Mateo 10 - Nyamwezi New Testament 1951

¹ Na wavitanaga vahemba vakwe ikumi na vavili hawakwe, na wavapaga vukovozi kuyifumya migavo ya zoma na kugapizya mavulwile gose na mavulema gose. Mina ga vatume gali genaya:

² Wa mbele Simoni alitanwa Petro, na Andrea muduguye, na Yakobo mwana Zebedayo na Yohana muduguye.

³ Filipo na Bartolomayo, Tomasi na Mateo

⁴ wʼihongo. Yakobo mwana Alfeyo na Tadeyo. Simoni muna Kana na Yudasi Iskariote homwene wamugambaga.

⁵ Yesu wavatumizaja venava ikumi na vavili na wavalagilaga, alihaya, Kuduhu mufike ku vapagani, ninga kuduhu mwingile mu makaya ga Vasamaria.

⁶ Alisi muje ku ngʼholo zyazimilile zya numba ya Israeli.

⁷ Na mu lugendo lwinwe mutanizye na muyombe ati,

⁸ vutemi wʼilunde wegelaga. Muvapizye valwile, mu vahembuche vafwile, muvezye va mbizi, muyifumye migavo; cha kisa mwapivagwa, cha kisa mupane!

⁹ Mukasombe ngʼo dhahabu ninga ngʼo fedha ninga ngʼo senti mu misipi yinwe, ninga ngʼo mufuko gwa lugendo,

¹⁰ ninga ngʼo myenda ivili, ninga ngʼo filatu, ninga ngʼo mulanga, kwisi yiligelanila mutumami apiwe chakulya chakwe.

¹¹ Na kila kaya ninga kakaya umo mukwingila, muvuzye nani wʼisima, na henaho mwikale kusika mulivuka.

¹² Alisi ulu mulingila mu numba muyigisye.

¹³ Na ulu numba yeniyi yili nʼisima, kuhola kwinwe kukwikalamo; alisi ulu yikavile nʼisima kuhola kwinwe kukumusyokela inwe.

¹⁴ Na homwene akavile kuvanukula inwe ninga kuyigwa mhola yinwe, ulu mulifuma mu numba yeniyo ninga mu kaya yeniyo, mukunkumule luvuvu ku magulu ginwe.

¹⁵ Yalole ndimuwila inwe, nsi ya Sodoma na Gomora yikupiwa mabuhu ha lusiku lwa kitanga kukila kaya yeniyo.

¹⁶ Lolagi, ndimutumizya inwe kitisi ngʼholo mugati na mapuge, kunguno yeniyi muve na masala kitisi nzoka na muve vuduhu vugulumi kitisi nkunda.

¹⁷ Alisi mwilindile hambele na vanhu, kwisi vakumufila inwe hambele na mavanza na vakumutulagula mu masinagogo gavo.

¹⁸ Na mukufilwa hambele na vanachalo na vatemi kunguno yane ha vusangilwaho kuwavo na ku vapagani.

¹⁹ Ulu vakumufila inwe, muleke kwisusuma lumehoki ninga muhayo ki muyombe, kwisi mukupiwa mwitungo lyenilo yeniyo mukuyomba.

²⁰ Kwisi inwe mukuleka kuvi vayombi, sumbwa Roho yamwa Vava

²¹ winwe, hoyene yiliyomba mugati ninwe. Alisi mudugu akumufumya muduguye avulagwe, na ise akumufumya mwana wakwe, na vana vakuvavula vavyazi vavo na kuvavulaga.

²² Na mukugaywa na vanhu vose kunguno ya lina lyane, alisi homwene alijama kusika

²³ hamhelo, mwenuyu akupiziwa. Alisi ulu valimuducha inwe mu kaya yimo mupelele ku yingi, kwisi loleyene ndimuwila, inwe kugamala ngʼo makaya gʼIsraeli kusika aliza Mwana wa munhu.

²⁴ Muhemba akavile muhanya kukila muhembeki wakwe, ninga mukumba akavile muhanya kukila gukuye.

²⁵ Yilimukwila muhemba ave kitisi muhembeki wakwe, na mukumba kitisi gukuye. Ulu vamwitanaga mwene numba Beelzebul, haho va numba yakwe kinahe?

²⁶ Kunguno yeniyi muleke kuvogoha, kwisi kuduhu kinhu chakumbilwe hochene kikuleka kufumbulwa; na kuduhu kinhu chavisilwe hochene kikuleka kuvonwa.

²⁷ Yeniyi ndimuwilila inwe mu giti muyombele ha pe; na yeniyi muliwewetelwa mwitwi mutanizizye kwigulya na numba.

²⁸ Na muleke kuvogoha venava valiguvulaga muvili, alisi vakakovolile kuzivulaga myuye, sumbwa mumogohe mwenuyu alikovola kuzimangucha myuye na muvili mu moto gwa hanahana.

²⁹ Tuzolwe tuvili tukavile kugulwa ku senti yimo? Na kuduhu kamo ka twenutu kaligwa hasi, sumbwa Vava winwe azumye. Alisi nzwili zinwe zyose zyene zyasolozivilwe.

³⁰ Kunguno yeniyi muleke kogoha,

³¹ inwe mulikila mupango gwa tuzolwe twingi.

³² Kunguno yeniyi homwene alinzumilizya hambele na vanhu, mwenuyo nkumuzumilizya hambele na Vava wane wa mwilunde.

³³ Alisi homwene alinikana hambele na vanhu, nane nkumwikana hambele na Vava wane wa mwilunde.

³⁴ Mukiganike ngʼo ati nizaga kuleta kuhola mu liwelelo, nkizile kuleta kuhola sumbwa lupanga.

³⁵ Kwisi nizaga kumulekanya munhu na ise, na mwanike na nina, na mukamwana na nina vukwi; vanisi va munhu vakuvi va numba yakwe.

³⁶ Homwene alimutogwa ise

³⁷ ninga nina kukila nene, akasikile isima hawane; na homwene alimutogwa mwana ninga mwanike kukila

³⁸ nene, akasikile isima hawane. Na homwene akavile kuguvucha musigiti gwakwe na kundonda nene, akasikile isima hawane.

³⁹ Homwene aliyivona myuye yakwe akuyizimizya; na homwene akuyizimizya myuye yakwe kunguno yane, akuyivona.

⁴⁰ Homwene alimwanukula inwe alinanukula nene; na homwene alinanukula nene alimwanukula mwenuyo wantumizizye nene.

⁴¹ Homwene alimwanukula mufumbuzi kunguno ali mufumbuzi akupiwa musyahala gwa mufumbuzi; na homwene alimwanukula mugololoku kunguno ali mugololoku, akupiwa musyahala gwa mugololoku.

⁴² Na homwene alimunwisya umo wa venavo vado lukulu lwa minzi manedeku duhu kunguno ali muhemba, yalole ndimuwila inwe, mwenuyo kugayiwa ngʼo vusyokeziwa wakwe.