? na vagayilizaja kunguno yakwe. Alisi Yesu wavawilaga, Mufumbuzi akagayivagwa isima sumbwa mu chalo chakwe mwenekili na mu numba yakwe yene.

⁵⁸ Na akitile henaho milimo mingi ya nguzu kunguno ya ivengwe lyavo.